Lute 1 - Chiyawo Bible

Elimeleki ni liŵasa lyakwe akwawula ku Mowabu

¹ Kalakala, cilambo ca Isalaeli mkanicikole mwenye, kwaliji kwana sala. Myoyo mundu jwine jwa ku Betelehemu mcilambo ca Yudeya ŵapite ni ŵamkwakwe, ni ŵanace ŵakwe ŵacalume ŵaŵili kuja kutama nawo ku Mowabu kwandaŵi ja panandi.

² Mundujo jwaliji Elimeleki, ŵamkwakwe ŵaliji Naomi. Ŵanace ŵaŵili ŵacalumewo ŵaliji Maloni ni Kiliyoni. Wosopeŵa ŵaliji ŵakutyocela ku lukosyo lwa Efulati ŵa ku Betelehemu mcilambo ca Yuda, nambo ŵapite ku Mowabu ni kuja kutama kweleko.

³ Sambano Elimeleki ŵamkwakwe ŵa Naomi ŵawile, nipo Naomi ŵasigele jikape ni ŵanace ŵakwe ŵaŵili ŵacalume ŵala.

⁴ Jemanjaji ŵalombele acakongwe ŵa ku Mowabu, Olipa ni Lute. Ŵatemi ku Mowabuko yaka likumi.

⁵ Nombe nawo Maloni ni Kiliyoni ŵawile, nipo Naomi ŵagambile kusigala jikajikape ali ŵangali ŵalume kapena ŵanace ŵacalume.

Naomi ni Lute akuwujila ku Betelehemu

⁶ Pali papite ndaŵi Naomi ŵapikene kuti AMBUJE* ŵapele upile ŵandu ŵakwe pakwapa yakugowola yejinji, myoyo ŵatyosile ku Mowabu pamo ni acakwegwe ŵakwe ŵaŵili ŵala.

⁷ Ŵawutandite ulendo wosope yalumo wakuwujila ku cilambo ca Yuda, nambo ali petala,

⁸ Naomi ŵasalile acakwegwe ŵakwe ŵala kuti, “Jemanja mwujilile, jwalijose ajawule kwa mamagwe. AMBUJE amtendele yindu yambone jemanja, mpela mwele mumwatendele malemu ŵala soni ni une jwakwe.

⁹ AMBUJE amkamucisye kuti jemanja mlombedwe soni mkole malo gakutama.” Myoyo Naomi ŵalanjile jemanjajo. Nambo jemanjajo ŵatandite kulila mwakwesya maloŵe,

¹⁰ ni ŵatite kwa Naomijo kuti, “Iyayi, uwe citujawule ni m'mwejo kwa ŵandu ŵakumangwenu.”

¹¹ Naomi ŵajanjile kuti, “Pepani ŵanace ŵangu, nditu ujilani kumangwenu. Ligongo cici mkusosa kulongana ni une? Ana mkuganisya kuti mpaka mbelece soni ŵanace ŵacalume wakuti mpaka amlombe jemanja?

¹² Conde ujilani ŵanace ŵangu kumusi, pakuŵa une njekulwipe mnope ngaŵa mkulombedwa soni. Atamose ngajile kuti cikulupi cipali cakulombedwa, ni kutama malo gamo ni ŵalume cilo cino, kuti mbelece ŵanace ŵacalume,

¹³ ana jemanja mkapakombwele kwembecela kuti mpaka akule? Ana mkalesile kulombedwa ni ŵandu ŵane, kwajembeceya ŵanacewo? Iyayi, ŵanace ŵangu, jemanja mkumanyilila kuti yeleyo yangakomboleka. AMBUJE ni ŵasosile kuti une ndaje, nipo une ngumtendela jemanja canasa mnope.”

¹⁴ Pelepo jemanja jila ŵatandite soni kulila. Kaneko Olipa ŵalanjile akwegwe ŵawo ŵala, ni ŵawujile kumusi, nambo Lute ŵakanilile.

¹⁵ Myoyo Naomi ŵamsalile Lute kuti, “Mlongo mjenu awujile kumangwawo ni kwa mlungu jwakwe. Nomwe ŵakwe ujilani mwakuye alongo ajenuwo.”

¹⁶ Nambo Lute ŵajanjile kuti, “Akasanjisya kuti une nalece wawojo. Andece, pakuŵa kwakwawula wawojo, none jwakwe tinjawule kukoko, soni kutakatame wawojo none jwakwe tingatame kukoko. Acalongo acimjawo none jwakwe takaŵe acalongo acimjangu, nipo Mlungu jwa wawojo none jwakwe taciŵa Mlungu jwangu.

¹⁷ Kulikose kutakawile ŵalakwe none jwakwe tingawile kukoko, ni takasice une mwilembe kukoko. AMBUJE tandendele une cindu cakusakala cilicose, atamose ciŵe cacikulungwa camtuli, pangali kandu kane kalikose kakutulekanganya, akaŵe ciwa.”

¹⁸ Piŵayiweni Naomi kuti Lute ŵalipelece ni mtima wosope wene kulongana nawo, ŵamlesile ngamcisya soni kuti awujile.

¹⁹ Myoyo ŵaŵiliwo ŵapitilisye ulendo wawo, mpaka ŵajile kwika ku Betelehemu. Piŵayice ku Betelehemuko, ŵandu wosope ŵa m'musimo ŵasimonjile, nipo acakongwe ŵane ŵawusisye kuti, “Ana jweleju Naomi?”

²⁰ Naomi ŵajanjile kuti, “Akangolanga une kuti Naomi, nambo angolanje une kuti Mala, pakuti Mlungu Jwamaciligosope awutesile umi wangu kuti usimane ni yipwetesi.

²¹ Pinatyokaga akuno nakwete katundu jwamjinji, nambo AMBUJE ambusisye akuno ndili jwangali kandu kalikose. Myoyo, cakungolanjila uneji kuti Naomi ni cici, kutendaga AMBUJE Ŵamaciligosope ali ambele yisawusyo yekulungwa yakogoya?”

²² Amu ni mwele muŵawujile Naomi kutyocela ku Mowabu pamo ni Lute, mkwegwe gwawo jwa ku Mowabu jula. Ŵayice ku Betelehemu mu ndaŵi jakata mbeju jakolanjidwa balele.*