Malilo 3 - Chiyawo Bible

Cilango, kupitikuka mtima ni cembeceyo

¹ Une ndili jumo jungumanyilila yindu yakumtendesya kuti, mundu apocelele cilango kutyocela kwa Mlungu.

² Ŵanjendesye ni kumbika mcipi cakogoya.

³ Ni ŵandimbaga mwakutotoganya mwangali canasa.

⁴ Ŵambulesye cilu cosope ni kasanya mawupa gangu.

⁵ Ŵambisile mu ukayidi wa kulaga ni yisawusyo.

⁶ Ŵanganganicisye kutama mcipi cangamala mpela mundu juŵawile kalakala.

⁷ Andaŵile ni ma unyolo, mwakuti ndili mkayidi jwangali cembeceyo camti mpaka kutila.

⁸ Nalisile mwakwesya maloŵe kuti angamucisye, nambo Mlungu ŵakanile kumbikanila.

⁹ Ngupepeluka pa ndaŵi jingwenda, soni mapupa ga maganga gacinjile kulikose kutingalawucile.

¹⁰ Mlungu ŵanjuŵilile mpela cimbalangondo, ni ŵangulucile mwamacili mpela lisimba.

¹¹ Ŵandopwele mwitala, ni ŵanjekilecekile ni kundeka.

¹² Ŵawutile ukunje wakwe, ni kundenda kuŵa cindu cakutendela candamale.

¹³ Ŵasomile ni mpamba wakwe pa cilu cangu.

¹⁴ Ŵandu akuseka une lisiku lyosope; mbele cakusecesya ca jemanjajo.

¹⁵ Ŵambele yindu yakuŵaŵa kuti yiŵe yakulya ni yakumwa yangu.

¹⁶ Ŵangalagasisye mluwundu ni kungula meno ni tumaganga.

¹⁷ Mu mtima mwangu mwangali mtendele, kusengwa ni nakuliŵalile kala.

¹⁸ Ngindama ndaŵi jajilewu; ligongo cikulupi cangu cosope mwa AMBUJE* cimasile.

¹⁹ Ngusakumbucila yisawusyo yangu, soni kuŵa jwangali pakutama, yili mpela yakumwa ya ululu mnope.

²⁰ Ndaŵi syosope ngambaganicisyape yeleyi, ni ligongo lyakwe njasile mtima.

²¹ Nambo cipali cine cingusakumbucila, celeco ni cikusacilimbisya mtima.

²² Cinonyelo cangacenga ca AMBUJE cangamala ni canasa cakwe soni cangamala ni ligongo lyakwe nganitumala.

²³ Kundaŵi kulikose yacanasayo yawonekaga kuti yili yasambano ligongo AMBUJE ni ŵakulupicika mnope.

²⁴ AMBUJE ali yangu yosope, mwamti ngusinakulupilila ŵalakwewo.

²⁵ AMBUJE ali ŵambone kwa ŵaliwose ŵakusiŵakulupilila ŵalakwewo,

²⁶ Ni kwambone kwembecela mwakupimilila kuti AMBUJE atukulupusye.

²⁷ Nipo kuli kwambone kulijiganya kupimilila kweleku tuli ŵa cinyamata.

²⁸ Katema katutuŵeje m'yisawusyo, tutameje mwakupimilila soni ngatenda lisegwe.

²⁹ Tugwisyeje ngope syetu pasi kulosya kupikanila, kuti mwine mwakwe cikulupico ciŵe caciŵela.

³⁰ Atamose kuputidwa kapena kunyosyedwa, uwe tuyikunde yosopeyo.

³¹ AMBUJE ali ŵacanasa nipo ngaŵa mkutujasa mpaka kalakala.

³² Mpaka atupe cilango mwa ngalwe, nambo cinonyelo cakwe kwetuwe cili cejinji soni cakulimbangana.

³³ AMBUJE ŵangasangalala ali mkutupa yipwetesi kapena canasa.

³⁴ AMBUJE akumanyilila ndaŵi jikusapondedwa misimu jetu mu ukayidi.

