Maliko 16 - Chiyawo Bible

Yesu ŵajimwice ku ŵawe

¹ Pilyamasile lisiku lyakupumula,* Maliya jwa ku Magadala, ni Maliya mamagwe Yakobo,* ni Salome ŵasumile mawuta gakununjila kuti akapakasye mtembo wa Yesu.*

² Kundaŵindaŵipe kwa lisiku lyandanda lya mlungu, lyakuyicisya Sabatojo jili jimasile, jemanjajo ŵajawile ku malembe kula, lyuŵa lili likopwece,

³ nambo mwitala ŵaliji mkuwusyana kuti, “Ana ŵani ŵitakatugundumucisye liganga pa mlango wa lilembe pala?”

⁴ Piŵalolecesye ŵaweni kuti ligangalyo lyaliji lyegundumusye kala pakuŵa ligangalyo lyaliji lyekulungwa mnope.

⁵ Piŵajinjile mwilembemo ŵam'weni mcanda ali atemi kumbali ja ku mkono wamlyo, ali awete mkanjo weswela, nipo jemanjajo ŵasimonjile mnope.

⁶ Nambo jwalakwejo ŵatite kuti, “Mkasimonga, ngumanyilila kuti mkumsosa Yesu jwa ku Nasaleti, juŵamkomele pa msalaba jula. Nganaŵa amuno; ajimwice ku ŵawe. Mlole aga gali malo giŵamŵisile jwalakwejo.

⁷ Jemanja mjawule mkasalile ŵakulijiganya* ŵakwe, kusyesyene Petulo,* kuti, ‘Yesu alongolele kwawula ku Galileya. Timkamwone kweleko mpela yiŵatite pakumsalila.’ ”

⁸ Pelepo acakongwewo ŵatyosile ku malembeko mwacitema, pakuti ŵagambaga kutetemela soni wakamwile woga. Nganamsalila mundu jwalijose kandu kalikose ligongo lyakuti ŵaliji mkogopa. [

Yesu akuwonecela kwa Maliya jwa ku Magadala

⁹ Yesu piŵajimwice ku ŵawe, kundaŵindaŵipe kwa lisiku lyandanda lya mlungu, pandanda ŵawonecele kwa Maliya jwa ku Magadala, jwejula juŵamkopwesye misimu jakusakala* msano ni jiŵili jula. Acakongwe ŵala ŵajile kwa Petulo ni acimjakwe ni kwasalila yosope yene yiŵasalilidwe.

¹⁰ Maliyajo ŵajawile kukwasalila ŵiŵatamaga ni Yesu ŵala, pandaŵijo jemanjajo cakamwile canasa soni ŵagambaga kulila. Piyamasile yeleyi, Yesu ŵatumisye utenga wakwe wa cikulupusyo cangamala kungopoko lyuŵa ni ngapilo lyuŵa kupitila mwa ŵakulijiganya ŵakwe.]

¹¹ Atamose kuti jemanjajo ŵaliji ali apikene kuti Yesu ali cijumi, soni kuti Maliyajo am'weni Yesujo, jemanjajo nganakulupilila.

Yesu akuwonecela kwa ŵakulijiganya ŵakwe ŵaŵili

¹² Kaneko Yesu, ali mkuwoneka mwakulekangana ni kala, ŵawonecele ŵakulijiganya ŵakwe ŵane ŵaŵili, ndaŵi jemanjajo ŵaliji pa ulendo kusa kwa msinda wa Yelusalemu.

¹³ Ŵakulijiganya ŵala ŵawujile kukwasalila acimjawo nambo nganiŵakulupilila jemanjajo.

Yesu akwatuma ŵakulijiganya ŵakwe

¹⁴ Pambesi pakwe Yesu ŵawonecele ŵakulijiganya likumi ni jumo ŵala ali mkulya. Yesu ŵajamwice jemanjajo ligongo lya ungakulupilila ni ungajiganyicika wawo, ligongo lyakuti jemanjajo nganiŵakulupilila acimjawo ŵiŵam'weni jwalakwejo ali ajimwice ku ŵawe.

¹⁵ Myoyo Yesu ŵasalile ŵakulijiganyawo kuti, “Mjawule ku cilambo cosope capasi mkalalicile ŵandu wosope Ngani Syambone.*

¹⁶ Jwele jutakakulupilile ni kubatisidwa, tacikulupuka, nambo jwangakulupililajo, tacilamulwa ni Mlungu kuti ali jwakulemwa.

¹⁷ Ŵakukulupilila taciŵa ali mkutenda yindu yakusimonjeka mpela ayi: tacikoposya misimu jakusakala pakulikolanga lina lyangu, soni taciŵecetaga yiŵeceto ya cilendo,*

¹⁸ soni naga akamwile lijoka kapena kumwa mtela wakuti mpaka kuwa nawo, ngasawulala kose. Naga akusajika magasa pa ŵandu ŵakulwala ŵanduwo tacipola.”

Yesu ŵajigalidwe kuja kwinani

¹⁹ Ambuje Yesu piŵamasile kuŵecetana nawo, ŵajigalidwe kwawula kwinani, nipo ŵajile kutama ku mkono wamlyo wa Mlungu.

²⁰ Ŵakulijiganya ŵala ŵapite mcilalicila Ngani Syambone palipose. Ambuje ŵaliji mkamula masengo pampepe nawo, ŵasimicisyaga kuti maloŵe giŵalalicilaga ŵakulijiganyawo galiji gakuwona, ni gawonecelaga mu yindu yakusimonjeka yiŵatendaga.] [