Maliko 9 - Chiyawo Bible

¹ Yesu* ŵasalile soni kuti, “Kusyene ngumsalicisya jemanja kuti apali ŵandu ŵane panopano ŵele ngasawa mkinawuwone Ucimwene wa Mlungu* uli uyice ni macili.”

Kugalawuka kwa ngope ja Yesu petumbi

² Gali gapite masiku msano ni limo Yesu ŵamjigele Petulo,* Yakobo* ni Yohane* ni ŵalongolele kumalo kwine kwangapitapita ŵandu kwitumbi lyelewu, kumalo kwa jika. Kweleko uwonece wa ngope ja Yesu wasindile jemanja jila ali mkulola.

³ Yakuwala yakwe yaliji yakunyesimila soni yeswela kuti mbee, kuyipunda mwele m'misili jwine jwalijose mwakaswejecesye nguwo pasi pano.

⁴ Ŵakulijiganya* ŵatatu ŵala ŵam'weni Mose* ni Eliya* ali mkuŵecetana ni Yesu.

⁵ Petulo ŵamsalile Yesu kuti, “Cemwalimu, yili cenene kuti uweji tuli nawo apano. Atukunde kuti tutaŵe yisakasa yitatu, cimo ca ŵalakwe, cimo ca Mose ni cine ca Eliya.”

⁶ Ŵaŵecete myoyo ligongo lyakusoŵa yakuŵeceta, pakuŵa jwalakweju pamo ni acimjakwe ŵala ŵaliji ali akamwilwe ni woga wekulungwa.

⁷ Ni lyayice liwunde, ni lyawunicile, ni mwele mwiwundemo mwapikanice maloŵe gakuti, “Aju ni mwanangu jungusamnonyela, mumpikanileje!”

⁸ Mwacisisimucisya ŵakulijiganya ŵala pakulolecesyalolecesya, ŵalolite kuti pangali soni jwine juŵaliji najo pa malo pala, nambo Yesu jikape.

⁹ Pa ndaŵi jiŵatulukaga mwitumbi mula ŵasalile ŵakulijiganya ŵala kuti akaja kumsalila jwalijose yiŵayiweni yila, mpaka Mwanace jwa Mundu* ali ajimwice ku ŵawe.

¹⁰ Jemanjajo kweli ŵasunjile asili jeleji, nambo ŵaliji mkuwusyana acimsyenepe kuti, “Ana kwimuka ku ŵawe kwakukukolanga Yesuju ni kuti cici?”

¹¹ Myoyo ŵamwusisye Yesu kuti, “Nambi ligongo cici aciŵalimu ŵa Malamusi* akusatiga kuti Eliya akwenela kutanda kwika?”

¹² Yesu ŵajanjile kuti, “Yakuwona Eliya tacilongola kaje kwika, kuti takolosye soni yosope. Nambo ligongo cici Malemba ga Mlungu gakusala kuti, Mwanace jwa Mundu tacijenela kulaga mnope ni kukanidwa?

¹³ Une ngumsalila kuti Eliya ŵayice nambo ŵandu ŵamtesile jwalakwe yosope yiŵayisakaga jemanjajo, mpela muyalembedwele m'Malemba yakwamba jwalakwe.”

Yesu akumposya mcanda jwamkamulwe ni msimu wakusakala

¹⁴ Yesu ni ŵakulijiganya ŵatatu ŵala piŵawujile kuŵaliji ŵakulijiganya ŵane ŵala, ŵalisimene likuga lyekulungwa lya ŵandu lili lyasyungulile. Aciŵalimu ŵa malamusi ali mkusisyana ni ŵakulijiganyawo.

¹⁵ Pa ndaŵi jele ŵandu wosope ŵam'weni Yesu ŵasimonjile kwejinji, ŵamwutucile kuja kumkomasya.

¹⁶ Jwalakwe ŵawusisye kuti, “Ana mkusisyana nawo ya cici?”

¹⁷ Jumo jwa ŵanduwo ŵajanjile kuti, “Cemwalimu une nayice akuno ni mwanangu jwamlume kuti nampelece kwa ŵalakwe ligongo msimu wakusakala wajinjile mwa jwalakweju ni kumlekasya kuŵeceta.

