Masalimo 104 - Chiyawo Bible

Kumlumba Mkupanganya

¹ Ŵalakwe AMBUJE,* ali ŵakulungwa mnope! Ŵalakwe akusawala ucimbicimbi ni ucimwene.

² Akuliwunicila ni lilanguka mpela cakuwala; atambasukwile liwunde mpela tenti.

³ Ataŵile nyumba jawo pa mesi gakwinani. Akusagatenda mawunde kuti gaŵe ligeleta lyawo, akusajenda pa mapapiko ga mbepo.

⁴ Akusajitenda mbungo kuŵa ŵamitenga ŵawo; ni malamba gamoto kuti gaŵe ŵakutumicila ŵawo.

⁵ Ŵalakwe ŵacitamice cilambo capasi pa yilimbilimbi yakwe; kuti cikasicitenganyika.

⁶ Ŵaciwunicile ni nyasa jakusokoka kuŵa mpela cakuwala; mesi gakwesile mpaka pacanya pa matumbi.

⁷ Piŵagajamwice, mesigo gatisile, gatisile citemape pigapikene lisegwe lya kulindima kwawo.

⁸ Gakwesile m'matumbi, gatulucile m'yiŵata, gayice kumalo kuŵagakolocesye.

⁹ Ŵagaŵicile malile mesigo kuti gakapelenganya; kuti gakasigawujila ni kuciwunicila soni cilambo capasi.

¹⁰ Ŵalakwe ŵakukoposya sulo m'yiŵata; sikusajilima pasikati pa matumbi.

¹¹ Nyama syosope sya mwitinji sikumwa mwelemo; mbunda sya mwitinji sikusasimisya njota.

¹² Yijuni yikusataŵa yisusi ciŵandika ni sulosyo, yikusajimba mu nyambi sya yitela.

¹³ Ŵalakwe akusajitilila matumbi ni mesi gakutyocela kumalo gawo ga kwinani. Cilambo capasi cigumbele ni upile wawo.

¹⁴ Ŵalakwe akusamelesya manyasi kuti ng'ombe silye, ni mawukutu kuti mundu alimeje, ni kupata yakulya yakutyocela mwitaka.

¹⁵ Akusapata finyo jwakusangalasya mtima wakwe, mawuta gakupakala kuti cilu cakwe citipitile, ni mkate kuti apate macili.

¹⁶ Yitela ya AMBUJE akuyijitilila ni mesi mwakwanila, mikungusa ja ku Lebanoni jiŵajipandile.

¹⁷ Yijuni yikutaŵa yisusi yakwe mwelemo acikakoŵa akutaŵa yisusi m'mikungusamo.

¹⁸ M'matumbi gamalewu ni mwele musikutama mbusi sya mwitinji; mu mbanga sya maganga ni mwele musikutilila njecele.

¹⁹ Ŵalakwe ŵawupanganyisye mwesi kuti ulekanganye ndaŵi, ni lyuŵa likumanyilila ndaŵi jakwe jakukapila.

²⁰ Akucipanganya cipi ni cikuŵa cilo; ni katema kele yinyama ya mwitinji yikusakopoka.

²¹ Ŵanace ŵa masimba akusatuluma kusosa nyama, kuŵenda cakulya kwa AMBUJE.

²² Palikukopoka lyuŵa, gakusawujilila kujagona mu mbanga mwakwe.

²³ Mundu akusajawula ku masengo gakwe, ni akusaja kamula masengo mpaka ligulo.

²⁴ Ŵalakwe AMBUJE, masengo gawo gali gamajinji, ŵagapanganyisye gosope mwa lunda; ni cilambo capasi cigumbele ni yindu yiŵayipanganyisye.

²⁵ Kwana nyasa jajikulungwa ni jana citando, jajigumbele ni yindu yangaŵalanjika; yindu ya cijumi, yayinandi ni yayikulungwa yose.

²⁶ Mwelemo yikwenda yombo pampepe ni Lefiyatani,* cilombo cila ciŵacipanganyisye kuti cing'andeje mwelemo.

²⁷ Yosope yiŵayipanganyisye yikulola kwa ŵalakwe, kuti ayipe yakulya yakwe mu ndaŵi jakwe.

²⁸ Ŵalakwe pakuyipa, yikupocela kulya, pakutambasukula mkono wawo, akusayijikutisya ni yindu yejinji yambone.

²⁹ Naga akuyisisila ngope jawo, yikusatenda woga ni kwasa mtima. Naga akuyityocesya lipuje yikuwa, ni kuwujila ku luwundu.

³⁰ Pakuyitumicisya lipuje lyawo yikusapanganyikwa, ni akusakolosya soni kusalala kwa cilambo capasi.

³¹ Lumbili lwa AMBUJE luŵe mpaka yaka yosope; AMBUJE asangalale nago masengo gakwe.

³² Jwalakwe akusati mkucilola cilambo capasi cikusatetemela, akusati mkugakwaya matumbi, matumbigo gakusatuka lyosi.

³³ Tinjajimbila AMBUJE umi ŵangu wosope; tinjijimba nyimbo syakumlumba Mlungu jwangu, ndaŵi syosope, pindili ciŵela umi.

³⁴ Mapopelo gangu aganonyele AMBUJE, pakuŵa ngusengwa mwa Jwalakwe.

³⁵ Ŵandu ŵakulemwa ajonasice pa cilambo capasi, ni ŵandu ŵakusakala akawoneka soni, Mwalumbe AMBUJE, m'mwe umi ŵangu, Mwalumbe AMBUJE.