Masalimo 103 - Chiyawo Bible

Ya cinonyelo ca Mlungu

Salimo ja Daudi.

¹ Mtima ŵangu, wacimbicisye AMBUJE,* umi ŵangu wosope ucimbicisye lina lyawo lyaliswela.

² Umi ŵangu, wacimbicisye AMBUJE ni ukaliŵalila yambone yakwe yosope.

³ Ni ŵakumkululucila yakulemwa yenu yosope, ni kumposya yilwele yenu yosope.

⁴ Ni ŵakusawukulupusya umi ŵangu kuti ukawa, akusambweca cinonyelo cawo cangamala ni canasa cawo.

⁵ Ni ŵele ŵakumba yambone ndaŵi syosope sya umi ŵangu, kwakuti ngusakola macili gasambano mpela cijuni cakolanjidwa ngwasi.

⁶ AMBUJE akusalamula mwakulungamika ŵandu wosope ŵakulaga akusiŵatendela yambone.

⁷ Ŵamlosisye Mose* matala gakwe, ni kwalosya Aisilayeli yitendo yakwe.

⁸ AMBUJE ali ŵacanasa ni ŵambone mtima, ŵangatumbila citema ni cinonyelo cawo cangamala cili cacikulungwa.

⁹ Pakutukalipila, ngasaŵa citumbilile mpaka yaka yosope.

¹⁰ Ngakutupa cilango mwakulingana ni yakulemwa yetu, kapena kutuwucisya malinga ni yakulemwa yetu.

¹¹ Mpela kwinani kukutalikangana ni cilambo capasi, myoyo cinonyelo cawo cangamala cili cacikulungwa kwa ŵele ŵakwajogopa AMBUJE.

¹² Mpela kungopoko lyuŵa kukutalikangana ni kungapilo lyuŵa, myoyo akusatyosya yakulemwa yetu kuti yiŵe kwakutalikangana ni uwe.

¹³ Mpela baba akwatendela ŵanace ŵakwe canasa, myoyo AMBUJE akusiŵatendela canasa ŵandu ŵakumcimbicisya.

¹⁴ Pakuŵa akusamanyilila yiŵatite pakutupanganya, akusakumbucila kuti uwe tuli luwundu.

¹⁵ Kuŵeceta ya mundu, masiku gakwe gangatamilisya gali mpela manyasi. Mundujo akusasengwa mpela liluŵa lya mwitinji;

¹⁶ pakuŵa naga mbepo jikupuga liluŵalyo likusaŵa pangali, ngalikusawoneka soni pamalo pakwe.

¹⁷ Nambo cinonyelo ca AMBUJE cili cangamala kwa ŵandu ŵakusamjogopa, ni yisukulu yawo yosope akusayitendela yagoloka,

¹⁸ ŵandu ŵakwe ni ŵele ŵakusunga cilanga cakwe ni ŵakusakumbucila kusunga malamusi gakwe.

¹⁹ AMBUJE aciŵisile citengu cawo ca ucimwene kwiwunde; ni akusalamulila yosope mu ucimwene wawo.

²⁰ Mwalumbe AMBUJE, jemanja malayika gakwe gamacili, ŵimkusapikana maloŵe gakwe ni kutenda yele yakusamlamula.

²¹ Mwalumbe AMBUJE, jemanja ŵa ngondo ŵakwe, ni soni jemanja ŵakutumicila ŵakwe ŵimkusatenda lisosa lyakwe.

²² Yosope yiŵayipanganyisye, yalumbe AMBUJE, yayili pa malo gosope ga ucimwene wakwe. Umi ŵangu, ŵalumbe AMBUJE.