³⁵ Akusamanyilila ndaŵi jakusatupondelesya mtendele uŵatupele uwe;

³⁶ AMBUJE akumanyilila, ndaŵi jele cilungamo ngacikukuyidwa pa nganya.

³⁷ Ndaŵi syosope lisosa lya AMBUJE likusatendekwa.

³⁸ Paja yambone ni yakusakala yosope yikusatyocela kwa Jwakwinani Mnope.

³⁹ Ligongo cici tukudandawula ndaŵi jitukupocela cilango ligongo lya ulemwa* wetu?

⁴⁰ Kwende tulole ndamo syetu nipo tuwujile kwa AMBUJE.

⁴¹ Kwende tuwugule mitima jetu ni kwesya magasa getu kwa Mlungu kwinani ni kupopela.

⁴² “Uwe twalemwisye ni kwajimucila, ni ŵalakwe AMBUJE nganatukululucila.

⁴³ “Lutumbilo lwawo lwalolecelwe, pa ndaŵi jiŵatutopolaga ni kutuwulaga mwangatutendela canasa.

⁴⁴ Ŵalakwe alisisile m'mawunde gakandapala kwele mapopelo getu ngaŵamkomboleka kwika.

⁴⁵ Atutesile uwe kuŵa ŵangasosekwa mpela liwunjili lya yiswani ku cilambo cosope capasi.

⁴⁶ “Amagongo ŵetu akututesya soni ni kutunyosya.

⁴⁷ Tuli muconasiko ni m'masame; soni tukutama mu yakogoya ni woga.

⁴⁸ M'meso mwangu mugamba kujilima misosi ligongo lya conasiko ca ŵandu ŵangu.

⁴⁹ “Misosi jangu tijicijilimaga mwangalecesya mpela lusulo

⁵⁰ mpaka AMBUJE talole pasi pano kutyocela kwinani ni kutuwona uwe mutukulajila.

⁵¹ Mtima wangu ukupweteka panguyiwona yayikwatendecela acakongwe wa mu msinda wangu.

⁵² “Mbele ndili mkusakulidwa mpela cijuni ni amagongo ŵangu ŵakuŵenga une atamose nganinalemwecesya.

⁵³ Ŵambonyisye mwisimbo ndili cijumi, ni kumbonyaga tumaganga ndili mwelemo.

⁵⁴ Mesi gatandite kundiŵisya, ni naganisyaga kuti ciwa cili pakuŵandika.

⁵⁵ “Nalumbile ŵalakwe AMBUJE, une ndili mwisimbo lyakusokoka,

⁵⁶ Ndaŵi jinaŵendile ŵalakwe kuti apikane kulila kwangu, ŵalakwe ŵambikanile.

⁵⁷ Ŵalakwe ŵajanjile ni kusalila une kuti ngakola woga.

⁵⁸ “Ŵalakwe AMBUJE ŵawombwele une, ni kusunga umi wangu.

⁵⁹ Alamule mwakusangalasya mbali jangu, paja akumanyilila yangalumbana yiŵandendele ŵandu une.

⁶⁰ Ŵalakwe akumanyilila mwakumbecetela amagongo ŵangu ni mwele mwakundendela yiswamba.

⁶¹ “Ŵalakwe AMBUJE ŵapikene jemanjajo ali mkunyosya une nipo soni yiswamba yiŵalinganyicisye kuti andendele.

⁶² Lisiku lyosope akusaŵa ali mkuŵeceta ya une ni kumbanganilaga.

⁶³ Kutandila kundaŵi mpaka cilo, jemanjajo ŵagambaga kunjimba nyimbo.

⁶⁴ “Ŵalakwe AMBUJE, ŵape cilango jemanjaji ligongo lya yindu yiŵatesile.

⁶⁵ Ŵalwese jemanjaji kuti alajeje!

⁶⁶ Ŵalakwe AMBUJE, ŵatopole jemanjaji mwa ukali, nipo ŵajonanje kuti akawoneka pa cilambo capasi cino!”