Masalimo 102 - Chiyawo Bible

Lipopelo lya mcanda jwali pa yisawusyo

Lipopelo lya mundu jwali pa yisawusyo jwakudandawula kwa AMBUJE.

¹ Ŵalakwe AMBUJE,* apikane lipopelo lyangu; kulila kwangu kuyicile kwa ŵalakwe.

² Akasisa ngope jawo pa ndaŵi jindili pa yisawusyo yangu, akasisila ngope jawo! Ambikane, Anjanje mwacitema pa ndaŵi jingwaŵilanga.

³ Pakuŵa masiku gangu gakwamba kupita mpela lyosi, ni cilu cangu cikukolela moto mpela wa ndukutila.

⁴ Mtima ŵangu awuputile nipo unyasile mpela manyasi gejumu, atamose cilakolako cakulya nganingola.

⁵ Ngandile mpela mundu jwakulwala citopa, ligongo lya kuwuwula kwangu ndaŵi syosope.

⁶ Une ndili mpela cijuni ca mcipululu, mpela linjici lya m'masame.

⁷ Ngusagona nambo ngalupata lugono ndili mpela cijuni cacili jikape penani pa msakasa.

⁸ Amagongo ŵangu akumbecetela ya cipongwe masiku gosope, wosope ŵakunjembulusya akusalikolanga lina lyangu ni kulilwesa.

⁹ Pakuŵa ngusalya liwu mpela cakulya, ni cakumwa cangu cikusawanganyicilana ni misosi.

¹⁰ Ligongo lya kutumbila kwawo ni ukali wawo, pakuŵa ŵalakwe anyakwile ni kunjasa.

¹¹ Masiku gangu gali ciŵandika kumala, mpela mbwilili wa ndaŵi jegulo, nipo nyasile mpela manyasi.

¹² Nambo ŵalakwe, AMBUJE akusatama pa citengu cawo ca ucimwene kwa yaka yosope; yisukulu yosope tiyicakumbucila.

¹³ Ŵalakwe tacijimuka, ni kuwutendela canasa msinda wa Siyoni;* kusyene ndaŵi jakuwutendela canasa jiyice.

¹⁴ Pakuŵa ŵandu ŵa ŵalakwe akusawunonyela msindawo, atamose kuti ujonasice ni kuŵa masame.

¹⁵ Ngosyo sya ŵandu tacilijogopa lina lyawo AMBUJE, ni ayimwene wosope ŵa cilambo capasi tacilujogopa lumbili lwawo.

¹⁶ AMBUJE tacitaŵa soni Siyoni, taciwonecela mlumbili lwakwe.

¹⁷ Tacijanga lipopelo lya ŵandu ŵakwe ŵakwasika ni ngasakunyosya kuŵenda kwawo.

¹⁸ Yeleyi ayilembe ligongo lya yisukulu ya msogolo, kuti ŵandu ŵele ŵimkinapagwe mpaka sambano jino, nombe nawo tiŵalumbe AMBUJE.

¹⁹ Jwalakwe ŵalolite pasi kutyocela ku malo gakwe gamaswela kwinani, ali kwinaniko, AMBUJE ŵalolite pa cilambo capasi.

²⁰ Kuti apikane kuwuwula kwa ŵandu ŵali mu ukayidi, ni kwakulupusya ŵandu ŵiŵalamwilwe kuti awulajidwe.

²¹ Kuti ŵele ŵanduwo alalicile lina lya AMBUJE mu msinda wa Siyoni, ni tacimlumba mu Yelusalemu.

²² Pitacisongana pampepe mitundu ja ŵandu ni ayimwene, kuti ampopele AMBUJE.

²³ AMBUJE atemangwile macili gangu mkaningule, aganondiye masiku gangu.

²⁴ Natite, “Mlungu jwangu akandyosya ndaŵi ajino mkaninjekulupe, ŵalakwe AMBUJE ŵali yaka yawo yangamala kwa yaka yosope.”

²⁵ Ŵalakwe ŵayiŵisile kala yilimbilimbi ya cilambo capasi; nombe ya kwinani ŵayipanganyisye ni makono gawo.

²⁶ Yosopeyi tiyicimala, nambo ŵalakwe taciŵa ciŵelape, wosope taciwisala mpela yakuwala. Ŵalakwe akusayigalawusya mpela cakuwala, ni yikusamala.

²⁷ Nambo ŵalakwe ali mwaŵelele pemo, ni yaka yawo yangali mbesi.

²⁸ Ŵanace ŵa ŵakutumicila ŵawo taciŵa pa mtendele, ni yisukulu yawo tiyicitamilicika pameso pawo.