Mala 3 - Chiyawo Bible

¹ AMBUJE Ŵamaciligosope akuŵeceta kuti, “Tinjitumisya jwamtenga jwangu kuti akalinganyisye une litala. Kaneko mwacisisimucisya AMBUJE ŵimkwasosasosawo taciyika ku Nyumba jakwe. Jwamtenga jumkusosa kumwonajo taciyika ni kulalicila ya cilanga* cangu.”

² Ana ŵani utacipakombola kupimilila pa lisiku lyakwika kwakwe? Ana ŵani tacipakombola kwima pitaciwonecelapo? Taciŵa mpela moto wa paciwukutila wakusanyelenyendulila yisyano soni mpela sopo jwakulimbangana.

³ Tacitama pasi mpela jwa pa cipala jwakwenga silifa* nipo tacaswejesya Alefi mpela mwakusaswejelecesya golidi* ni silifa, mpaka ndaŵi jitacitanda kupeleka mbopesi syakwenela kwa AMBUJE.

⁴ Myoyo mbopesi syakusayika nasyo Ayuda ni ŵandu ŵa ku Yelusalemu sikusisyasangalasya AMBUJE, mpela muyaŵelaga kala.

⁵ AMBUJE Ŵamaciligosope akuŵeceta kuti, “Tinjimyicila pakuŵandika kuti tinamjimbe magambo. Myoyo tinjiŵeceta maloŵe gakusisyana ni ŵakutenda ya matipwi, ŵandu ŵacikululu, ŵakupeleka umboni wa unami, ŵakwajiŵila malipilo ŵamasengo ŵawo, ŵakwasawusya acakongwe ni ŵanace ŵamasije, ni ŵakwatendela acalendo yindu yangalumbana nipo soni ŵele ŵangamjogopa Une.

Ya kupeleka ya likumi

⁶ “Pakuti Une ndili AMBUJE, jwangacenga. Myoyo jemanja yisukulu ya Yakobo* nginimjonasika.

⁷ Kutandila masiku ga acinangolo ŵenu mŵele mli mkukasa malamusi gangu, soni nganimgasungaga. Naga jemanja mkuwujila kwa Une, Une soni tinjiwujila kwa jemanja. Ni yinguti Une AMBUJE Ŵamaciligosope. Nambo jemanja mkusawusya kuti, ‘Ana mpaka tuwujile uli kwa wawo?’

⁸ Une ngumwusya kuti, Ana mundu mpaka apakombole kumjiŵila Mlungu? Nambope jemanja mkusimunjiŵila. Jemanja mkusati, ‘Ana tukusitwajiŵila camtuli?’ Une nguti, mkusimunjiŵila pa yalikumi yenu ni mbopesi sine.

⁹ Jemanja mli ŵalwesece mtundu wenu wosope ligongo mkusimunjiŵila.

¹⁰ Jwalijose ayice ni ca likumi* cisyesyene ku Nyumba jangu, kuti mwelemo muŵe yakulya yejinji. Ni yinguti Une AMBUJE Ŵamaciligosope. Mlinje sambano, nipo mlole naga ngimbugula yipata yakwinani ni kumgwicisya upile wejinji.

¹¹ Tinjilekasya tuyilombo kuti tukalya mbeju syenu, mipeleya jenu ngasijileka kusogola. Ni yinguti Une AMBUJE Ŵamaciligosope.

¹² Myoyo ŵandu ŵa mitundu josope tacimkolanga jemanja ŵajaliwe, ligongo cilambo cenu ticiciŵa cambone kutama. Ni yinguti une AMBUJE Ŵamaciligosope.

Cilanga ca canasa ca Mlungu

¹³ “Mŵecete maloŵe gakupweteka kwa une,” ni yikuti une AMBUJE. “Nambo mkusati, ‘Ana twaŵecetele cici?’

¹⁴ Mŵecete kuti, ‘Kwatumicila AMBUJE kuli kwangali mate. Ana pana cici cakupata pakuya malamusi ga Mlungu Jwamaciligosope ni kulosyaga canasa pameso pakwe pa yele yitutesile uwe?

¹⁵ Nambo uwe tukuganisya kuti ŵandu ŵakulikwesya ni ŵali ŵakusangalala. Ŵandu ŵakutenda yakusakala ni yindu yangajenela cenene, nambo akusakulinga kuwusimana mtima kwa Mlungu pakutenda yindu yakusakala, atamose amtande Mlungu akusakulupuka nditu.’ ”

¹⁶ Sambano ŵandu ŵiŵajogopaga AMBUJE ŵatandite kuŵecetana, nipo AMBUJE ŵapikanilaga. Buku jacikumbukumbu jalembedwe pameso pakwe, jakusala ya ŵele ŵandu uŵajogopaga AMBUJE ni kulicimbicisya lina lyakwe.

¹⁷ AMBUJE Ŵamaciligosope akuti, “Ŵandu ŵelewo taciŵa ŵangu, taciŵa ŵanguŵangupe ŵakunonyelwa pa lisiku litinjilipanganya. Tinjatendela canasa mpela baba akusamtendela canasa mwanagwe jwamlume jwakusamtumicila jwalakwejo.

¹⁸ Pelepo timcilekanganya pasikati pa ŵandu ŵakulungama ni ŵangalumbana, pasikati pa ŵandu ŵakutumicila Mlungu ni ŵangamtumicila.”