Maliko 2 - Chiyawo Bible

Yesu akumposya mundu jwamlemale yiŵalo

¹ Gali gapite masiku panandi, Yesu* ŵawujile soni ku Kapelenaumu, ŵandu ŵapikene kuti Yesu ayice mu msinda mula.

² Ŵandu ŵajinji ŵagumbele m'nyumbamo, mpaka mwaliji mwangali malo gakusigala m'nyumbamo, atamose pa mlango pose. Jwalakwe ŵaliji mkulalicila maloŵe ga Mlungu.

³ Ŵandu ŵane mcece ŵamnyakwile mundu jwamlemale yiŵalo, ni ŵayice najo kwa Yesu.

⁴ Jemanjajo nganapakombola kwika najo jwakulwalajo ciŵandika ni Yesu, ligongo lya kutupa kwa ŵandu. Myoyo ŵakwesile pa msakasa, ni ŵawamwile manyasi mwakulolegana ni pa malo piŵaliji Yesu, ni ŵatulucisye pepesapo macila giŵamnyakulile mundu jula.

⁵ Pakuciwona cikulupi ca ŵanduwo, Yesu ŵamsalile mundu jwamlemale yiŵalo jula kuti, “Mwanangu, ulemwa* wenu ukululucidwe.”

⁶ Aciŵalimu ŵane ŵa Malamusi giŵalembile Mose* ŵatemi pasi pa malo gagogo. Jemanjaji ŵatandite kuliwusya m'mitima mwawo kuti,

⁷ “Ana jwalakweju akupakombola uli kuŵeceta maloŵe gamti myiyi? Ngaŵa kumnyosya Mlungu kweleku? Ŵani mpaka akululucile ulemwa, pangaŵaga Mlungu jikape?”

⁸ Yesu ŵamanyilile kuti jemanjajo ŵaliji mkuganisya yeleyi m'mitima mwawo, myoyo ŵawusisye kuti, “Ligongo cici mkuganisya yeleyo m'mitima mwenu?

⁹ Ana cangasawusya ni capi kumsalila mundu jwamlemale yiŵaloju kuti, ‘Ulemwa wenu ukululucidwe,’ kapena kusala kuti, ‘Mjimuce, mnyakule ugono wenu, ni mtande kwenda?’

¹⁰ Tinamlosye jemanja kuti Mwanace jwa Mundu* akwete ulamusi pacilambo capasi pano wakukululucila ulemwa.” Papopo ŵamsalile mundu jwamlemale yiŵalo jula kuti,

¹¹ “Mjimuce, mjigale macila genu, mjawuleje kumangwenu.”

¹² Mundu jula jwajimwice, ŵandu wosope ŵala ali mkulola. Jwajigele macila gakwe gala ni ŵakopwece. Wosope ŵala ŵasimonjile mnope, ni ŵatandite kumlumba Mlungu ali mkusala kuti, “Uweji, nganituyiwoneje citandilile kala kose, yindu ya mtundu welewu.”

Yesu akumŵilanga Lefi

¹³ Yesu ŵajawile soni kungulugulu nyasa. Ŵandu ŵajinji ŵayice soni kukoko, jwalakwe ni ŵatandite kwajiganya.

¹⁴ Ali mkwenda mungulugulu nyasajo, Yesu ŵam'weni Lefi mwanace jwa Alifeyo, ali atemi m'nyumba ja kukomecesya msongo. Ŵamsalile kuti, “M'mweji, munguye une.” Jwalakwe jwajimwice, ni ŵamkuyisye.

¹⁵ Sambano Yesu piŵaliji mkulya yakulya m'nyumba mwa Lefijo, ŵapali ŵandu ŵakomesya misongo ŵajinji ni ŵandu ŵa ulemwa, nombe nawo ŵatemi pasi kulya nawo Yesu ni ŵakulijiganya* ŵakwe. Ŵapali ŵandu ŵajinji ŵiŵamkuyisye Yesu.

