Maliko 3 - Chiyawo Bible

Yesu ŵaposisye mundu jwamnyolole mkono

¹ Yesu* ŵajile kwinjila soni m'nyumba ja mapopelo. Mwelemo mwaliji mwana mundu juŵakwete ligasa lyenyolole.

² Ŵandu ŵane ŵaliji pelepo uŵasosaga kuti amsimanile Yesu magongo, myoyo ŵagambaga kumlolecesya kuti alole naga tamposye mundu jula pa lisiku lyakupumula.*

³ Yesu ŵamlamwile mundu jwamnyolole ligasa jula kuti, “Jimukani pelepo, myice mjime pasogolo pano.”

⁴ Jwalakwe ni ŵawusisye ŵanduwo kuti, “Ana pa lisiku lyakupumula cakwenela mundu kutenda ni capi pelepa? Kwatendela ŵandu yambone, kapena kwatendela yakusakala? Kuwukulupusya umi wa mundu, kapena kuwujonanga?” Nambo ŵanduwo nganajanga cilicose.

⁵ Papopo Yesu ŵalolecesye ŵanduwo mwa ukali ligongo lya kwawona ŵandu ŵala kuti ŵaliji ŵangalwe. Myoyo ŵamsalile mundu jula kuti, “Mtambasukule ligasa lyenu.” Jwalakwe ŵalitambasukwile, ligasa lyakwelyo lyaŵele soni cenene.

⁶ Mwacitemacitema Afalisi* ŵakopwece ni ŵajile kutenda mtemela ni ŵandu ŵa cipani ca Helodi,* kuti apangane litala lya kumwulajila Yesu.

Likuga lya ŵandu mungulugulu Nyasa ja Galileya

⁷ Yesu pamo ni ŵakulijiganya* ŵakwe ŵatyosile pa malo gala ni ŵajawile ku Nyasa ja Galileya. Ŵandu ŵajinji ŵamkuyisye. Jemanjaji ŵaliji ŵakutyocela ku Galileya, ŵane ŵa ku Yudeya,

⁸ ŵane ŵa ku Yelusalemu, ŵane ŵa ku Idumeya, ni pesi Lusulo lwa Yolodani, soni ŵane ku mbali ja Taya ni ku Sidoni. Wosopewo ŵayice kwa jwalakwe, ligongo ŵaliji ali apikene yindu yiŵatendaga jwalakwe.

⁹ Yesu ŵasalile ŵakulijiganya ŵakwe kuti amŵicile liboti pakuŵandicila, ŵajogopelaga kuti mwine ŵandu taŵe ali mkumkanganika, ligongo ŵapali ŵandu ŵajinji.

¹⁰ Jwalakwe ŵaliji ali ŵaposisye ŵandu ŵajinji, wosope uŵakwete yilwele ŵaliji mkututanatutana kusosa kuti amkwaye Yesu.

¹¹ Misimu jakusakala* jatiji mkumwona Yesu, jaligwisyaga pasi mwakuŵandikana ni jwalakwe, jili mgumila kuti, “Ŵalakwe ali Mwanace jwa Mlungu.”

¹² Nambo jwalakwe ŵajilamwile misimu jakusakalajo kuti jikamjuwula jwalakwejo.

Yesu akusagula ŵakulijiganya likumi ni ŵaŵili

¹³ Yesu ŵakwesile kumatumbi, ŵaŵilasile ŵandu ŵiŵasosaga msyene, ŵanduwo ni ŵayice kuŵaliji jwalakwejo.

¹⁴ Jwalakwe ŵasagwile ŵandu ŵakwanila likumi ni ŵaŵili, ni ŵakolasile lina lyakuti, “Ŵandumetume.” Ŵasalile kuti, “Nimsagwile jemanja kuti mtameje ni une, tinjimtuma kuja kulalicila,

¹⁵ soni timcikola macili gakopocesya misimu jakusakala.”

¹⁶ Aga gali mena ga ŵakulijiganya likumi ni ŵaŵili uŵasagulidwe ni Yesu: Simoni* (jwele Yesu ŵampele lina lyakuti Petulo);*

¹⁷ Yakobo* ni Yohane* mlongo mjakwe, ŵanace ŵala ŵa Sebedayo (Yesu ŵapele jemanjaji lina line lyakuti Bonegesi, gopolela kuti, “Ŵakogoya mpela kulindima kwa njasi.”)

