Maliko 12 - Chiyawo Bible

Citagu ca ŵamasengo ŵakulima mu mgunda wa yisogosi ya mpeleya

¹ Yesu* ŵatandite kuŵeceta nawo myitagu, acitiji kuti, “Jwapali mundu jwine juŵakwete mgunda wakwe. Mu mgundamo ŵapandilemo mipeleya, ni ŵataŵilemo uŵigo kusyungulila mgundawo. Ŵasokwele lisimbo lyakuti akamulisyeje masengo gakuminyilamo mpeleya, nipo soni ŵataŵile sanja jakulondela mgundawo. Kaneko mgunda wula ŵawujasimisye kwa ŵakulima, jwalakwe ni ŵapite ku cilambo cine kuŵatemiko yaka yejinji.

² Pijakwanile ndaŵi jakaŵa yisogosi, msyene jula ŵamtumile jwamasengo jwakwe kwa ŵakulima ŵala kuti akajigale mbuwa jakwe ja yisogosi ya mu mgunda mula.

³ Nambo ŵakulima mu mgunda ŵala ŵamkamwile jwamasengojo ni ŵamputile, ni kumjawusya ali ŵangali kandu kalikose.

⁴ Msyene jula ŵamtumisye soni jwamasengo jwine, nambo ŵandu ŵakulima ŵala ŵamkapile mu mtwe ni ŵamŵecetele maloŵe gakumnyosya.

⁵ Mundu jula ŵamtumile soni jwamasengo jwine, aju ni ŵagambile kumwulaga kwene. Ŵakulima ŵala ŵatendele yilayila soni ŵamasengo ŵane ŵajinji, ŵane ŵaputile ŵane kwawulaga kwene.

⁶ Mundu jula ŵagambile kusigala ni mwanace jwakwe jumo jusyesyene jwapamtima basi. Pakumalisya pasyesyene ŵamtumile jwalakweju, pakuti ŵaganisisye kuti, ‘Mwanangu peju takamcimbicisye.’

⁷ Nambo ŵandu ŵakulima ŵala ŵatandite kusalilana kuti, ‘Jweleju ni jutacimlecela cipanjeci. Kwende tumwulaje kuti ticiŵe cetu cipanjeci.’

⁸ Myoyo ŵamkamwile, ŵamwuleje ni ŵamponyisye kusa kwa mgundawo, ni ŵamwuleje.”

⁹ “Ana msyene mgunda wa mipeleya ula tacitenda cici? Nditu taciyika kukwawulaga ŵakulima ŵala, mgunda ula ni taciwujasimisya kwa ŵakulima ŵane.

¹⁰ Ana kapena nganimŵalanga Malemba gala gakuti: ‘Liganga liŵalikanile amisili ŵakuŵaka nyumba, lilyolyo lyaŵele liganga lyapandumba, lyakusosekwa mnope.

¹¹ Ambuje Mlungu ni uŵayitesile yeleyi, nipo yili yindu yakutusimonjesya uweji.’ ”

¹² Acakulungwa ŵa Ayuda* ŵamanyilile kuti citaguco Yesu ŵaliji mkwagamba jemanjajo, ni ŵalinjilile kuti amkamule, nambo ŵajogopaga ŵandu. Myoyo ŵagambile kumleka ni ŵatyosile.

Akumwusya Yesu ya kukoma msongo

¹³ Ŵandu ŵane ŵa mwikuga lya Afalisi* ni ŵane soni ŵa mcipani ca Helodi (Aseloti)* ŵatumidwe kuti akampale Yesu mkamwa.

¹⁴ Piŵayice kwa Yesu, ŵatite, “Cemwalimu, tukumanyilila kuti ŵalakwe akusasala yakuwona, soni ngakusamjogopa mundu jwalijose. Ngakusalola ngope kuti aŵa ŵani, nambo ŵalakwe akusajiganya Malamusi ga Mlungu mwakuwona. Nambi sambano, ana Malamusi ga Mlungu gakusakunda kuti tukomeje msongo kwa Mwenye jwa ku Loma,* kapena iyayi?”

