Maliko 7 - Chiyawo Bible

Misyungu ja acinangolo ŵa Ayuda

¹ Lisiku line Afalisi* ŵane, pamo ni aciŵalimu ŵa Malamusi,* ŵiŵatyocele ku Yelusalemu, ŵayice kwa Yesu.*

² Jemanjajo ŵaweni kuti ŵakulijiganya* ŵakwe ŵane ŵagambaga kulya mwangakuya msyungu wa Ciyuda wakunaŵa myala.

³ Pakuŵa Afalisi ni Ayuda ŵane wosope ŵangalya mkananaŵe myala mwalitala lyakwenelela. Akusatenda myoyo kuti asunje msyungu wa acinangolo ŵawo.

⁴ Naga ali atyocele kumsika ŵangagamba kutanda kulya yasumileyo mkananaŵe myala. Akusasunga soni misyungu jine jejinji jiŵalecele acinangolo ŵawo, mpela ja kucapa migawo, yiŵiga ni yida yakupanganyidwa ni kopa* ni yindanda yakwe.

⁵ Myoyo Afalisi ni aciŵalimu ŵa Malamusi ŵamwusisye Yesu kuti, “Ligongo cici ŵakulijiganya wenu ngakusunga msyungu wa acinangolo wetu, nambo m'malo mwakwe akusagamba kulya cakulya mkananaŵe myala?”

⁶ Yesu ŵajanjile kuti, “Jemanja ŵandu ŵa unami jwakulocesya* Yesaya nganalambusya piŵalembile ya jemanja kuti, ‘Ŵandu ŵeleŵa agamba kunjimbicisya une ni pakamwa pawope. Nambo mitima jawo jili kwakutalikangana ni une.

⁷ Pangali soni kusosekwa kwakuti alambileje une, ligongo akwiganya tumalamusi twakupanganya ŵandu wamba, ni mpela kuti gali malamusi ga Mlungu.’ ”

⁸ Kaneko Yesu ŵatite, “Jemanja mkuleka Malamusi ga Mlungu, ni mkusunga misyungu ja ŵandu.”

⁹ Pakupitilisya maloŵe, Yesu ŵatite, “Nambo ni mkwete matala genu gakalamuka gakulecela Malamusi ga Mlungu kuti msunje misyungu jenu.

¹⁰ Paja Mose* ŵalamwile kuti, ‘Mwacimbicisye baba ŵenu ni mama ŵenu.’ Soni kuti, ‘Jwalijose jwakwacembulusya babagwe kapena mamagwe awulajidwe.’

¹¹ Nambo jemanja mkusala kuti, Yindu yele yindeje nakamucisye nayo, sambano yili ‘Kulubani’ (ni kusala kuti, yakupelecedwa kwa Mlungu.)

¹² Jemanja ngamkukunda mundu jwelejo kuti ŵakamucisye babagwe ni mamagwe.

¹³ Pakutenda myoyo maloŵe ga Mlungu mkugacembulusya ligongo lya misyungu jenu jimkusalecelana. Mkulemba soni yine yejinji ya mtundu welewu.”

Yindu yakumsakasya mundu

¹⁴ Kaneko Yesu ŵaŵilasile ŵandu ŵala kuti ayice ciŵandika ni jwalakwejo, ni ŵasalile kuti, “Mpikane nipo mpikanicisye cenene.

¹⁵ Pangali cindu cakutyocela kusa ni kwinjila mkati mwa mundu campaka cimsakasye. Nambo yakopoka mkati mwa mundu ni yikomboleka kumsakasya.”

¹⁶ “Jwele jwakwete mapikanilo gakupikanila apikane.”

¹⁷ Piŵalekangene Yesu ni likuga lya ŵandu lila ni kwinjila m'nyumba, ŵakulijiganya ŵakwe ŵamwusisye gopolela kwa cele citaguci.

¹⁸ Jwalakwe ŵajanjile kuti, “Ana atamose jemanja ngamkupikanicisya? Ana ngamkumanyilila kuti cilicose cakutyocela kusa ni kwinjila mwa mundu, cangamsakasya mundu?

¹⁹ Pakuŵa ngacikwinjila mu mtima mwa mundujo, nambo m'matumbo mwakwe, kaneko yikusajasidwa kusa.” (Pakuŵeceta yeleyi Yesu ŵalamwile kuti yakulya ya mtundu uliwose ŵandu akukomboleka kulya.)

