Masalimo 109 - Chiyawo Bible

Kudandawula kwa mundu jwali pa yisawusyo

Kwa jwakwimbisya nyimbo. Salimo ja Daudi.

¹ Ngwalumba ŵalakwe, Mlungu, akatama jii!

² Pakuŵa ŵandu ŵakusakala ni ŵa unami akuŵeceta yakunjimucila une. Akusambecetela ya unami.

³ Papalipose akusambecetela maloŵe gakulambucisya, ni kulimbana ni une pangali kose ligongo.

⁴ Akusinjilila une, nambo une ngusinanonyela, soni ngusinapopelela.

⁵ Myoyo akusambucisya yakusakala m'malo mwa yambone, ni uŵengani m'malo mwa cinonyelo cangu.

⁶ Amsagule mundu jwakusakala kuti amjimbe magambo ga jwakunjimuculajo, Jwelejo ajimbe magambo ni mundu jwakusaŵengana najo.

⁷ Pakumlamula asimanikwe jwakulemwa; mapopelo gakwe gaŵalanjidwe mpela magambo.

⁸ Masiku gakwe gaŵe gamnono; mundu jwine ajigale masengo gakwe,

⁹ ŵanace ŵakwe aŵe ŵamasije; ni msonogwe aŵe jwam'wilwe.

¹⁰ Ŵanace ŵakwe aŵe ŵakwendajenda ni ŵakuŵendaŵenda, ŵatopole m'masame mwakusatama.

¹¹ Mundu juŵamkongwesye jwelejo, amsumule yosope yakwete; acalendo amsumule yisogosi yacitukuta cakwe.

¹² Akasimanikwa jwalijose jwakumtendela canasa, kapena jwakwatendela canasa ŵanace ŵakwe ŵamasije ŵala.

¹³ Yisukulu yakwe yimale kuwa, mena gawo gakapikanika soni ku yisukulu yakuyicisyayo.

¹⁴ AMBUJE* akaliŵalila ungalumbana ŵa acinangolo ŵakwe, akawukululucila ulemwa* wa acikulugwe.

¹⁵ AMBUJE ayikumbucile yakulemwa yawo kwa yaka yosope; aliŵalicice ŵele ŵanduwo pa cilambo capasi.

¹⁶ Pakuŵa mundujo nganakumbucila kutenda canasa, nambo ŵasawisye ŵakulaga, ni ŵangali cakwete, ni ŵakulaga mu mtima mpaka kwawulaga.

¹⁷ Ŵanonyelaga kulwesa, myoyo kulwesa kumyicilile. Ngananonyela kose kwapa upile ŵandu ŵane, myoyo upile uŵe kwakutalikangana najo.

¹⁸ Kwalwesa acimjakwe kwaliji mpela cakuwala cakwe, myoyo malweso gajinjile mcilu mwakwe mpela mesi gakusamwa, gaŵe mpela mawuta gakwinjila m'mawupa mwakwe.

¹⁹ Malweso gaŵe mpela cakuliwunicila, malweso gakamtyoka, gaŵe mpela lamba jwakulitaŵilila najo mciwunu lisiku lili lyose.

²⁰ AMBUJE ŵape cilango amagongo ŵangu mwalitala lyeleli, ŵele ŵakumbecetela yakusakalayi!

²¹ Nambo ŵalakwe AMBUJE Mlungu jwangu, anjinjilicisye ligongo lya lina lyawo; angulupusye ligongo cinonyelo cawo cili cangamala.

²² Pakuŵa une ndili jwakulaga, soni jwangali cilicose, nipo mtima wangu ukumbweteka mnope.

²³ Sigele panandi kusimilila mpela ciwilili ca ligulo, andopwele mpela sombe.

²⁴ Malungo gangu gatengwice ligongo lya kulijima yakulya, cilu cangu cigandile ni mtwe wakwe.

²⁵ Ŵandu pakumbona une akuseka, pakumbona une akupukunya mitwe jawo mwa cipongwe.

²⁶ Angamucisye ŵalakwe AMBUJE Mlungu jwangu, angulupusye ligongo lya cinonyelo cawo cangamala.

²⁷ Amagongo ŵangu amanyilile kuti welewu uli mkono wawo ŵakungulupusya une, kuti ŵalakwe AMBUJE, ni ŵayitesile yeleyi.

²⁸ Jemanjajo alwese une, nambo wawo ambe upile, ŵatesye soni ŵandu ŵakusandanda, nambo une jwakutumicila jwawo sangalale.

²⁹ Ŵakumbecetela yakusakala syatende soni. Soni syawo syaŵijilile mpela cakuwala.

³⁰ Tinjatogolela AMBUJE pakuŵeceta mwakwesya maloŵe; tinjalumba pasikati pa liwunjili lya ŵandu.

³¹ Pakuŵa AMBUJE akusajima ciŵandika ni mundu jwakulaga; akusasosa kuti amkulupusye kwa ŵandu ŵakulamula kuti jwalakwejo awulajidwe.