¹⁸ Ukusati naga uli ugundice kumkamula, ukusamgwicisya pasi, mwanacejo akusagamba kopoka ciwulo kukamwa kuti tututu, mpaka cilu kumula kuti cwa! Ni naŵendileje ŵakulijiganya ŵawoŵa kuti awukoposye, nambo alepele.”

¹⁹ Papopo Yesu ŵatite kuti, “Aa! Ŵandu ŵa mpago awuno ŵangali cikulupi! Ana ngwenela kutama ni jemanja mpaka cakaci? Ngwenela kumpikanila mpaka cakaci? Myice najo akuno mwanacejo.”

²⁰ Myoyo ŵayice najo kwa Yesujo. Nipo msimu wakusakala ula piŵam'weni Yesu ndaŵi jijojo watandite kumsyungusya mwamacili mcanda jula, mpaka jwagwile pasi, ni jwagambaga galagata ciwulo cili tututu kukamwa.

²¹ Yesu ŵawusisye babagwe kuti, “Ana yeleyi yamtandite cakaci?” Babagwe ŵala ŵajanjile kuti, “Yamtandite ali likandi.

²² Msimu welewu uŵele uli kumgwisya kaŵilikaŵili, mwine ŵaliji mkugwila pamoto, mwine m'mesi, ŵasakaga kumwulaga. Nambo naga ŵalakwe akupakombola kumposya, atukamucisye.”

²³ Yesu ŵawusisye kuti, “Ana ligongo cici mkuti, ‘Naga yikomboleka.’ Yindu yosope yikusakomboleka kwa mundu jwakwete cikulupi.”

²⁴ Papopo babagwe mwanace jula ŵaŵecete mwakwesya maloŵe kuti, “Ngukulupilila, nambo panandi. Angamucisye kuti ngulupilile kusyesyene.”

²⁵ Yesu piŵalolite kuti likuga lya ŵandu lila litandite kukanganikana pa malo pala, ŵawulamwile msimu wakusakala ula, ŵatite kuti, “M'mwe msimu wakulekasya kuŵeceta ni kupikana, ngumlamula kuti mkopoce mwa mwanaceju ni mkasimjinjila soni mwa jwalakweju.”

²⁶ Msimuwo ŵagumisile ni wamsyungwisye mwamacili mwanace jula, kaneko ni wakopwece. Mwanacejo ŵagambile kuti sii mpela kuti awile, mwakuti ŵandu ŵajinji ŵatite kuti, “Basi amalicice kuwa.”

²⁷ Nambo Yesu ŵamkamwile pa mkono ni ŵamjimwisye, mwanacejo ni ŵajimi.

²⁸ Yesu ali ajinjile m'nyumba, ŵakulijiganya ŵakwe ŵamwusisye kuti, “Ana uweji twalepele uli kuwukoposya msimu wakusakala ula?”

²⁹ Yesu ŵajanjile kuti, “Msimu wa mtundu welewu akaŵe mli mlongwele kupopela ni mpaka mkombole kuwukoposya.”

Yesu akusala ya kuwa ni kwimuka soni ku ŵawe

³⁰ Ali atyosile kweleko, Yesu ni ŵakulijiganya ŵakwe ŵaliji mkwenda kukatanya cilambo ca Galileya. Nambo jwalakwe nganasosa kuti mundu jwalijose akumanyilile kuŵaliji,

³¹ ligongo ŵaliji mkwajiganya ŵakulijiganya ŵakwe. Ŵaliji mkwasalila kuti, “Mwanace jwa Mundu tacipelecedwa myala mwa ŵandu kuti amwulaje. Nambo pitakamwulajepo, jwalakwejo tacijimuka ku ŵawe gali gapite masiku gatatu.”

³² Ŵakulijiganya ŵakwe nganagapikanicisya maloŵe gelega, nambo ŵajogopaga kumwusya.

Jwamkulungwa nduni?

