Lute 2 - Chiyawo Bible

Lute akuwulula mu mgunda wa Bowasi

¹ Naomi ŵakwete mlongo mjakwe jwakusicila mnope lina lyakwe Bowasi, jwa mwiŵasa lya malemu Elimeleki ŵamkwakwe ŵala.

² Lisiku line Lute ŵamsalile Naomi kuti, “Angunde njawule ku migunda kuti ngawulule balele* ku mgunda wa mundu jwalijose jutakasalalile mtima.” Myoyo Naomi ŵamsalile kuti, “Jawulani mwanangu.”

³ Myoyo Lute ŵapite ku kuwulula ku migunda, jiŵamasile ŵandu kugowola. Mwa upile, yagambile kutendeka kuti ŵajile kwika ku mgunda wa Bowasi, juŵaliji jwa mwiŵasa lya Elimeleki.

⁴ Mwangakaŵa Bowasi ŵayice kutyocela ku Betelehemu nipo ŵakomasisye ŵamasengo ŵagowola ŵala kuti, “AMBUJE* aŵe ni jemanja.” Jemanjajo ŵajanjile kuti, “AMBUJE ŵape upile wawojo.”

⁵ Bowasi ŵamwusisye kapitawo jwakwe juŵalolelaga ŵandu ŵagowola ŵala kuti, “Ana ŵakongwewo ŵani?”

⁶ Kapitawo jula jwajanjile kuti, “Ŵele ŵakongwewo atyocele ku Mowabu, ŵayice akuno ni Naomi piŵawujaga.

⁷ Jwalakweju ambendile kuti nakunde kuti awululeje balele mu mgunda wagowele kala ŵa masengoŵa. Aŵele ali mkuwulula kutandila kundaŵindaŵipe mpaka sambano jino, ngapumula amta panandi.”

⁸ Kaneko Bowasi ŵamsalile Lute kuti, “Pikanani mwanangu, mkasimjawula kuja kuwulula ku mgunda wine, mkawuleka mgunda awuno, nambo mŵandikaneje ni acakongwe ŵakugowola amunoŵa,

⁹ mwalolecesyeje mgunda wakugowola, ni mwakuyeje munyuma mwawo. Nasalile acacanda ŵangu kuti akamsawusya m'mwejo. Nipo naga jimkole njota, m'mweje nawo mesi gatecile acacandawo mu ulo syawo.”

¹⁰ Lute ŵajinamisye ngope jakwe pasi, ni ŵatite kwa Bowasi, “Ligongo cici akundendela une yindu yambone camti myiyi, ligongo cici wawojo akuŵa ŵambone mtima kwa une jwakuŵa mlendo?”

¹¹ Bowasi ŵajanjile kuti, “Une mbikene yosope yene yimwatendele m'mwejo akwegwenu ciwile ŵamkwenu. Ngumanyilila yimtesile m'mwejo pakwaleka baba ŵenu ni mama ŵenu ni cilambo cakumangwenu, nipo yimtite pakwika kukutama pasikati pa ŵandu ŵimkanimwamanya ni kala kose.

¹² AMBUJE amlipile m'mwejo pa yambone yosope yimtesileyo. AMBUJE Mlungu jwakusamlambila Aisalaeli amlipile m'mwejo kwakwanila, pakuŵa myice kwa jwalakwe kuti amcinjilicisye!”

¹³ Lute ŵajanjile kuti, “Wawo Ambuje, ali mundu jwambone mtima mnope. Asangalesye, soni aŵecete mwakundendela une canasa, atamose kuti nganimba jumo jwa ŵamasengo ŵawo.”

¹⁴ Ndaŵi jakulya Bowasi ŵamsalile Lute kuti, “Yikani akuno, kuti mlye nawo mkate, ni kupamba mbamu jenu mu msusi wa finyo.” Myoyo jwalakwe ŵatemi ciŵandika ni ŵamasengo ŵala, nipo Bowasi ŵapelece kwa jwalakwe balele jwamkalanje. Ŵalile mpaka ŵajikwite, nipo balele jwine jwasigele.

¹⁵ Piŵatyosile kwawula kukuwulula balele, Bowasi ŵalamwile ŵamasengo ŵakwe ŵala kuti, “Amlece jwamkongwejo ajigaleje atamose balele jwali pasikati pa matita nipo akamlekasya.

¹⁶ Konjecesya pelepo, aswekuleje balele jwine jwali m'matita ni kumlecela jwalakwe kuti alokoteje.”

¹⁷ Myoyo Lute ŵapitilisye kuwulula balele mu mgundamo mpaka ligulo, piŵaputile balelejo, ŵapatile ciŵandika makilogalamu likumi.

¹⁸ Ŵajigele balelejo kwawula najo ku musi, ni ŵajile kwalosya akwegwe ŵawo ŵala. Ali atesile myoyo, ŵakopwesye yakulya yiyasigele yila, ni ŵapele akwegwe ŵawo ŵala.

¹⁹ Naomi ŵamwusisye kuti, “Ana mwajile kuwulula kwapi balele josopeju? Mwulwileje mu mgunda waceni? Mlungu ampe upile mundu jwa mtendele m'mwejo canasa.” Myoyo Lute ŵasalile kuti ŵawululaga mu mgunda wa mundu jwine lina lyakwe Bowasi.

²⁰ Naomi ŵatite kuti, “AMBUJE, ŵele ŵakusasunga cilanga* cakwe kwa ŵandu ŵacijumi ni soni kwa ŵandu ŵawe, ampe upile mundu jwelejo.” Ŵapitilisye kuŵeceta kuti, “Mlungu ampe upile Bowasi. AMBUJE akusasunga cilanga cakwe kwa ŵandu ŵa umi ni ŵawe.” Ŵaŵecete soni kuti, “Mundu jwelejo ali jumo mwa acalongo acimjetu, jwakwete udindo ŵakutulolela uweji.”

²¹ Myoyo Lute ŵasalile akwegwe ŵawo ŵala kuti, “Cakunonyelesya mnope cili cakuti, mundujo ŵasalile une kuti mbitilisye kuwulula balele ni ŵamasengo ŵakwe mpaka kumalisya kugowola.”

²² Naomi ŵatite kwa Lute, “Yakuwona mwanangu, kuli cenene kuti m'mwejo mlonganeje ni acakongwe ŵamasengo ŵa mu mgunda wa Bowasi. Kogopela ni mkaŵa kumtenda cipongwe naga mli mjawile ku mgunda wa mundu jwine.”

²³ Myoyo Lute ŵakuyaga ŵamasengo ŵa Bowasi ni ŵaliji mkuwulula mpaka ŵandu ŵamalisisye kukata balele ni tiligu. Lute ŵapitilisye kutama ni akwegwe ŵakwe ŵala.