Maliko 5 - Chiyawo Bible

Yesu akumposya mundu jwamkamulwe ni misimu jakusakala

¹ Yesu* ni ŵakulijiganya* ŵakwe ŵayice lisi line lya Nyasa ja Galileya, ku upande wa Agelasa.

² Ndaŵi jiŵakopwece Yesu mwiboti, ŵasimangene najo mundu jwine jwamkamulwe ni msimu wakusakala, ali mkutyocela ku malembe kuŵatamaga.

³ Mundujo ŵaliji mkutama kweleko, ni paliji pangali jwine jwakupakombola kumtaŵa, atamose ni unyolo.

⁴ Kala ŵandu ŵalinjile masiku gamajinji kumtaŵa ngongolo syakwe ni yisyano, soni kumtaŵa makono ni maunyolo, nambo jwalakwe ŵagambaga kutulanya maunyologo, soni ŵagambaga kuposokolanya yisyano yiŵamtaŵililaga ngongolosyo. Ŵaliji mundu jwamacili, soni paliji pangali mundu juŵapakombolaga kumtondoya.

⁵ Musi ni cilo ŵatamaga jwalakwejo ku malembeko ni m'matumbi, ŵagambaga gumila ni kuliwulasya ni maganga.

⁶ Mundujo piŵam'weni Yesu ali mkwisa kwakutalicila, ŵamwutucile ni ŵamtindiŵalile.

⁷ Mwakwesya maloŵe gakwe ŵatite, “Ana natandite cici, ŵalakwe Yesu, Mwanace jwa Mlungu Jwamaciligosope? Alumbile mu lina lya Mlungu kuti ngasasawusya une.”

⁸ Mundu jula ŵaŵecete myoyo ligongo Yesu ŵaliji ali amsalile kuti, “M'mwe msimu wakusakala, mkopoce mwa munduju!”

⁹ Yesu ŵamwusisye mundu jula kuti, “Lina lyenu ŵani?” Jwalakwe jwajanjile kuti, “Lina lyangu lili ‘Likuga’ pakuti tupali ŵajinji.”

¹⁰ Myoyo jwalakwe ŵamcondelele Yesu mnope, kuti misimujo akajikopocesya kusa kwa mbalijo.

¹¹ Capamkuli pamti myoyo, mungulugulu mwa litumbimo lyapali likuga lyekulungwa lya maguluŵe lilyaliji mkulya.

¹² Myoyo misimu jakusakala* jila jamŵendile Yesu kuti, “Atutumisye m'maguluŵemo, atukunde tukajinjile mwelemo.”

¹³ Yesu ŵajikundile misimu jakusakalajo kuti jijawule. Jalakwejo jakopwece ni jajile kwinjila m'maguluŵemo. Ndaŵi jijojo likuga lyosope lya maguluŵe gakwana mpela 2,000 lyawutwice kuselelecela kwiŵanda kwa mkuli ula mwamacili ni gajinjile m'nyasa ni gawilile m'momo.

¹⁴ Ŵakucinga maguluŵe ŵala ŵatisile, ŵajile kukwasalila ŵandu ŵa mu msinda ni ŵa ku musi yiyatendekweyo, mwakuti ŵayice kukulola yeleyo.

¹⁵ Piŵayice ŵandu ŵala kuŵaliji Yesu kula ŵam'weni mundu jwamkamulwe ni msimu wakusakala jula, ali atemi pasi, ali awete, ali mganisya soni cenene, mundu jwamti likuga lya misimu jakusakala jamjinjile. Ŵanduwo wakamwile woga.

¹⁶ Ŵandu wosope uŵayiweni yosope yilimkutendekwa, ŵasalile ŵandu ŵiŵayice ŵala yiyamtendecele mundu jwa misimu jakusakala jula, soni maguluŵe gala.

¹⁷ Papopo ŵandu ŵala ŵamŵendile Yesu kuti atyoce ku upande wawowo.

¹⁸ Ndaŵi jiŵajawulaga Yesu kuja kukukwela mwiboti, mundu juŵakamwilwe ni msimu wakusakala jula ŵamŵendile Yesu kuti alongane nawo.

¹⁹ Nambo Yesu ŵakanile ni ŵamsalile kuti, “Iyayi, m'mwe nambo mjawule kumangwenu kwa acalongo acimjenu, mkasalile yindu yayikulungwa yamtendele Ambuje mwa canasa cawo.”

²⁰ Mundujo ŵatyosile ni ŵatandite kwenesya ku mbali jakolanjidwa Misinda Likumi,* ya yindu yekulungwa yele Yesu yiŵamtendele jwalakwejo. Ŵandu wosope ŵasimonjile kwekulungwa piŵapikene yindu yeleyo.

Mwanace jwamkongwe jwa Yailo ni jwamkongwe juŵakwayiye cakuwala ca Yesu

²¹ Yesu ŵajombwece soni nyasa. Piŵayice lisi line, likuga lya ŵandu lyasongene mungulugulu nyasa pa malo piŵaliji jwalakwejo.

