Luka 9 - Chiyawo Bible

Yesu akwatuma ŵakulijiganya likumi ni ŵaŵili

¹ Yesu* ŵaŵilasile ŵakulijiganya* ŵakwe likumi ni ŵaŵili ŵala pampepe ni ŵapele ulamusi ni macili gakopocesya misimu jakusakala* ni kuposya yilwele.

² Kaneko ŵatumile ŵakulijiganyawo kuti akalalicile ya Ucimwene wa Mlungu* ni kwaposya ŵandu ŵakulwala.

³ Yesu ŵasalile jemanjajo kuti, “Mkajigala kandu kalikose pa ulendo. Mkajigala simbo, msaku, yakulya, mbiya atamose malaja gapadela.

⁴ Ku nyumba jilijose kutakampoceleko, mkatame kweleko mpaka pa ndaŵi jitimtyoce mu msindawo.

⁵ Naga ŵandu ngakuja kumpocela jemanja, mkakung'unde luwundu lwa ku sajo kwenu pa ndaŵi jitimkatyoceje mu msindamo, kuti ukaŵe umboni wakwasisya jemanjajo.”

⁶ Ŵakulijiganya ŵala ŵatyosile ni ŵapite m'misi josope acilalicilaga Ngani Syambone* ni kwaposya ŵandu ŵane m'malo mosope.

Kusimonga kwa Helodi

⁷ Helodi* jwakulamulila jwa ku upande wa Galileya piŵapikene ŵandu ali mkuŵeceta yiyatendekwe yila yamasisye lunda, ligongo ŵandu ŵane ŵatiji kuti Yohane* M'batisi ŵajimwice ku ŵawe.

⁸ Ŵandu ŵane ŵaliji mkuŵeceta kuti, Eliya* awonecele soni, nambo ŵane ŵatiji ali jumo jwa ŵakulocesya ŵakala aŵele soni cijumi.

⁹ Nambo Helodi ŵatite kuti, “Yohane namkatile mtwe, nambi jweleju nduni jungupikana yakusimonjesya yakweju?” Myoyo Helodi ŵaliji mkulinjilila kuti awonegane ni Yesu.

Yesu ŵalisisye ŵandu 5,000

¹⁰ Piŵawusile ŵandumetume ŵala, ŵamsalile Yesu yosope yiŵatesile jemanjajo. Kaneko Yesu ŵajigele jemanjajo ni ŵapite ku musi wine ŵakuŵilanjidwa kuti Betisaida kuŵatiji akatame jikape.

¹¹ Ŵandu ŵajinji piŵapikene yeleyi ŵamkuyisye jwalakwejo. Yesu ŵapocele wosopewo, ni ŵaŵecete nawo ya Ucimwene wa Mlungu ni kwaposya ŵandu wosope ŵiŵaliji mkulwala.

¹² Pilyatandaga kukapila lyuŵa, ŵakulijiganya likumi ni ŵaŵili ŵala ŵamsalile Yesu kuti, “Ŵasalile ŵanduŵa kuti ajawulanganeje ku misi jili pakuŵandika kuti akapate yakulya soni malo gagona ligongo akuno kwitinji.”

¹³ Nambo Yesu ŵasalile jemanjajo kuti, “Jemanja mwape yakulya.” Jemanjajo ŵajanjile kuti, “Tukwete mikate msano ni somba siŵilipe. Ana tujawule tukasumile ŵandu wosopeŵa yakulya?”

¹⁴ Kweleko kwaliji kwana acalume ciŵandika 5,000. Myoyo Yesu ŵasalile ŵakulijiganya ŵakwe kuti, “Mwasalile ŵanduŵa kuti atame pasi m'makuga, likuga lililyose liŵe lya ŵandu makumi msano.”

¹⁵ Ŵakulijiganya ŵala ŵasalile ŵandu ŵala kuti atame pasi.

¹⁶ Kaneko Yesu ŵajigele mikate msano jila ni somba siŵili sila, ŵalolite kwinani ni ŵayipele upile, kaneko ŵagaŵenyegaŵenye mikate ni somba siŵili sila ni ŵapele ŵakulijiganya ŵakwe kuti ŵapeleganye ŵanduwo m'mawunjilimo.

¹⁷ Ŵandu wosope ŵala ŵalile mpaka kwikuta. Ŵakulijiganya ŵa Yesu ŵalokotenye sigasiga ni ŵagumbesye ngalala likumi ni siŵili.

Yiŵaŵecete Petulo ya Yesu

¹⁸ Lisiku line Yesu piŵaliji mkupopela pa malo gajikape, ŵakulijiganya ŵakwe ŵayice kuŵaliji jwalakwejo. Kaneko Yesu ŵawusisye jemanjajo kuti, “Ana ŵandu akusatiji une ŵani?”

¹⁹ Jemanjajo ŵajanjile kuti, “Ŵane akusatiga ŵalakwe ali Yohane M'batisi, ŵane akusatiga ŵalakwe ali Eliya. Nambo ŵane soni akusati ŵalakwe ali jumo jwa ŵakulocesya ŵa kalakala ŵajimwice ku ŵawe.”

²⁰ Kaneko Yesu ŵawusisye soni kuti, “Nambi jemanja mkusati une ndili ŵani?” Petulo* ŵajanjile kuti, “Ŵalakwe ali Klistu* jwakutyocela kwa Mlungu.”

Yesu akuŵeceta ya kulaga ni ciwa cakwe

²¹ Kaneko Yesu ŵalamwile ŵakulijiganya ŵakwe kuti akamsalila mundu jwalijose ya nganiji.

