Masalimo 106 - Chiyawo Bible

Umbone wa AMBUJE pa ŵandu ŵakwe

¹ Mwalumbe AMBUJE!* Mwatogolele AMBUJE pakuŵa ali ŵambone, pakuŵa cinonyelo cawo cili cangamala.

² Ana ŵani mpaka apakombole kuŵeceta ya masengo gekulungwa gapanganyisye jwalakwejo? Ana ŵani mpaka apakombole kwalumba mwakwanila?

³ Ŵana upile ŵandu ŵele ŵakukuya Malamusi ga AMBUJE, ni ŵakusatenda yakulungama ndaŵi syosope.

⁴ Ŵalakwe AMBUJE, angumbucile pakwasalalila mtima ŵandu ŵawo; angamucisye pakwakulupusya jemanjajo,

⁵ kuti niyiwone yambone ya ŵandu ŵawo ŵiŵasagwile, kuti mbe jwakusengwa ni cisangalalo ca ŵandu ŵawo, kuti mbate lumbili pampepe ni ŵandu ŵawo.

⁶ Uwe pampepe ni acinangolo ŵetu tulemwisye; tutesile yangalumbana, tutesile yakusakala.

⁷ Acinangolo ŵetu piŵaliji mcilambo ca Iguputo, nganasamala ya masengo gawo gakusimonjeka. Nginakumbucila ukulu ŵa cinonyelo cawo cangamala, nambo ŵajimucilile ŵalakwe Mlungu Jwamaciligosope ku Nyasa Jecejewu* kula.

⁸ Nambo ŵakulupwisye ligongo lyakusosa kujisunga mbili jawo, kuti ŵalosye macili gawo gamakulungwa.

⁹ Ŵajilamulile Nyasa Jecejewu nipo jajumilile, ŵalongolele ŵandu ŵawo m'nyasa jakusokoka, ni ŵajesile papajumu.

¹⁰ Myoyo ŵakulupwisye jemanjajo m'makono mwa ŵandu ŵakwaŵenga; ŵakulupwisye jemanjajo ku macili ga amagongo ŵawo.

¹¹ Mesi gatiŵisye amagongo ŵawo wosope nganasigala atamose jumo jose.

¹² Pelepo ŵandu ŵakwe ŵagakulupilile maloŵe ga Mlungu, ni ŵajimbile nyimbo syakumlumba.

¹³ Nambo mwacitemape ŵaliŵalile yiŵatesile jwalakwejo, myoyo nganajembeceya kose kuti apikane yiŵasosile Mlungu kuti jemanjajo ayitende.

¹⁴ Jakwete sala ja yakulya mcipululu mula, myoyo ŵamlinjile Mlungu mcipululumo.

¹⁵ Jwalakwe ŵapele yiŵaŵendile jemanjajo; nambo soni ŵatumicisye yilwele yakogoya pasikati pawo.

¹⁶ Piŵaliji mcipululu mula ŵandu ŵamtendele litima Mose* pampepe ni Aloni,* jwamswela jwakutumicila jwawo AMBUJE.

¹⁷ Litaka lyawugwice ni kum'mila Datani, ni lyasilile liŵasa lya Abilamu.

¹⁸ Moto wakolele soni mwikuga lya ŵandu, lilamba lya moto lyatinisye ŵandu ŵakusakalawo.

¹⁹ Jemanjajo ŵapanganyisye mwanace jwa ng'ombe jwa golidi* ku Sinayi kula, ni ŵacitindiŵalile cimanyisyo ca mwanace jwa ng'ombe jwakunyelenyendulajo.

²⁰ Ŵatindanyisye lumbili lwa Mlungu, ni cimanyisyo ca ng'ombe jele jijikusalya manyasi.

²¹ Ŵamliŵalile Mlungu, Mkulupusyo jwawo, juŵatendele yayikulungwa ku Iguputo,

²² ŵatesiletu kweleko masengo gakusimonjeka! Ŵatesiletu yindu yakogoya ku Nyasa Jecejewu kula!

²³ Ali ni ligongo lyakwe Mlungu ŵasalile kuti akajonasile jemanjajo, pakaŵe pangali Mose mundu jwawo juŵamsagwile kwima pameso pawo, ni kwalekasya kutumbila kwawo Mlungu kuti akasiŵajonanga.

²⁴ Myoyo ŵacikanile cilambo cambone; ligongo nganakulupilila yilanga ya Mlungu.

²⁵ Ŵanyinyilice m'matenti mwawo ni nganagapikanila kose maloŵe ga AMBUJE.

²⁶ Myoyo jwalakwe ŵakwesisye mkono wakwe ni ŵalumbilile ŵanduwo kuti taciwila mcipululu.

²⁷ Ni taciyipwilinganya yisukulu yawo pasikati pa mitundu jine ja ŵandu, ni kuyipwilinganyicisya myilambo yosope.

²⁸ Panyuma pakwe ŵandu ŵa Mlungu ŵatandite kumlambila soni Baala* ku Piyoli, ni kulya nawo mbopesi siŵatagaga kwa ŵandu ŵawe.

²⁹ AMBUJE ŵatumbile ni yitendo yawoyo, kwakuti yilwele yakogoya yagwilile pasikati pawo.

³⁰ Finihasi ŵajimi ni ŵawuleje ŵandu ŵiŵalemwisye, papopo Mlungu ŵayityosisye yilwele yiyawulagaga yila.

³¹ Ni ligongo lyakwe jwalakwejo jwaŵalanjidwe kuti ali jwakulungamika kwa yaka yosope.

³² Ŵanduwo ŵatumbilisye AMBUJE ku mesi ga ku Meliba kula, ni yindu yamsakalile Mose ligongo lya yitendo ya ŵanduwo.

³³ Mose ŵapile mtima pa lyele ligongolyo, ŵaŵecete mwangaganicisya kose.

³⁴ Nganajijonanga mitundu ja ngosyo sine mpela yiŵatite AMBUJE pakwalamulila.

³⁵ Nambo ŵaliwanganyisye ni ngosyo sine sya ŵandu, ni ŵalijiganyisye kutenda yakusakala yiŵayitendaga ŵandu ŵa ngosyo sinesyo.

³⁶ Ŵajitumicile milungu jakupanganya ni yala, jele jaliji mpela ngonji siŵatejele jemanjajo.

³⁷ Ŵapelece ŵanace ŵawo ŵa acalume kuŵa mbopesi, ni ŵanace ŵa acakongwe ku misimu jakusakala.*

³⁸ Ŵasulwisye miasi jangalemwa, miasi ja ŵanace ŵawo ŵacalume ni ŵacakongwe; ŵiŵapelece mbopesi ku milungu jakupanganya ja ku Kenani, cilamboco ŵacisakesye ni ciwa ca ŵanacewo.

³⁹ Myoyo ŵalisakesye mwa yitendo yawo; ni kutama ŵangakulupicika pa yitendo yawo, mpela jwamkongwe jwa cikululu.

⁴⁰ Myoyo kutumbila kwa AMBUJE kwakolele pa ŵandu ŵakwe, ligongo ŵaŵenjile ŵandu ŵakwewo.

⁴¹ Ŵapelece jemanjajo m'makono mwa mitundu jine ja ŵandu; ŵandu ŵaŵaŵenganaga nawo ni ŵiŵaliji mkwalamula.

⁴² Amagongo ŵawo ŵaliji mkwalagasya, ŵaliji pasi pa ulamusi wawo.

⁴³ Ndaŵi syasijinji ŵakulupusyaga, nambo jemanjajo ŵamjimucilaga ŵamasile konasika mtande wa ulemwa* wawo.

⁴⁴ Nambo AMBUJE ŵakamucisye pa yisawusyo, pa ndaŵi jiŵapikene kulila kwawo.

⁴⁵ Ŵacikumbucile cilanga* cawo AMBUJE; ligongo lyakwanonyela ŵanduwo, ŵatulele mtima ligongo lyakukula kwa cinonyelo cawo cangamala.

⁴⁶ AMBUJE ŵajitondweye mitima ja amagongo, ŵiŵakamwile ŵandu ŵakwe ukapolo, kuti ŵatendele canasa ŵandu ŵakwewo.

⁴⁷ Atukulupusye ŵalakwe AMBUJE Mlungu jwetu, ni kutusonganya uwe kutyocela pasikati pa ngosyo sine sya ŵandu, kuti twatogolele pakulikolanga lina lyawo lyeswela kuti tupoceje pakwalumba ŵalakwe.

⁴⁸ Acimbicikwe AMBUJE Mlungu jwa Isalaeli; kutandilila sambano mpaka kwa yaka yosope, ni mundu jwalijose asale kuti, “Elo, yiŵe myoyo!” Mwalumbe AMBUJE!