Masalimo 100 - Chiyawo Bible

Nyimbo ja Malumbo

Salimo jakutogolela.

¹ Mwajimbile AMBUJE* mwakusengwa, jemanja yilambo yosope.

² Mwatumicile AMBUJE mwakusangalala, myice pameso pakwe mcimjimbaga mwakusengwa.

³ M'manyilile kuti AMBUJE ali AMBUJE, ni ŵiŵatupanganyisye, uwe tuli ŵakwe, tuli ŵandu ŵakwe ni ngondolo sya palulila pakwe.

⁴ Jinjilani ku yipata yakwe mli mkutogolela, mjinjile m'Nyumba jakwe ni malumbo, mumtogolele AMBUJE ni kulicimbicisya lina lyakwe.

⁵ Pakuŵa AMBUJE ali ŵambone; cinonyelo cakwe cili cangamala, kulupicika kwakwe kuli kwa yaka yosope.