²² Ni ŵayice mundu jwine, lina lyakwe Yayilo, juŵaliji jumo jwa acakulungwa ŵa nyumba jamapopelo. Piŵam'weni Yesu, ŵatindiŵele ni kamula lukongolo lwa Yesujo,

²³ ni ŵamcondelele kuti, “Mwanangu jwamkongwe akulwala mwakuti ali ciŵandika kuwa, conde naga yikomboleka, akamsajice magasa gawo kuti apole ni kukola umi.”

²⁴ Yesu ŵanyakwice ni ŵalongene najo. Ŵandu ŵajinji ŵamkuyiye ni ŵajendaga mwakumkanganika Yesu.

²⁵ Ŵapali jwamkongwe jwine juŵaliji ali mkulaga ni ulwele wa kumwesi kwa yaka likumi ni yiŵili.

²⁶ Ŵalasile mnope kwa asing'anga ŵajinji ŵaŵalinjile kumposya, mpaka ŵajonasile cipanje cosope nambo nganapola kose. M'malo mwakwe ulwelewo waliji mkukulilakulila.

²⁷ Jwamkongwejo ŵaliji ali apikene ngani sya Yesu. Myoyo ŵajinjile mwikuga lya ŵandu ŵajinji mula, ŵalikanganicisye mpaka ŵajile kwika cakunyuma kwa Yesu, ni ŵamkwayiye yakuwala yakwe.

²⁸ Jwalakweju ŵaganisyaga mu mtima mwakwe kuti, “Naga ngumkwaya Yesu, atamose yakuwala yakwe peyo, une timbole.”

²⁹ Ni kweli ndaŵi jijojo, ulwele wakwe wamagono ula walesile, soni msyenejo ŵamupikene mcilu mwakwemo kuti ulwele ula umasile.

³⁰ Yesu ŵamanyilile kuti macili gane gakopwece mwa jwalakwe. Myoyo ŵawusisye kuti, “Ana ŵani ŵangwayiye yakuwala?”

³¹ Ŵakulijiganya ŵakwe ŵajanjile kuti, “Ŵalakwe asyene akulola kuti ŵandu ŵakanganice, ni akukombola uli kuwusya kuti, ‘Ŵani ŵangwayiye?’ ”

³² Nambo Yesu ŵalolitelolite kuti ampate mundu juŵakwayisye.

³³ Jwamkongwe jula wamkamwile woga ni ŵatandite kutetemela, ligongo ŵaliji ali amanyilile yiyamwonecele yila. Ŵasejelele kuŵaliji Yesu kula, ni ŵatindiŵele ni ŵamsalile yosope mpela muyamtendecekwele.

³⁴ Yesu ŵamsalile kuti, “M'mwe, mwanangu, cikulupi cenu cimposisye. Jawulagani mwa mtendele. Ulwele wenu uposile.”

³⁵ Yesu ali ciŵela kuŵeceta, ŵayice ŵandu kutyocela ku nyumba ja Yailo juŵaliji jumo jwa acakulungwa ŵa ku nyumba jamapopelo jula. Ŵamsalile jwamkulungwajo kuti, “Mwanace jula atulesile. Akasiŵasawusya soni cemwalimuŵa.”

³⁶ Yesu nganayitendela masengo yiŵaŵecetaga ŵele ŵanduwo. Ŵamsalile jwamkulungwa jula kuti, “Ŵalakwe akajogopa, agambe kulupilila.”

³⁷ Myoyo, Yesu nganakunda kuti ŵandu ŵane alongane najo, akaŵe Petulo,* Yakobo* ni Yohane,* mpwakwe jwa Yakobojo.

³⁸ Piŵayice jemanjaji ku nyumba kwa jwamkulungwa jwa nyumba jamapopelo jula, Yesu ŵaliweni likuga lya ŵandu lili mgumila ni kulila mnope.

³⁹ Jwalakwe ali ajinjile m'nyumbamo, ŵawusisye ŵanduwo kuti, “Ana ligongo cici mkutenda lisegwe lyosopeli ni kulila? Mwanaceju nganawa nambo agambile kugona lugono basi.”

⁴⁰ Ŵandu ŵala ŵatandite kumseka. Nambo jwalakwejo ŵakopwesye ŵandu wosope ŵala kusa; ŵagambile kwajigala babagwe ni mamagwe mwanacejo, ni ŵakulijiganya ŵatatu ŵala, ni ŵajinjile ku cipinda kujwaliji mwanace kula.

⁴¹ Myoyo jwalakwe ŵamkamwile ligasa mwanace jula, ni ŵaŵecete kuti, “Talita kumi!” Gopolela kwakwe ni kuti, “Mwali ngumsalila kuti mjimuce!”

⁴² Ndaŵi jijojo kweli mwalijo ŵajimwice ni ŵatandite kwenda, pakuŵa ŵaliji jwa yaka likumi ni yiŵili. Jwalijose juŵayiweni yeleyi ŵasimonjile mnope.

⁴³ Nambo Yesu ŵagombelesye mwamacili kuti, yeleyi akayimanyilila ŵandu ŵane. Kaneko ŵasalile kuti, “Ampe cakulya mwalijo.”