¹⁶ Aciŵalimu ŵa Malamusi* ŵa mwikuga lya Afalisi* piŵalolite kuti Yesu akulya ni ŵandu ŵa ulemwa, soni ni ŵandu ŵakomesya msongo, ŵawusisye ŵakulijiganya ŵakwe kuti, “Ligongo cici akulya pamo ni ŵakomesya misongo soni ni ŵandu ŵa ulemwa?”

¹⁷ Yesu piŵapikene yeleyo ŵajanjile kuti, “Ŵandu ŵangakulwala ŵangamsosa jwa mtela, nambo awo pewo ŵakulwala. Unetu nganiyika kukwaŵilanga ŵandu ŵakulungama, nambo ŵandu ŵa ulemwa.”

Kulijima kulya

¹⁸ Ndaŵi jine ŵakulijiganya ŵa Yohane M'batisi ni Afalisi ŵaliji mkulijima kulya.* Ŵandu ŵane ŵayice kwa Yesu ni ŵamwusisye kuti, “Ana ligongo cici ŵakulijiganya ŵa Yohane ni ŵakulijiganya ŵa Afalisi akusalijima kulya, nambo ŵakulijiganya ŵenu ŵangalijima kulya?”

¹⁹ Yesu ŵajanjile jemanjajo pakwawusya kuti, “Ana ŵaŵilanjidwe ku cindimba ca ulombela mpaka akombolece kulijima yakulya pa ndaŵi jali ni mlombela? Yangakomboleka! Naga msyene ulombela ali najo papopo, jemanjajo ngaŵa mkulijima yakulya.

²⁰ Nambo pitijiciyika ndaŵi jitacatyocesya mlombelajo. Ndaŵi jelejo ni jitacilijima yakulya.”

²¹ “Soni pangali mundu jwakusatotelela cigamba ca cakuwala casambano ni kucitotelela pa cakuwala cakalakala. Ligongo naga akutenda myoyo, cigamba ca nguwo ja sambano cila cikusakwinyata ni kunyocola cakuwala cakala cila, soni kupapuka kwakwe kukusaŵa kwakukulungwa kulekangana ni pandanda.

²² Soni pangali mundu jwakusataga finyo jwasambano mu misaku ja mapende gakalakala, ligongo naga akutenda myoyo, finyojo jukusawulisya misakujo, mwakuti finyojo pamo ni misakujo yikusajonasika. Nambo finyo jwasambano jukwenela kutajidwa mu misaku ja sambano.”

Lisiku lyakupumula lya Ayuda

²³ Pa lisiku line lyakupumula lya Ayuda, Yesu ŵaliji mkwenda kupitila m'migunda ja tiligu. Ali mkwenda myoyo, ŵakulijiganya ŵakwe ŵatandite kupulula masace ga tiligu ni kulyaga.

²⁴ Myoyo Afalisi ŵamwusisye Yesu kuti, “Ana ligongo cici ŵakulijiganya ŵenu akutenda yigakukana Malamusi kuyitenda pa lisiku lyakupumula?”*

²⁵ Yesu ŵajanjile kuti, “Ana nganimŵalanga yiŵatesile Daudi* pampepe ni acimjakwe pa ndaŵi jijakwete sala ni kusoŵa kandu kalikose?

²⁶ Jemanja jila ŵajinjile m'Nyumba ja AMBUJE ni kuja kulya mikate jakupelecedwa kwa Mlungu. Yeleyi yatendekwe pa ndaŵi jiŵaliji Abiyatala jwamkulungwa jwa ŵakutaga mbopesi* wosope. Mikate jelejo jaliji jangajenela kulidwa ni mundu jwine jwalijose, akaŵe ŵakutaga mbopesipe. Soni Daudijo ŵawugaŵenye mkatewo kwa acimjakwe ŵiŵaliji nawo ŵala.”

²⁷ Yesu pakupitilisya maloŵe, ŵasalile Afalisiwo kuti, “Mlungu ŵaŵisile lisiku lyakupumula kuti liŵe lya kwakamusya ŵandu. Nganiŵapanganya ŵandu kuti aŵe acikapolo ŵa lisiku lyakupumula.

²⁸ Myoyo Mwanace jwa Mundu akwete ulamusi wosope wakwayana ni yakwenela kuyitenda pa lisiku lyakupumula.”