²⁰ Ŵasalile soni kuti, “Yindu yakukopoka mwa mundu ni yele yikusamsakasya.

²¹ Ligongo mkati mwa mitima ja ŵandu ni mukusakopoka nganisyo syakusakala mpela ya msangu, yawiyi, ya kuwulagana,

²² ya cikululu, yakumbila, yakunyalaya, wiwu, kutukana, kulikwesya, kunyosya, ni kuloŵela.

²³ Yakusakala yosopeyi yikusatyocela mkati mwa mundu, ni yele yikusamsakasya mundujo.”

Cikulupi ca jwamkongwe jwine

²⁴ Yesu ŵatyosile kumalo kula, ni ŵajile ku mbali jakuŵandicila msinda wa Taya. Kweleko ŵajile kutama ku nyumba ja mundu jwine, soni nganasaka kuti ŵandu ŵane amanyilile kuti ali kweleko. Nambo nganiyikomboleka kusisika.

²⁵ Ndaŵi jijojo jwamkongwe jwine, jwele mwanace jwakwe ŵaliji mkulaga ni msimu wakusakala, jwapikene ya jwalakwe. Jwayice kwa Yesu ni jwatindiŵele pasi pa sajo syakwe.

²⁶ Jwamkongwejo jwaliji mundu jwa mtundu wine, nipo ŵapagwile mu upande wa ku Fenisiya ku Siliya. Ŵamŵendile Yesu kuti awukoposye msimu wakusakalawo mwa mwanagwe jwamkongwejo.

²⁷ Yesu ŵajanjile kuti, “Iyayi, mwalekani ŵanace alongole kulya ni kwikuta. Yesu ŵamsalile kuti. Ngaŵa yambone kujigala cakulya ca ŵanace ni kusiponyela m'mbwa.”

²⁸ Papopo jwamkongwe jula jwajanjile kuti, “Aŵecete yakuwona Ambuje, atamose m'mbwa sisikusatama pasi pa tebulo sikusalyaga yinyenyeswa ya yakulya yajasile ŵanace?”

²⁹ Yesu ŵamjanjile jwamkongwejo kuti, “Ligongo lya maloŵe gimŵecetega, jawulagani, msimu wakusakalawo ukopwece mwa mwanagwenujo.”

³⁰ Jwamkongwe jula ŵawujile ku nyumba jakwe, ni ŵajile kumsimana kweli mwanacejo ali agonile pa cindanda, msimu wakusakala ula uli ukopwece.

Yesu akumposya mundu jwangapikana

³¹ Yesu ŵatyosile kumbali kuwaliji msinda wa Taya, ŵaliji mkwenda kukatanya mbali kuwaliji msinda wa Sidoni, ulendo wakuja ku Nyasa ja Galileya, ŵapitile litala lyakukatanya pacilikati pambali ja Misinda Likumi.*

³² Ŵandu ŵane ŵayice kwa jwalakwe ni mundu juŵaliji jwangapikana ni jwacimeme. Ŵanduwo ŵamcondelele Yesu kuti amposye pakumsajika magasa mundujo.

³³ Yesu ŵamjigalile mundu jula pambali kwajika, kumtyosya pekuga lya ŵandu. Ŵajinjisye yala yakwe m'mapikanilo ga mundujo, ŵasunile mata ni ŵalukwayiye lulumi lwa mundu jula.

³⁴ Ŵalolite kwinani ni ŵajisisye mtima, ŵamsalile jwalakwejo kuti, “Efata” gopolela kuti, “Mwuguce!”

³⁵ Ndaŵi jijojo mapikanilo ga mundujo gawugwice, nipo cindu cicataŵile lulumi lwakwe catyosile, ni ŵatandite kuŵeceta mwakupikanika cenene.

³⁶ Yesu ŵagombelesye acimjakwe ŵa mundu jula kuti, “Mkaja kumsalila mundu jwalijose yeleyi.” Nambo atamose ŵagombelesye mwamacili camti myoyo, ŵandu ŵala ŵapite mcilalika ya yeleyi.

³⁷ Ŵandu ŵasimonjile mnope ni ŵatite kuti, “Jwalakweju akusatenda yindu yosope cenene. Atamose ŵandu ŵangapikana akwaposya ni kupakombola kupikana, soni ŵangaŵeceta akwaŵecetekasya.”