Masalimo 108 - Chiyawo Bible

Lipopelo lyakuŵenda cikamucisyo pakulimbana ni amagongo

Nyimbo. Salimo ja Daudi.

¹ Ŵalakwe Mlungu mtima wangu ukulupilile, kusyene ukulupilile mtima wangu. Jimukani m'mwe umi wangu!

² Cida cakwimbila ca ngonji ni pangwe, msone. Tinjijimusya lyuŵa ni nyimbo syangu.

³ Tinjatogolela, ŵalakwe AMBUJE,* pasikati pa mitundu ja ŵandu. Tinjijimba nyimbo syakwalumba pasikati pa mitundu ja ŵandu.

⁴ Cinonyelo cawo cangamala cili cacikulungwa, cakuyicila mpaka kwinani, ni kulupicika kwawo kukuyicila kwiwunde.

⁵ Ŵalakwe Mlungu alosye ukulungwa wawo kwinani mnope, lumbili lwawo luŵe pacanya pa cilambo cosope capasi.

⁶ Atukamucisye ni mkono wawo wamlyo, atujanje kuti uwe ŵakunonyelwa ŵawo, tukulupuce.

⁷ Mlungu aŵisile cilanga* ali pa malo gawo gamaswela, kuti, “Tinjimgaŵila cilambo ca Shekemu mwakusengwa, tinjimlembela malile Ciŵata ca Sukoti.

⁸ Giliyadi ali jwangu, Manase ali jwangu; Efelemu ali mpela cisoti cangu cakulicenjela. Yuda ali mpela simbo jangu ja ucimwene.

⁹ Mowabu taciŵa mpela mbale jangu jakunaŵila; Edomu taciŵa pakuliŵatila sapato syangu. Tinjigumila mwakusengwa pitinjapunda ŵandu ŵa ku cilambo ca Filisiti.”

¹⁰ Tacinjigala ŵani ku msinda wawukwete mapupa? Tacimbecesya ŵani ku Edomu?

¹¹ Ana ŵalakwe Mlungu atujasile uweji kwene? Ana ngalongana nawo ŵandu ŵetu ŵa ngondo?

¹² Atukamucisye pakulimbana ni amagongo ŵetu. Pakuŵa cikamucisyo ca mundu cili cangali mate.

¹³ Naga Mlungu akutama ni uwe, tuciputa ngondo mwakulimba mtima, pakuŵa Jwalakwe tacapunda amagongo ŵetu.