Masalimo 101 - Chiyawo Bible

Cilanga ca mwenye

Salimo ja Daudi.

¹ Tinjijimba nyimbo sya kulupicika ni sya kulungamika; tinjajimbila ŵalakwe AMBUJE.*

² Tinjikuya litala lyangali ulemwa.* Nambi taciyika cakaci kwa une? Tinjitama m'Nyumba mwangu ni mtima wakulupicika.

³ Ngasindola kose cindu cakusakala pameso pangu. Ngusaŵengana ni yitendo ya ŵandu ŵakwaleka ŵalakwe, ngayikunonyela kose.

⁴ Tinjitama kwakutalikangana ni ŵandu ŵa mtima wakusakala. Ngisingunda kutenda cakusakala cilicose.

⁵ Mundu jwakusongona yacabe ya mjakwe pacisyepela tinjimjonanga. Mundu jwakupoka ni jwakulikwesya ngisinimkululucila.

⁶ Ŵandu ŵakulupicika ŵa cilambo tinjasalalila mtima, ni tacitama pampepe ni une. Jwele jwakwenda mwitala mwangali cakulemwa tacindumicila.

⁷ Pangali mundu jwakuŵeceta ya kunyenga jutacitama m'Nyumba jangu; pangali mundu jwakuŵeceta ya unami jutacitama ciŵandika ni une.

⁸ Lisiku ni lisiku tinjajonanga ŵakusakala wosope ŵa mcilambo. Tinjatyosya mu msinda ŵa AMBUJE wosope ŵakutenda yakusakala.