²² Ŵasalile ŵakulijiganyawo kuti, “Mwanace jwa Mundu* akwenela kulaga mnope ni kukanidwa ni acakulungwa ŵa ŵakutaga mbopesi ni aciŵalimu ŵa Malamusi* ga Ciyuda giŵalembile Mose.* Jwalakwejo taciwulajidwa nambo pa lisiku lyatatu tacijimuka ku ŵawe.”

²³ Kaneko Yesu ŵasalile ŵandu wosope ŵala kuti, “Naga mundu jwalijose akusaka kuŵa jwakunguya une akwenela kuleka yiwukusaka mtima wakwe, nipo anyakuleje msalaba wakwe lisiku ni lisiku ni kunguya.

²⁴ Naga mundu jwalijose akusaka kuwukulupusya umi wakwe, taciwujasa, nambo jwalijose jwakwasa umi wakwe ligongo lya une taciwukulupusya.

²⁵ Ana mundu tapindule cici naga akwete yindu yosope ya pa cilambo capasi pano, nambo pambesi pakwe ni kwasa umi wakwe?

²⁶ Naga mundu akutenda soni ligongo lya une ni kulalicila maloŵe gangu, nombe uneji Mwanace jwa Mundu tinjimtendela soni jwalakwejo pa ndaŵi jitaciyika mundujo mlumbili lwakwe ni mlumbili lwa Atati ŵakwinani pampepe ni acimalayika ŵaswela.

²⁷ Nambo kusyene ngumsalicisya jemanja kuti apali ŵandu ŵane panopano ŵele ngasawa mkinawuwone Ucimwene wa Mlungu.”

Ya ugalawuce wa uwonece wa ngope ja Yesu petumbi

²⁸ Pigamasile masiku msano ni gatatu ciŵecetele Yesu gele maloŵega, jwalakwejo ŵakwesile litumbi kukupopela pamo ni Petulo, Yakobo* ni Yohane.

²⁹ Pandaŵi jiŵaliji mkupopela, uwonece wa ngope ja Yesu wasindile, ni yakuwala yakwe yawonekaga mwakunyesima mnope pa jele ndaŵiji.

³⁰ Mwacisisimucisya, ŵakulocesya ŵaŵili Mose ni Eliya ŵaliji piŵaliji Yesupo nipo ŵaliji mkuŵecetana ni jwalakwejo. Jemanjajo ŵaliji Mose ni Eliya,

³¹ uŵalilosisye mu lumbili, nipo ŵaliji mkuŵecetana ni Yesu kwambaga ya ciwa cakwe ciŵatiji akawile ku Yelusalemu.

³² Petulo pampepe ni acimjakwe ŵaŵaliji nawo ŵala ŵaliji mkugwesela. Nambo piŵajimwice ŵam'weni Yesu mu lumbili lwakwe nambo soni acalume ŵaŵili ŵiŵajimi pamo ni jwalakwejo.

³³ Pandaŵi jele Mose ni Eliya jiŵalekanganaga ni Yesu, Petulo ŵamsalile Yesu kuti, “Cemwalimu, yili cenene kuti uweji tuli nawo apano. Atukunde tutaŵe yisakasa yitatu, cimo ca ŵalakwe, cimo ca Mose, ni cine ca Eliya.” Nambo Petulowo nganamanyilila kose gopolela kwa maloŵe giŵaŵecetego.

³⁴ Petulo piŵaliji mkuŵeceta gele maloŵega, lyayice liwunde lyawunicile jemanjajo wosope, nipo ŵakulijiganyawo ŵakamwilwe ni woga.

³⁵ Mwiwundemo mwapikanice maloŵe gakuti, “Aju ni mwanangu junimsagwile, mumpikanileje.”

³⁶ Gali gapikanice maloŵego, ŵakulijiganya ŵala ŵaweni kuti Yesu ali jikape. Myoyo jemanjajo ŵatemi jii ngamsalila mundu jwalijose yiyatendekweyo.

Yesu akumposya mcanda juŵakamwilwe ni msimu wakusakala

³⁷ Kundaŵi kwakwe Yesu ni ŵakulijiganya ŵakwe ŵatatu ŵala ŵatulwice kutyocela mwitumbi mula nipo ŵandu ŵajinji ŵayice kuti asimane najo jwalakwejo.

³⁸ Mundu jwine sikati ja ŵanduwo ŵaŵecete mwakwesya maloŵe acitiji kuti, “Cemwalimu, ngwaŵenda kuti amlole mwanangu jwali jumo peju.

³⁹ Jwalakweju akwete msimu wakusakala, naga umkamwile, jwalakweju akusatanda kugumila mwakusisimucisya. Sambano naga uli umgalagatisye mnope, mwanacejo akusagamba kopoka ciwulo kukamwa, soni msimu wakusakalawo wangamleka jwalakwejo mpaka uli umpwetece.

⁴⁰ Naŵendile ŵakulijiganya ŵawo kuti awukoposye msimu wakusakalawo mwa mwanaceju, nambo alepele.”

⁴¹ Yesu ŵajanjile kuti, “Aa! Ŵandu ŵa mpago awuno ŵangali cikulupi soni ŵangalondeka nganisyo. Ana tindame namwe ni kumpilila jemanja mpaka cakaci?” Papopo ni ŵamsalile mundu jula kuti, “Myice najo akuno mwanacejo.”

⁴² Piŵaliji mkwisa najo mwanacejo msimu wakusakalawo wamgwisisye pasi ni kumgalagatisya mwamacili. Yesu ŵawulamwile msimu wakusakalawo kuti umlece mwanacejo. Yesu piŵamposisye mwanacejo ŵampelece kwa babagwe.

⁴³ Ŵandu wosope ŵiŵaliji pelepo ŵasimonjile nago macili ga Mlungu. Ŵandu wosope ŵala piŵaliji mkusimongape pa yindu yosope yiŵatesile Yesu, