Maliko 10 - Chiyawo Bible

Kumasya ulombela

¹ Yesu* ŵatyosile kumalo kula, ni ŵapite upande wa Yudeya ni pesi pa Lusulo lwa Yolodani. Ŵandu ŵajinji ŵasongene soni kwa jwalakwe, ni ŵatandite kwajiganya ŵanduwo mpela muŵatendelaga masiku gosope.

² Ŵayice Afalisi* ŵane, ni cakulinga cakuti ampatile ligongo ni ŵamwusisye kuti, “Ana Malamusi getu gakutukunda kuti jwamlume alekangane ulombela ni ŵamkwakwe?”

³ Nambo Yesu pakwanga ŵatite kuti, “Ana Mose* ŵamlamwile cici?”

⁴ Jemanjajo ŵajanjile kuti, “Mose ŵakundile kuti jwamlume ampeje jwamkwakwe cikalata cakulekanganila ulombela kaneko ni kuja kukwatula kumangwawo.”

⁵ Yesu ni ŵasalile jemanjajo kuti, “Mose ŵamlembele lyele lilamusili ligongo lyakumula mitima jenu ni ungajiganyicika wenu.

⁶ Nambotu pandanda pala, pa ndaŵi jiŵapanganyaga yindu yosope, ‘Mlungu ŵapanganyisye ŵandu ŵaŵili, jwamlume ni jwamkongwe,’ mpela mugakuŵecetela Malemba.

⁷ ‘Pa ligongo lyeleli jwamlume tacaleka babagwe ni mamagwe, ni tacilumbikana ni ŵamkwakwe,

⁸ nipo ŵaŵiliwo taciŵa cilu cimpepe.’ Myoyo sambano nganaŵa ŵaŵili nambo cilu cimo.

⁹ Sambano yindu yayilumbikenye Mlungu pampepe, mundu jwine akayilekanganya.”

¹⁰ Pa ndaŵi jiŵajinjile soni m'nyumba, ŵakulijiganya* ŵakwe ŵamwusisye soni Yesu ya ngani jijiji.

¹¹ Jwalakwe ŵasalile kuti, “Jwamlume jwalijose jwakwaleka ŵamkwakwe ulombela kwangaŵa ligongo lya cikululu, ni kulombela ŵane, akutenda cikululu.

¹² Naga jwamkongwe akumleka jwamlume jwakwe, kaneko ni kulombedwa ni jwamlume jwine, nombe najo akutenda cikululu.”

Yesu akwapa upile ŵanace

¹³ Ŵandu ŵane ŵayice ni ŵanace ŵawo kwa Yesu kuti jwalakwejo ŵasajice magasa ni kwapa upile, nambo ŵakulijiganya ŵakwe ŵakalipile ŵanduwo.

¹⁴ Yesu piŵalolite yeleyi, ŵadandawile ni ŵasalile ŵakulijiganyawo kuti, “Mwalece ŵanace ayice kwa une, mkasimwalekasya. Pakuti Ucimwene wa Mlungu* uli wa jemanjaji.

¹⁵ Kusyene ngumsalila kuti, jwalijose jwangakupocela Ucimwene wa Mlungu mpela mwanace, jwelejo ngasajinjila mu Ucimwene.”

¹⁶ Ali amasile kuŵeceta, ŵatandite kwajangata ŵanace m'makono mwawo, ŵasajice magasa ni ŵapele upile.

Mundu jwine jwakusicila

¹⁷ Ndaŵi jiŵatiji kuti Yesu anyakuce ajawuleje, mundu jumo ŵamwutucile. Ŵamtindiŵalile ni ŵatite kuti, “Cemwalimu ŵambone, ana ngwenela kutenda cici kuti ngapocele umi wangamala?”*

¹⁸ Yesu ŵamjanjile kuti, “Ana ligongo cici mkungolanga kuti jwambone? Mlungu jikape ni jwali jwambone.

¹⁹ Malamusi mkugamanyilila mpela: Mkawulaga, mkatenda cikululu, mkajiŵa, mkatenda umboni wa unami, mkamlambucisya mjenu, mkalambusya, mwacimbicisyeje baba ni mama ŵenu.”

²⁰ Mundu jula ŵajanjile kuti; “Cemwalimu, Malamusi gosopega mbele ndili mkugakuya kutandilila ndili mcanda.”

²¹ Yesu piŵamlolecesye mundu jula, ŵamnonyele ni ŵamsalile kuti, “Mkumsoŵape cindu cimo, mjawule, mkasumisye yindu yosope yimkwete, nipo mbiya syakwe mkasipelece kwa ŵandu ŵakulaga. Kaneko myice munguyeje.”

²² Mundu jula pijwapikene yeleyi, ngope jakwe jagwile, ni jwagambile kutyokapo yili yimpwetece mu mtima, ligongo jwaliji jwakusicila mnope.

²³ Yesu ŵalolite ŵakulijiganya ŵakwe ŵiŵamsyungulile ni ŵasalile kuti, “Cili cindu cakusawusya kuti mundu jwakusicila akajinjile mu Ucimwene wa Mlungu.”

²⁴ Ŵakulijiganyawo ŵasimonjile nago maloŵego. Nambo Yesu ŵawilisye soni kusala kuti, “Ngumsalila ŵanace ŵangu kuti cili cindu cakusawusya kuti mundu jwakusicila akajinjile mu Ucimwene wa Mlungu.

²⁵ Cili cindu cakusawusya kuti mundu jwakusicila akajinjile mu Ucimwene wa Mlungu, kulekangana ni kuti ngamila* jijinjile pebowo lya singano.”

²⁶ Pelepo ŵakulijiganya ŵala ŵasimonjile mnope, ni ŵatandite kuwusyana kuti, “Nambi ŵani ŵitakakulupuce?”

²⁷ Yesu ŵalolecesye jemanjajo ni ŵasalile kuti, “Yeleyi yili yangakomboleka ni ŵandu, nambo ni Mlungu, yindu yosope yili yakomboleka.”

²⁸ Kaneko Petulo* ŵatandite kuŵecetana ni Yesu kuti, “Alole, uwetu twalesile yosope ni kwakuya ŵalakwe.”

²⁹ Yesu ŵatite, “Kusyene, ngumsalila kuti jwalijose jwalesile mangwakwe, kapena acalongo acimjakwe, kapena mamagwe, kapena babagwe, kapena ŵanace ŵakwe, kapena migunda ligongo lya une, soni ligongo lya Ngani Syambonesi,

³⁰ jwalakwejo tacipocela yosopeyo yejinji, pacilambo capasi panopano. Tacikola mangwakwe gejinji, acalongo acimjakwe, mamagwe, ŵanace ni migunda, nambo mwa yisawusyo yejinji. Nambo pasogolo pakwe tacipocela umi wangamala.

³¹ Nambo ŵajinji ŵali ŵandanda sambano jino taciŵa ŵakumbesi, nipo ŵali ŵakumbesi sambano jino taciŵa ŵandanda.”

Yesu akusalila cile katatu ya ciwa ni kwimuka kwakwe ku ŵawe

³² Pa ndaŵi jiŵaliji pa ulendo wawo wakuja ku Yelusalemu, Yesu ŵajendaga pasogolo pa ŵakulijiganya ŵakwe. Ŵakulijiganya ŵakwewo ŵaliji ali ajasile mtima. Ŵandu ŵaŵakuyaga ŵala wakamwile woga nombe nawo. Yesu ŵaŵilasile soni ŵakulijiganya ŵakwe likumi ni ŵaŵili ŵala pambali ni ŵatandite kwasalila ya yindu yitiyicimwonecela jwalakwe.

³³ Ŵasalile kuti, “Tuli pa ulendo wakuja ku Yelusalemu, kweleko Mwanace jwa Mundu* akuja kupelecedwa kwa acakulungwa ŵa ŵakutaga mbopesi ni aciŵalimu ŵa malamusi.* Jemanjajo takamjimbe magambo ni kumlamula kuti awulajidwe. Ni takampelece kwa ŵandu ŵa mitundu jine.*

³⁴ Jemanjajo takamtende cipongwe, takamsunile mata, takamkwapule ni kumwulaga. Nambo gali gamasile masiku gatatu jwalakwejo tacijimuka ku ŵawe.”

Yakuŵenda ya Yakobo ni Yohane kwa Yesu

³⁵ Yakobo* ni Yohane* ŵanace ŵa Sebedayo ŵayice kwa Yesu. Ŵamsalile kuti, “Cemwalimu, uweji tuteje naga twaŵende kandu atutendele.”

³⁶ Yesu ŵawusisye kuti, “Ana jemanja mkusosa kuti namtendele cici?”

³⁷ Jemanjajo ŵajanjile kuti, “Tukusosa kuti pitacitama mlumbili lwa Ucimwene wawo, catuŵice uweji jwine ku mkono wawo wamlyo, jwine ku mkono wawo wamciji.”

³⁸ Nambo Yesu ŵatite, “Ngamkumanyilila yindu yimkuŵenda. Ana jemanja mpaka mpakombole kumwela nawo mgawo wa yipwetesi wele utinjimwela une? Ana jemanja mpaka mkombole kupocela ubatiso wa yisawusyo wele utinjipocela uneji?”

³⁹ Jemanja jila ŵajanjile kuti, “Elo, mpaka tupakombole.” Papopo Yesu ŵatite, “Yambone mgawo wele wunguja kukumwela, jemanja nombe timkamwe nawo, soni ubatiso wele unguja kupocela jemanja nombe timkapocele nawo.

⁴⁰ Nambo nganigaŵa masengo gangu gakumsagula mundu kuti atame ku mkono wangu wamlyo kapena wamciji. Mlungu ni jutacipeleka malo gelega kwa ŵandu wele jwalakwe msyene ŵiŵakolocesye.”

⁴¹ Piŵayipikene yeleyi ŵakulijiganya likumi ŵane ŵala, ŵapilile mtima Yakobo ni Yohane.

⁴² Nambo Yesu ŵaŵilasile ŵakulijiganya ŵakwewo, ni ŵasalile kuti, “Ana mkumanyilila kuti pasikati pa ŵandu ŵa mitundu jine, ŵandu ŵele ŵakusati ŵakulamula, akusiŵalila ŵandu ŵawo masuku pa mtwe. Acakulungwakulungwa ŵawo soni akusalosya macili gawo pa ŵandu ŵawo.

⁴³ Nambo pasikati penu, yindu yikaŵaga myoyo. Jwalijose jwakusosa kuŵa jwamkulungwa pasikati penu, aŵeje jwakutumicila jwenu.

⁴⁴ Jwalijose jwakusosa kuŵa jwakulongolela pasikati penu, aŵeje kapolo jwa wosope.

⁴⁵ Mtendeje mpela muŵatendele Mwanace jwa Mundu, jwalakwejo jwayice ngaŵa kuti ŵane amtumicile, nambo kuti jwalakwejo ŵatumicile ŵandu, ni kupeleka umi wakwe kuti ŵawombole ŵandu ŵajinji.”

Yesu akumposya mundu jwangalola

⁴⁶ Yesu ni ŵakulijiganya ŵakwe pamo ni likuga lyekulungwa lya ŵandu ŵayice ku msinda wa Yeliko. Pa ndaŵi jiŵakopokaga mu msindamo ŵasimene ni mundu jwine jwakuŵenda jwangalola, ali atemi pasi mungulugulu msewu. Mundujo lina lyakwe lyaliji Batimeyo mwanace jwa Timeyo.

⁴⁷ Jwalakwejo ali apikene kuti jwelejo ni Yesu jwa ku Nasaleti, ŵatandite kugumila kuti, “Ŵalakwe Yesu, Mwanace jwa Daudi,* andendele canasa.”

⁴⁸ Ŵandu ŵajinji ŵamjamwice kuti atame atulale. Nambo jwalakwejo jwagumisile mwakupundanganya acitiji kuti, “Ŵalakwe Mwanace jwa Daudi, andendele canasa.”

⁴⁹ Yesu ŵajimi, ni ŵasalile ŵanduwo kuti, “Mumŵilanje mundujo.” Ŵamŵilasile ni ŵamsalile kuti, “Sengwani, kwende jimukani, pakuti akumŵilanga.”

⁵⁰ Mwacitemacitema jwalakwejo ŵaciponyisye cakuliwunicila cakwe pasi, ni ŵanyakwice kuwutucila kwa Yesu.

⁵¹ Yesu ŵamwusisye kuti, “Ana mkusosa kuti ni mtendele cici?” Mundu jwangalola jula jwajanjile kuti, “Mwalimu, ngusosa nipakombole kulola.”

⁵² Yesu ŵamsalile kuti, “Cambone jawulagani kumangwenu cikulupi cenu cimposisye.” Ndaŵi jijojo mundujo ŵatandite kulola ni ŵaliji mkumkuya Yesu pa ulendo wakwe ula.