³³ Yesu ni ŵakulijiganya ŵakwe ŵayice ku Kapelenaumu. Ali ajinjile m'nyumba, Yesu ŵawusisye ŵakulijiganya ŵakwewo kuti, “Ana mwaliji mkusisyana cici petala pala?”

³⁴ Nambo ŵakulijiganya ŵala ŵagambile kuŵa kakasi, kusoŵa yakwanga. Pakuti mwitala ŵaliji kusisyana kuti ŵakulungwa ŵani pasikati pawo.

³⁵ Yesu ŵatemi pasi ni ŵaŵilasile ŵakulijiganya likumi ni ŵaŵili ŵala. Ni ŵasalile kuti, “Naga jwine akusosa kuŵa jwamkulungwa kwa wosope akwenela kulinandiya msyene, soni aŵe jwakutumicila wosope.”

³⁶ Ni ŵamjigele mwanace ni kumjimika pasikati pawo ni kumjangata, ni ŵasalile kuti,

³⁷ “Jwalijose jwakumpocela cenene mwanace mpela aju ligongo lya une, ni kuti akumbocela cenene une, soni jwakumbocela une cenene, ngakumbocela unepe, nambo soni ŵiŵandumile une.”

Jwangakusisyana ni uweji ali jwakamulana ni uweji

³⁸ Yohane ŵamsalile Yesu kuti, “Cemwalimu, uwe tum'weni mundu jwine ali mkukoposya misimu jakusakala* pakulikolanga lina lyenu, ni uweji tulinjileje kumlekasya ligongo ngakwenda pamo ni uweji.”

³⁹ Nambo Yesu ŵasalile kuti, “Mkasimumlekasya.” “Jwalijose ngakomboleka kuti mundu ali atesile ya macili mu lina lyangu ndaŵi jijojo ni kusalaga yakusakala yakwamba une.

⁴⁰ Ligongo mundu jwakakusisyana ni uwe, jwalakwejo ali jwakamulana ni uweji.

⁴¹ Jwalijose jwakumpa mgawo wa mesi ligongo lyakuti mli ŵakwe ŵa Klistu,* ngumsalila kusyene kuti jwelejo ngasalepela kupocela mbote jakwe.

Kulinjikwa ku ulemwa

⁴² “Jwalijose jwakumlemwekasya atamose jumo jwa ŵanace ŵakungulupilila unejiŵa, jwelejo kukaliji kwambone kuti amtaŵilile liganga lya lisyago lyekulungwa mlukosi mwakwe ni kumponya m'nyasa.

⁴³ Myoyo, naga ligasa lyenu likumlemwekasya, mlikate. Kuli kwambone kuti mkajinjile ku umi wangamala* mli ŵakatice ligasa, kulekangana ni kuti mkajinjile ku moto mli mkwete magasa gosope gaŵili ku Jahena,* ku moto wangasimika.

⁴⁴ Kweleko ‘mbisu syakwasawusya ngasikuwa, moto wakwe soni wamtukuta wangasima.’

⁴⁵ Naga lusajo lwenu lukumlemwekasya mlukate. Kuli kwambone kuti mkajinjile ku umi wangamala mli ŵakatice lusajo, kulekangana ni kuti mkajinjile ku moto wangamala ku Jahena mli mkwete sajo syosope.

⁴⁶ Kweleko mbisu syakwasawusya ngasikuwa, moto wakwe soni ngawukusasima.

⁴⁷ Nipo naga liso lyenu likumlemwekasya, mlikolotole. Kuli kwambone kuti mkajinjile mu Ucimwene wa Mlungu mli mkwete liso limope, kulekangana nikuti akamponye ku Jahena mli mkwete meso gosope gaŵili.

⁴⁸ Kweleko ‘mbisu syakwasawusya ngasikuwa, moto wakwe soni wakwajoca ngawukusasima.’

⁴⁹ “Jwalijose kweleko taciswejeswa ni moto mpela musikusaswejecesedwa mbopesi ni njete.

⁵⁰ “Njete jili jambone, nambo naga jisulwice, ana mpaka jinonye soni uli? “Umi wenu uŵeje mpela wetajidwe njete, soni mtameje mwa mtendele pasikati penu.”