Maliko 6 - Chiyawo Bible

Ŵandu akumkana Yesu ku Nasaleti

¹ Yesu* ŵatyosile kumalo kula ni ŵawujile ku msinda wa kumangwawo, mwakulongana ni ŵakulijiganya* ŵakwe.

² Pilyakwanile lisiku lyakupumula,* jwalakwe ŵatandite kwiganya m'nyumba jamapopelo. Ŵandu ŵajinji ŵiŵaliji mkumpikanila ŵasimonjile mnope. Ni ŵaliji mkuwusyana kuti, “Ana yeleyi ŵayijigele kwapi? Lunda luŵapocelelu lwamti uli? Ana jwalakweju akupakombola uli kutenda yindu yamacili yamtundu welewu?

³ Ana jwalakweju ngaŵaga fundi jwakupala matabwa jula, mwanace jwa Maliya? Ana acalongo acimjakwe ngaŵaga Yakobo, Yosefe, Yudasi ni Simoni? Ana acalumbugwe ngaŵaga tuli nawo panopano?” Kwa ligongo lyeleli ŵandu ŵala yanyaleye yiŵajiganyisyeyo.

⁴ Nambo Yesu ŵasalile kuti, “Jwakulocesya* akusacimbicikwaga kumalo kwine kulikose, nambo ngaŵaga kumangwakwe, ni pasikati pa acalongo acimjakwe, ni ŵandu ŵa mwiŵasa mwakwe.”

⁵ Myoyo nganatenda yindu yakusimonjeka, nambo ŵagambile kusajika magasa pa ŵandu ŵakulwala ŵamnono, ni ŵaposile.

⁶ Yesu ŵasimonjile pakulola kuti ŵandu ŵakweleko nganakola cikulupi mwa jwalakwejo. Ni ŵapite kukwajiganya ŵandu ŵa m'misi jakusyungulila kweleko.

Yesu akwatuma ŵakulijiganya ŵakwe likumi ni ŵaŵili ŵala

⁷ Yesu ŵaŵilasile ŵakulijiganya ŵakwe likumi ni ŵaŵili ŵala pampepe, ni ŵatumile ŵaŵili ŵaŵili. Ŵapele macili gakopocesya misimu jakusakala.*

⁸ Ŵalamulile kuti, “Mkajigala kandu kalikose pa ulendo wenu, akaŵe simbope. Mkajigala cakulya, kapena msaku ŵa pa ulendo, kapena mbiya mcikwama,

⁹ m'wale sapato nambo mkajigala malaja gapadela.”

¹⁰ Ŵasalile soni kuti, “Naga mkwika pamusi, mkatame ku nyumba jitimkayicilejo, mpaka jikakwanile ndaŵi jitimtyoce malo gelego.

¹¹ Naga ŵandu ŵa m'musi wine ngakumpocela, soni akukana kugapikanila maloŵe genu, pakutyoka mkapate luwundu lwa kusajo syenu. Celeci ticikaŵe cimanyisyo cakutendela umboni yakusakala yatesileyo.”

¹² Ŵakulijiganya ŵala ŵapite mcilalicila kwa ŵandu kuti apitikuce mitima jawo.

¹³ Ŵakoposyaga misimu jakusakala jejinji, soni ŵapakasyaga mawuta ŵandu ŵajinji, ni ŵaliji mkwaposya.

Ciwa ca Yohane M'batisi

¹⁴ Mwenye Helodi* ŵasipikene ngani syelesi, pakuŵa mbili ja Yesu japikanice kulikose. Ŵandu ŵane ŵatiji kuti, “Yohane M'batisi jula ŵajimwice ku ŵawe, ali ni ligongo lyakwe akutenda yamacili yosopeyi.”

¹⁵ Nambo ŵandu ŵane ŵatiji kuti, “Jweleju ali Eliya.”* Nambo ŵane ŵatiji kuti, “Iyayi jwalakwejo ali jwakulocesya jwamti mpela ŵakulocesya ŵakala ŵala.”

¹⁶ Nambo Helodi piŵapikene yeleyi, ŵatite kuti, “Yohane junamkatile lukosi jula ni jwajimwice kutyocela ku ŵawe.”

¹⁷ Pakuti Helodi kala, ŵatumile asilikali ŵakwe kuti akamkamule Yohane, akamtaŵe ni kumponya m'nyumba ja akayidi. Ŵatesile yeleyi ligongo lya Helodiyasi,* ŵamkwakwe Filipi, mpwakwe jwa Helodi. Pandaŵiji Helodiju ŵaliji ali alombele jwamkongwejo.