¹⁵ “Ana tukomeje kapena tukakomaga?” Nambo pakusimanyilila nganisyo syawo syakunyenga ŵatite, “Ana ligongo cici mkulinga uneji melepe? Ambe mbiya, najilole.”

¹⁶ Jemanjajo ŵapelece mbiyajo. Myoyo jwalakwe ŵawusisye kuti, “Ana ngopeji ni linali ya ŵani?” Jemanja jila ŵatite, “Yosopeyi yili ya Mwenye jwa ku Loma.”

¹⁷ Pelepo Yesu ŵasalile kuti, “Sambano pelekani kwa Mwenye yayili yakwe ya Mwenye, soni yayili yakwe ya Mlungu myipeleceje kwa Mlungujo.” Ali apikene yeleyi ŵanduwo ŵamasile lunda.

Ya kwimuka soni ku ŵawe

¹⁸ Kaneko Asaduki* ŵane ŵayice kwa Yesu. Jemanjajo ŵatiji kuti ŵandu ŵakuwa ngasajimuka ku ŵawe. Ŵamwusisye Yesu kuti,

¹⁹ “Cemwalimu, Mose* ŵatulembele lilamusi lyakuti, ‘Naga jwamlume akuwa, ni kumleka jwamkongwe jwakwe ali jwangali ŵanace, mlongo mjakwe jwa mundu jwakuwajo amlombe jwamkongwejo kuti amŵelecele ŵanace mlongo mjakwe jula.’

²⁰ Nambo ŵapali acalume ŵane msano ni ŵaŵili ŵa pa ulongo. Jwandanda ŵamlombile jwamkongwe ni ŵawile mkinamŵelecele jwamkongwejo ŵanace.

²¹ Jwamlume jwaŵili ŵamjigele jwamkongwe jula, nombe najo ŵawile mkanakole mwanace. Yeleyi yatendekwe soni kwa jwamlume jwatatu jula.

²² Mpaka acalume msano ni ŵaŵili wosope ŵala ŵawile mkinamŵelecele jwamkongwejo ŵanace. Pambesi pakwe nombe najo jwamkongwe jula jwawile.

²³ Nambi sambano pa lisiku lyakwimuka ŵandu ku ŵawe, ana msyene jwamkongwejo taciŵa jwapi, pakuti ŵandu msano ni ŵaŵili ŵa pa ulongo ŵala, wosopewo ŵamlombile jwamkongwejo?”

²⁴ Yesu ŵajanjile kuti, “Mkulemwa ligongo ngamkumanyilila Malemba, atamose soni macili ga Mlungu.

²⁵ Pakuti pakwimuka ŵawe, pangali soni yakulombela kapena kulombedwa. Wosope taciŵa mpela malayika* kwinani.

²⁶ Sambano yakuti ŵandu tacijimuka ku ŵawe, ana nganimŵalanga m'buku ja Mose yakwamba liwukutu lilyakolelaga moto pala? Ana ngati akusala kuti Mlungu ŵamsalile Mose kuti, ‘Une ndili Mlungu jwa Abulahamu,* Isaki, ni Yakobo?’*

²⁷ Pelepo ni gopolela kuti Mlungu nganaŵa Mlungu jwa ŵandu ŵawe, nambo jwa ŵandu ŵacijumi. Jemanja Asaduki mli ŵandu ŵakulemwa mnope.”

Lilamusi lyekulungwa

²⁸ Mwalimu jwine jwa Malamusi ŵaliji papopo ni ŵapikene ali mkusisyana. Piŵalolite kuti Yesu ŵajanjile cenene Asaduki ŵala, ŵasejelele kuŵaliji Yesu ni ŵamwusisye kuti, “Ana mwa malamusi gosope lyekulungwa ni lyapi?”

²⁹ Yesu ŵamjanjile kuti, “Lilamusi lyekulungwa ni ali, ‘Pikanani jemanja Aisalaeli, Ambuje Mlungu jwetu, Jwalakwe pejo ni jwali Mlungu.

³⁰ Myoyo mumnonyeleje Ambuje Mlungu jwenu, ni mtima wenu wosope, ni umi wenu wosope ni lunda lwenu losope, ni macili genu gosope.’

