Lute 3 - Chiyawo Bible

Ulombela wa Lute

¹ Lisiku line Naomi ŵamwusisye Lute kuti, “M'mwe mwanangu, ana ngaŵa yambone kuti mlombedwe ni ŵalume, kuti timkole musi wenu, soni kuti yindu yimjendeleje cenene?

² M'manyilile kuti Bowasi, ŵamasengo ŵakwe ŵa cakongwe ŵimwaliji nawo ku migunda, pa ndaŵi jimwawululaga balele* jila, ali mlongo mjetu. Sambano, mumbikanicisye yingusosa kumsalila. Ligulo lino jwalakweju taŵe ali mkuputa balele.

³ Myoyo mjoje cenene mwanangu, soni mpakale mawuta gambone gakununjila, nipo m'wale yakuwala yambone. Kaneko mjawule kumalo gakupwagulila balele, nambo akaja kumanyilila kuti m'mwejo mli kweleko, mpaka pitakamalisye kulya ni kumwa.

⁴ Pandaŵi jitajawuleje kukugona, mkalolecesye malo gitakagonego. Nipo ali mlugono, mkajawule ni kuyiwunukula yakuliwunucila yakwe ni mkagone kusajo syakwe. Jwalakwe takamsalile yakuti mkatende.”

⁵ Lute ŵajanjile kuti, “Tinayitende yosope yasasileyo.”

⁶ Myoyo Lute ŵajawile ku malo gakupwagulila balele nipo ŵatesile mpela muŵamsalile akwegwe ŵakwe ŵala.

⁷ Bowasi ali amalisisye kulya ni kumwa, ŵaliji wakusangalala, ni ŵajile kukugona pa mbali pa liwunjili lya balele. Lute ŵajawile mwakunyang'ama ni ŵasiwunukwile sajo sya Bowasi ni ŵagonile papopo.

⁸ Pakati cilo Bowasi ŵasisimwice ni ŵagalawice, nipo ŵasimonjile kumwona jwamkongwe ali agonile ku sajo syakwe.

⁹ Jwalakwe ŵawusisye kuti, “Ana m'mwe ŵani?” Jwalakwe ŵajanjile kuti, “AMBUJE,* une Lute. Une yice akuno ligongo ŵalakwe ali mlongo mjetu jwakwenela kusunga une. Conde alombe une.”

¹⁰ Bowasi ŵajanjile kuti, “AMBUJE ampe upile, mwanangu. Pakuti yambone yimtesile pakumalicisyayi, yipundile yandanda yimwatendele akwegwenu. Yikakombolece m'mwejo kwawula kwa acacanda ŵakusicila kapena ŵakulaga, nambo m'mwejo nganimtenda yeleyo.

¹¹ Myoyo mkasimdandawula mwanangu, une tinayitende yosope yimŵendileyo. Pakuti mundu jwalijose jwa m'musi awuno, akumanyilila kuti m'mwejo mli jwamkongwe jwambone.

¹² Yakuwona kuti une ndili jwa pa ulongo wenu jwakwenela kumsunga m'mwejo, nambo apali soni jwa pa ulongo wenu jusyesyene jwakumbunda uneji.

¹³ Mgone kunokuno cilo cino mpaka kundaŵi. Patikucepo tukamwusye jwalakwejo naga ali jwakomboleka kumsunga m'mwejo. Naga akakunde tiyikaŵe cenene. Nambo naga akakane, une ngulumbila pameso pa AMBUJE ŵangu ŵa umi, kuti tingamjigale ni kumsamalila. Sambano gonani mpaka ku ndaŵi.”

¹⁴ Myoyo Lute ŵagonile ku sajo sya Bowasi mpaka kundaŵi, nambo ŵajimwice kumasikusiku, ligongo Bowasi nginasosa kuti mundu jwalijose amanyilile kuti jwalakwejo ŵaliji kweleko.

¹⁵ Bowasi ŵatite kwa jwalakwe, “Myice najo akuno nguwo jimlijandilejo ni mjitandice pasi.” Lute ŵajitandice nguwojo pasi, nipo Bowasi ŵalinjile balele jwa makilogalamu gaŵili, ni ŵamkusulile panguwo jila, ni ŵamkamucisye kumtwika Lute pekoyo. Kaneko Lute ŵawujile ku musi ni yakulyayo.

¹⁶ Piŵayice kumusi, akwegwe ŵakwe ŵala ŵamwusisye kuti, “Mjesile uli, mwanangu?” Lute ŵasalile akwegwe ŵakwe ŵala, yindu yosope yiŵatesile Bowasi kwa jwalakwejo.

¹⁷ Ŵatite soni kuti, “Bowasi ŵasalile kuti, ‘Mkajawula kwa akwegwe ŵenu yalayalape’ myoyo ambele baleleju.”

¹⁸ Naomi ŵajanjile kuti, “Mjembeceye mwanangu, tulole mbesi jakwe ja yele yinduyi, ligongo ngumanyilila kuti Bowasi ngalecela papopo, nambo tayikolosye yele yinduyo lelo.”