Masalimo 111 - Chiyawo Bible

Malumbo kwa AMBUJE

¹ Mwalumbe AMBUJE!* Tinjatogolela AMBUJE ni mtima wangu wosope, pa msongano ŵa ŵandu ŵagoloka mtima.

² Masengo ga AMBUJE gali gamakulungwa, wosope ŵakunonyelwa nago akusagaganicisya.

³ Masengo gawo gali gakucimbicikwa ni gamakulungwa, ni kugoloka kwawo kuli kwa yaka yosope.

⁴ Akusatukumbusya masengo gawo gakusimonjeka, AMBUJE ali ŵacanasa ni ŵambone.

⁵ Akwapa yakulya ŵandu ŵakumjogopa, akukumbucila cilanga* cakwe ndaŵi syosope.

⁶ Ŵalosisye ŵandu ŵakwe macili ga masengo gakwe, pakwapa cilambo ca ŵandu ŵa ngosyo sine.

⁷ Masengo ga makono gawo gali gakulupicika ni gagoloka. Malamusi gawo gosope gali gakulupicika.

⁸ Gakutamilicika mpaka yaka yosope. Ligongo ŵagapelece ni mtima wakulupicika ni ŵagoloka.

⁹ Ŵakulupwisye ŵandu ŵawo, ŵaciŵisile cilanga cawo kuti ciŵe cangamala. Lina lyawo lili lyaliswela ni lyagoloka.

¹⁰ Kwajogopa AMBUJE niko kutanda kwa lunda; ŵakusunga malamusi gakwe akwapa lunda lusyesyene. AMBUJE akwenela kwalumba yaka yosope.