Malilo 1 - Chiyawo Bible

Canasa ca Yelusalemu

¹ Ha! Msinda wa Yelusalemu uli jikajikape, nambo kalakala wagumbele ŵandu! Kala msindawu waliji wakupikanika pa cilambo cosope capasi, nambo lelo uŵele mpela jwamkongwe jwamasije. Waliji msinda wakupikanika kupunda misinda jine josope, nambo sambano uli msinda wacikapolo.

² Ugamba kulila cilo cosope, misosi jigamba kujilima m'majeje mwakwe. Mwa wosope uŵawunonyelaga msindawu, pangali atamose jumo juŵasigele kuti awumyalasyeje. Acimjakwe wosope ŵampelece kwa amagongo ŵakwe nipo wosopewo sambano aŵele amagongo ŵakwe.

³ Ŵandu wa ku Yuda apite ku ukapolo kukulaga, ni kuja kamula masengo. Akutama ku yilambo yine, ni kusoŵa malo gakupumulila. Ŵasyungulilidwe ni amagongo, ni ŵasoŵile pakutilila.

⁴ Pangali jwalijose juŵayice ku Nyumba ja AMBUJE* kupopela masiku gakusangalala. Ŵali ŵiŵajimbaga kweleko ŵalesile, ni ŵakutaga mbopesi agamba kudandawula. Yipata ya msinda yosope yili mbee, Siyoni* ali mu yisawusyo.

⁵ Amagongo ŵakwe ŵapundile; nipo akwete ulamusi pa jemanjajo. Pakuti AMBUJE ŵapele yisawusyo ligongo lya ulemwa* wejinji wa ŵandu ŵakwe; Ŵanace ŵakwe akamwilwe, nipo ajigelwe kuja ku ukapolo.

⁶ Ucimbicimbi wosope wa Yelusalemu wamasile. Ŵakulamula ŵakwe ŵaŵele mpela ngolombwe syangali macili ligongo lya sala, Ŵatilaga ali ŵangali macili pa ndaŵi jiŵayice amagongo ŵakwe.

⁷ Pa masiku ga yisawusyo ni kulaga kwakwe, ŵandu ŵa mu Yelusalemu akusakumbucila yambone yakwe yosope yiŵakwete kala. Pandaŵi jele ŵandu ŵakwe ŵaliji m'myala mwa amagongo ŵakwe, paliji pangali atamose jumo jwakwakamucisya. Amagongo ŵakwe ŵamsekaga jwalakwe ligongo lya kugwa kwakwe.

⁸ Ŵandu ŵa mu Yelusalemu ŵalemwisye mnope, mwamti aŵele ŵakunyalaya. Wosope ŵele ŵaŵamcimbicisyaga, akumnyosya sambano, ligongo lyakuti agaweni makonope gakwe. Jwalakwe agamba gumila nipo akulola kumbali.

⁹ Usakwa wakwe wawonecele mwangasawusya, nambo jwalakwe nganalosya kudandawula ni yakumgwila kusogolo. Kugwa kwakwe kwaliji kwakogoya; mwamti paliji pangali jwalijose jwakumtulasya mtima wakwe. Amagongo ŵakwe apundile, nipo jwalakwe agamba kulilila AMBUJE kuti ŵatendele canasa.

¹⁰ Amagongo ŵakwe ŵamsumwile cipanje cakwe cosope. Ŵaweni jemanjajo alimkwinjila m'Nyumba ja AMBUJE, jiŵalekasisye AMBUJEWO ŵandu ŵa mitundu jine* kwinjila.

¹¹ Ŵandu ŵakwe ŵagumilaga katema kiŵasosaga yindu yakulya kuti alye. Ŵatindanyaga cipanje cawo ni yakulya kuti aŵe ni umi. Ŵanduwo ŵalisile acitiji, “Mundole une, AMBUJE, alole mwele mungulajila.”

¹² Agamba kwalilila ŵaliwose ŵakupita mwitala acitiji, “Andole une! Pangali atamose mundu jumo juŵasimene ni yipwetesi mpela une. Yipwetesi yiŵambele AMBUJE une ndaŵi ja sala jila.

¹³ “Ŵatumisye moto kutyocela kwinani, ni wanjocile mkati mwangu. Ŵambicile lwawu kuti ndanjile ni nagwile pasi. Kaneko ŵandesile ndili mkupikana kupweteka.

¹⁴ “Ŵajigele yakulemwa yangu ni kuyitaŵa pampepe, ni ŵayikolece pa lukosi lwangu, ni napesile ligongo lya usito wakwe. AMBUJE ŵambelece kwa amagongo ŵangu, nipo nasoŵile yakwatenda jemanjajo.

¹⁵ “AMBUJE ŵapwilingenye asilikali ŵangu wosope ŵamacili; Ŵatumisye likuga lya asilikali kuti lijonanje acacanda ŵangu. AMBUJE ŵajonasile ŵandu ŵangu mpela mwakusatendela pakuminya mpeleya mucakuminyila cakwe.

¹⁶ “Ni ligongo lyakwe m'meso mwangu mugamba kujilima misosi. Pangali mundu jwampaka ambembece une; pangali jwampaka alimbisye une mtima. Amagongo ambundile une, ni ŵandu ŵangu ŵangali cilicose casigele naco.

¹⁷ “Siyoni akwesisye makono, nambo pangali atamose jumo jwakungamucisya une. AMBUJE ŵalamwile acanasi ŵa Yakobo* kuti aŵe amagongo ŵakwe. Yelusalemu ŵaŵele cindu cakunyalaya pasikati pawo.

¹⁸ “Pelepo AMBUJE apakombwele, ligongo une ngininampikanila jwalakwejo. Apikane jemanja, ŵandu ŵa mitundu jine; alole kulaga kwangu. Acacanda ni ŵali ŵangu apite ku ukapolo.

¹⁹ “Naŵilasile acimjangu, nambo nombe nawo ŵakanile kungamucisya une. Ŵakutaga mbopesi ni ŵakulamula ŵawile m'misewu ja mu msindamo, pa ndaŵi jiŵasosagasosaga yakulya kuti aŵe ni umi.

²⁰ “Alole ŵalakwe AMBUJE mwele mungulajila mu mtima mwangu! Mtima wangu ukudandawula ni canasa ligongo lya ulemwa wangu. M'misewu ŵandu agamba kuwulajidwa ni mawupanga; m'nyumba soni mwana ciwa.

²¹ “Ŵandu akumbikana munguwuwulila; nambo pangali atamose mundu jwakundulasya une. Amagongo ŵangu wosope asangalele kuti ŵalakwe ŵambele yisawusyo. Ayice nalyo lisiku liŵatendele cilanga* lila; nombe nawo talaje mpela mungulajila une.

²² “Ŵajimbe magambo ni masengo gawo gosope gakusakala; Ŵape cilango jemanjajo mpela muŵambelele une ligongo lya ulemwa wangu. Nguwuwula mnope, nipo mtima wangu wangali macili.”