¹⁸ Andileya,* Filipi, Batolomeyo, Mateyu,* Tomasi,* Yakobo mwanace jwa Alifeyo, Tadeyo,* Simoni juŵaliji jwa m'cipani candale ca Aseloti,*

¹⁹ kwisa soni Yudasi Isikaliyoti,* juŵampelece Yesu kwa amagongo ŵakwe.

Yesu ni Belesebulu

²⁰ Kaneko Yesu ŵajawile kumangwawo, nipo ŵandu ŵajinji ŵasongene soni, mwakuti jwalakwejo ni ŵakulijiganya ŵakwe nganakola lipesa lyakulila yakulya.

²¹ Piŵapikene yiŵatendaga Yesu, acalongo acimjakwe ŵayice kuti amjigale ligongo ŵatiji kuti, “Asyungulile mtwe!”

²² Aciŵalimu ŵane ŵa Malamusi ga Mose,* ŵiŵayice kutyocela ku Yelusalemu, ŵatite, “Mundu jweleju akamwilwe ni Belesebulu,* soni macili gakukopocesya jwalakweju misimu jakusakalaji, gakutyocela kwa mcimwene jwa misimu jakusakala.”

²³ Myoyo Yesu ŵaŵilasile ŵandu kuti ayice pakuŵandicilana ni jwalakwe, ni ŵaŵecete mwa citagu* kuti, “Ana Satana* akukomboleka kumkoposya Satana?

²⁴ Naga ŵandu ŵa mu ucimwene uliwose akutanda kwimucilana, kumala kwa ucimwenewo kukusaŵa kukoko.

²⁵ Soni ŵandu ŵa mwiŵasa limpepe naga akutanda kugaŵikana, liŵasa lya mtundu welewo ngakomboleka kulimba.

²⁶ Myoyo naga ŵa mu ucimwene wa Satana akwimucilana acimsyenepe, Satanajo ngaŵa mkulimbangana, ni kuti macili gakwe gamasile.

²⁷ “Mundu jwine ngakomboleka gamba kwinjila m'nyumba ja mundu jwamacili ni kumsumula katundu jwakwe. Akusalongola kaje kumtaŵa mundu jwamacilijo, kaneko ni kujigalaga cenene yindu ya m'nyumba mwakwemo.

²⁸ “Ngumsalila kuti ŵandu akukomboleka kululucidwa ulemwa* wawo, atamose kuti yakuŵeceta yawo yosope yili yakumnyosya Mlungu.

²⁹ Nambo jwalijose jwakunyosya Msimu Ŵaswela, ngasakululucidwa kose. Ulemwa wakwewo ukusaŵa ciŵela mpaka kalakala.”

³⁰ (Yesu ŵaŵecete yeleyi ligongo ŵandu ŵala ŵaŵecetaga kuti, “Akamwilwe ni msimu wakusakala.”)

Mamagwe ni acalongo acimjakwe ŵa Yesu

³¹ Mamagwe ni acalongo acimjakwe ŵa Yesu ŵayice ku nyumba kula. Ŵajimi pasa, ni ŵatumile ŵandu kuti akamŵilanje.

³² Ŵandu ŵajinji watemi pasi mwakumsyungulila jwalakwe. Ŵandu ŵiŵatumidwe ŵala ŵamsalile Yesu kuti, “Mama ŵenu ni acalongo acimjenu ali pasapa, akusosa kuwonegana namwe.”

³³ Nambo jwalakwe ŵajanjile kuti, “Ana mama ŵangu ni acalongo acimjangu ni ŵani?”

³⁴ Yesu ŵalolite ŵandu ŵiŵatemi mwakumsyungulila ŵala, ni ŵasalile kuti, “Unetu mama ŵangu ni acalongo acimjangu ni aŵa.

³⁵ Jwalijose jwakutenda yakusaka Mlungu kuti ayitende, jwalakwejo ni mlongo mjangu, mlumbwangu ni mama ŵangu.”