³¹ Lilamusi lyaŵili ni ali, ‘Mumnonyeleje mjenu mpela yimkuti pakulinonyela mwasyene.’ Pangali lilamusi line lyakupunda malamusi gelega.”

³² Mwalimu jwa Malamusi ga Mose jula ŵatite, “Ŵalakwe Cemwalimu ajanjile cenene. Yili yakuwona, mpela mwaŵecetelemo kuti, Mlungu ali jumo pejo, pangali soni jwine akaŵe jwalakwe jikape basi.

³³ Atesile cenene soni pakusala kuti, cindu cakupunda mnope ni kumnonyela Mlungu ni mtima wosope, ni lunda losope, ni macili gosope, soni kumnonyela mjakwe mpela yiwukuti pakulinonyela ugwe msyene. Kutenda myoyo kuli kwakupundana ni kupeleka mbopesi syakutinisya sya nyama ni mbopesi sine syosope.”

³⁴ Piŵalolite Yesu kuti mundu jula ajanjile mwalunda, ŵamsalile kuti, “M'mwejo nganimŵa kwakutalicila ni Ucimwene wa Mlungu.”* Kutandilila pelepo paliji pangali soni mundu jwine juŵalinjile kumwusya yiwusyo.

Ciwusyo cakwamba Mwanace jwa Daudi

³⁵ Yesu piŵaliji mkwajiganya ŵandu M'nyumba ja Mlungu, ŵawusisye kuti, “Ana ligongo cici aciŵalimu ŵa Malamusi* akusala kuti Klistu* jula ali mwanace jwa Daudi?*

³⁶ Ni lunda lwakutyocela kwa Msimu Ŵaswela, Daudi ŵaŵecete kuti, ‘Ambuje ŵasalile Ambuje ŵangu kuti, mtame ku mkono wangu wamlyo, mpaka pitinatende amagongo ŵenu kuti aŵe mpela cakuliŵatila sajo syenu.’

³⁷ Naga Daudi msyesyenejo akumkolanga Mkulupusyo jwakulocesyedwa jula kuti ‘Ambujegwe,’ ana mpaka yikombolece uli kuti aŵe mwanace jwakwe?” Likuga lyekulungwa lyaliji kumpikanila Yesu mwakusangalala.

Yesu akwakalamusya ŵandu ya aciŵalimu ŵa Malamusi

³⁸ Yesu piŵajiganyaga ŵandu, ŵatiji, “Mkalamuce nawo aciŵalimu ŵa Malamusi. Akusanonyela kwenda ali awete mikanjo jelewu, ni cakulinga cakuti ŵandu ŵakomasyeje mwa ucimbicimbi m'misika.

³⁹ Akusanonyela mipando ja ucimbicimbi m'nyumba sya mapopelo* soni malo gakucimbicika ku yindimba.

⁴⁰ Nambo soni akwalila mbiya syawo acakongwe ŵamasije* ni kupopela mapopelo gamalewulewu mwakulambucisya. Ŵandu ŵeleŵa tacipocela cilango cekulungwa.”

Mbopesi ja jwamkongwe jwamasije

⁴¹ Yesu ŵatemi pasi mwakulolegana ni libokosi lyakupocelelamo mbiya syakupeleka ku Nyumba ja AMBUJE. Ŵaliji mkulolecesya mwele ŵandu muŵaliji mkuponyela mbiya syawo. Ŵandu ŵajinji ŵakusicila ŵaliji mkuponya mbiya syejinji.

⁴² Nambo ŵayice jwamkongwe jwine jwamasije jwakulaga. Jwalakweju jwagambile kuponya tumbiya tuŵili twa cisyano twa kopa.*

⁴³ Myoyo Yesu ŵaŵilasile ŵakulijiganya* ŵakwe ni ŵasalile kuti, “Kusyene ngumsalila kuti, jwamkongwe jwamasije jwakulagaju aponyisye kwapunda ŵandu ŵane wosopeŵa, ŵele ŵakuponya mwibokosimu.

⁴⁴ Ligongo ŵane wosopeŵa agambile kuponya syasapwile pewunjili lyakwete. Nambo jwamkongweju mwakulaga kwakwe, aponyise syosope siŵakwete, atamose syakasumile yakulya.”