¹⁸ Yohane M'batisi ŵamsalile jwalakwejo kuti, “Kuli kugalemwecesya malamusi kulombela jwamkongwe jwa mpwenu.”

¹⁹ Myoyo Helodiyasi ŵaŵenganaga nawo Yohane ni ŵasakaga kumwulaga nambo ŵalepelaga,

²⁰ ligongo Helodi ŵamjogopaga Yohane, pakuti ŵamanyililaga kuti ŵaliji mundu jwakulungama ni jwagoloka mtima. Myoyo ŵamsungaga cenene. Ŵanonyelaga kugapikana maloŵe gakwe, atamose kuti yiŵaŵecetaga Yohanejo yam'masyaga lunda.

²¹ Pa lisiku lyakumbucila kupagwa kwa Helodi, Helodiyasi ni piŵapatile upile. Helodi ŵakolosisye cindimba ni ŵaŵilasile acakulungwakulungwa ŵa boma, ni acakulungwakulungwa ŵakulamulila asilikali, ni ŵandu ŵakupikanika ŵa ku Galileyako.

²² Mwanace jwamkongwe jwa Helodiyasi ŵajinjile m'nyumba muŵatendelaga cindimba mula, ni ŵatandite kuŵina. Kuŵina kweleku kwamnonyele Helodi ni ŵandu wosope ŵiŵaliji nawo pacindimbaco. Mwenye ŵamsalile mwalijo kuti, “Ŵendani cilicose cimkusaka, une tinampe.”

²³ Soni ŵaŵecete mwakulumbila kuti, “Cilicose citimumbende une, tinampe, atamose kumkatila pacilikati cilambo cangu cino.”

²⁴ Mwalijo ŵakopwece kuja kukwawusya mamagwe kuti, “Ana ngaŵende cici?” Mamagwe ŵajanjile kuti, “Mkaŵende mtwe wa Yohane M'batisi.”

²⁵ Mwali jula ŵawusile mwacitemacitema kwa mwenye ni ŵamsalile kuti, “Ngusaka kuti ambe panopano mtwe wa Yohane M'batisi mu mbalemu.”

²⁶ Mwenye Helodi ŵadandawile mnope mu mtima mwawo, nambo ligongo lyakuti ŵalumbile pameso pa ŵandu wosope uŵaŵilasile kucindimba ŵala, nganasaka kukasa cilanga* cakwe kwa mwalijo.

²⁷ Myoyo ndaŵi jijojo ŵamtumile msilikali jwakwe, ŵalamwile kuti akayice nawo mtwe wa Yohanewo. Jwalakwejo jwatyosile ni kuja kukata mtwe wa Yohane m'nyumba ja akayidi.

²⁸ Ŵawuŵisile mtwewo mumbale ni ŵayice nawo, ni kuwupeleka kwa mwali jula, kaneko mwalijo ŵajile kukuwupeleka kwa mamagwe.

²⁹ Ŵakulijiganya ŵa Yohane piŵapikene yeleyi, ŵayice kujigala mtembo ŵakwe ni ŵajile kukuwusika mwilembe.

Yesu akwalisya ŵandu ŵakupunda 5,000

³⁰ Ndumetume* sila pisyawujile kwa Yesu syamsalile yosope yiŵatesile ni yiŵajiganyisye.

³¹ Yesu ŵasisalile kuti, “Kwende tujawule kwajika kwangapita ŵandu, kuti mkapumule panandi.” Ŵaŵecete yeleyi ligongo ŵandu ŵaliji kupitikupiti, kwamti jemanjajo nganapataga lipesa lyakuti alye.

³² Myoyo ŵajinjile mwiboti ni ŵajawile kwajika ku malo gangapitapita ŵandu.

³³ Nambo ŵandu ŵajinji ŵaweni jemanjajo ali mkwawula, ni ŵamanyilile. Myoyo ŵawutwice pamkuli kutyocela kumisinda josope, mpaka ŵajile kwika kumaloko, Yesu ni ŵakulijiganya ŵakwe mkanayice.

³⁴ Yesu piŵakopwece mwibotimo ŵaliweni likuga lya ŵanduwo. Ni ŵatendele canasa, ligongo ŵaliji mpela ngondolo syangali mkucinga, myoyo ŵatandite kwajiganya yindu yejinji.

³⁵ Ndaŵi jegulo ŵakulijiganya ŵakwe ŵayice kukwasalila Yesu kuti, “Akunotu kwitinji, soni alino ligulo.

