Masalimo 10 - Chiyawo Bible

Lipopelo lyakuŵenda kulungamika

¹ Ligongo cici akwima kwakutalikangana ni uwe, ŵalakwe AMBUJE?* Ligongo cici akulisisa pa ndaŵi jele jituli m'yisawusyo?

² Ŵandu ŵakusakala akusiŵalagasya ŵandu ŵakulaga mwakulikwesya, ŵatanjisye mu ngonji siŵalitejele acimsyenepewo.

³ Pakuŵa mundu jwakusakala akulitwanjila lisosa lya umi wakwe, ni mundu jwakucinonyela cipanje, akusanyosya ni kwakana AMBUJE.

⁴ Mundu jwakusakala jwangasamalila kose ya AMBUJE; ligongo lyakutwanga kwakwe. Mu mtima mwakwe akusatiji, “Kwangali Mlungu.”

⁵ Mundu jwakusakala yindu yikusamjendela cenene ndaŵi syosope. Ngakusakupikanicisya kulamula kwa Mlungu, akusiŵacembulusya amagongo ŵakwe wosope.

⁶ Jwalakwe akusaganisya mu mtima mwakwe acitiji, “Une ngapagwa patinjilepela; ngisiyikomboleka kose une kuŵa m'yisawusyo.”

⁷ Ciŵeceto cakwe cigumbele ni malweso, kulambusya ni kogoya; jwakwanguya kuŵeceta ya utindani ni maloŵe gakusakala,

⁸ akusatama acijuŵililaga m'misi, kulindilila kwawulaga ŵandu ŵangalemwa, akumsisila jwakumwulagajo ngope jakwe.

⁹ Akusiŵajuŵilila ŵandu ŵakulaga pacisyepela mpela lisimba, akwatanjisya jemanjajo acawutaga mu lwawu lwakwe.

¹⁰ Akwacanyanda ni kwatitimisya ŵandu ŵimkanakola upile, ni macili gawo akwagwicisya pasi.

¹¹ Mundu jwakusakala akuganisya mu mtima mwakwe kuti, “Mlungu aliŵalile, asisinile meso gakwe ni ngasayiwona yeleyi.”

¹² Ajimuce, Ŵalakwe AMBUJE, Ŵalakwe Mlungu anyakule mkono wawo, akaliŵalila ŵali m'yisawusyo.

¹³ Ligongo cici mundu jwakusakala akunyosya Mlungu, aciliŵecetelaga msyene kuti, “Ŵalakwe ngasamba kose une cilango.”

¹⁴ Nambo Ŵalakwe, akusalolecesya yisawusyo ni yipwetesi, nipo ŵalakwe akupakombola kwakamucisya ŵakusingalilwa ŵakulipeleka kwa ŵalakwe. Ŵalakwe akusiŵakamucisyaga ŵamasije ndaŵi syosope.

¹⁵ Atemangulanye macili ga ŵakusakala, ni ŵasosesose ŵangalumbana wosope, mpaka akasimanikwa soni.

¹⁶ AMBUJE ali mwenye kwa yaka yosope, ŵandu ŵakulambila milungu jine ngasawoneka mcilambo mwakwe.

¹⁷ Ŵalakwe, AMBUJE akusapikana yakwaŵenda ŵandu ŵakulitulusya; ŵalakwe tiŵalimbisye mitima jawo, ni tacatejela lipikanilo.

¹⁸ Ŵalakwe tacipikana kulila kwa ŵakulaga ni ŵawina; pakulamula taciŵa kumbali jawo kuti ŵandu ŵali pa cilambo pano akapakombola soni kwajogopa.