³⁶ Ŵasalile ŵanduŵa kuti ajawulanganeje ku misi jakuŵandicila kuti akalisumile acimsyene yakulya.”

³⁷ Nambo Yesu ŵasalile kuti, “Jemanja mwape yakulya.” Jemanjajo ŵajanjile kuti, “Ni pakusosekwa kuti tukasume mikate ja mbiya sya silifa,* syakwana 200 kuti twakwanisye kwalisya ŵandu wosopeŵa.”

³⁸ Yesu ŵawusisye kuti, “Mkwete mikate jilingwa? Mkalole.” Piŵajile kulola, ŵasalile kuti, “Jipali mikate msano ni somba siŵilipe.”

³⁹ Myoyo Yesu ŵalamwile kuti ŵandu ŵala atame pasi pa manyasi.

⁴⁰ Ŵandu ŵala ŵatemi m'makuga ga ŵandu makumi likumi ni makumi msano.

⁴¹ Yesu ŵajigele mikate msano jila ni somba siŵili sila, ni ŵalolite kwinani, ni ŵamtogolele Mlungu, piŵamasile ŵajigaŵenye mikate jila ni ŵapele ŵakulijiganya ŵakwe kuti ŵapeleganye ŵandu ŵala.

⁴² Ŵandu wosope ŵala ŵalile mpaka kwikuta.

⁴³ Kaneko ŵakulijiganya ŵala ŵalokotenye sigasiga mpaka gumbasya ngalala likumi ni siŵili.

⁴⁴ Ciŵalanjilo ca acalumepe uŵalile cakwanile 5,000.

Yesu akwenda pacanya pa mesi

⁴⁵ Ndaŵi jijojo, Yesu ŵasalile ŵakulijiganya ŵakwe kuti ajinjile mwiboti, alongolele kwawula lisi line lya nyasa ku Betisaida, jwalakwe ali mkwasalila ŵandu kuti ajawuleje msimangwawo.

⁴⁶ Piŵamasile kwasalila ŵandu ŵala kuti ajawuleje, jwalakwe ŵakwesile litumbi kuja kukupopela.

⁴⁷ Pikwatandaga kuswa ni kuti liboti lila lyaliji pasikati pa nyasa. Yesu ŵaliji ali jika pamkuli.

⁴⁸ Ni ŵaweni ŵakulijiganya ŵakwe ali mkulaga ni kupalasa liboti, ligongo ŵajawulaga kujawumilaga mbungo. Kumasikusiku, kuli ciŵela mbuu, Yesu ŵayice kwa jemanjajo, ali mkwenda pacanya pa nyasa, ni ŵasakaga kwapeleta.

⁴⁹ Nambo ŵakulijiganya ŵala, pakwawona ali mkwenda pacanya pa mesi, ŵaganisyaga kuti caliji cilengwalengwa, ni ŵatandite gumila.

⁵⁰ Pakuŵa wosopewo piŵam'weni ŵakamwile woga. Nambo ndaŵi jijojo Yesu ŵasalile kuti, “Mwusimane mtima, ndili une, mkajogopa!”

⁵¹ Kaneko ŵajinjile mwiboti mula, mbungo jalesile. Ŵakulijiganya ŵala ŵasimonjile mnope,

⁵² ŵajimi mitwe ligongo ŵaliji mkinamanyilile mate gasyesyene gakwalisya mikate ŵandu 5,000.

Yesu akumposya jwakulwala ku Genesaleti

⁵³ Yesu ni ŵakulijiganya ŵakwe ŵajombwece nyasa, nipo ŵajile kwika ku Genesaleti, nipo ŵakocesye ni liboti lyawo kweleko.

⁵⁴ Piŵakopwece jemanjajo mwiboti mula, mwacitema citema ŵandu ŵakweleko ŵam'manyilile Yesu.

⁵⁵ Ŵanduwo ŵawutucile ku misi ja kuŵandicila jele mbalijo, ni ŵatandite kwika ni ŵandu ŵakulwala pa macila, ŵayikaga nawo kulikose kuŵapikanaga kuti Yesu ali aku.

⁵⁶ Ŵandu ŵaliji mkwagoneka ŵandu ŵakulwalawo pa luŵala, kulikose kuŵajawulaga Yesu, kumisi ni kumisinda. Ŵamŵendile kuti ŵakunde ŵakulwalawo kuti agambe kwaya atamose lujenje lwa cakuwala cakwe. Wosope ŵiŵakwayiye lujenje lwa cakuwala cakwe, ŵaposile.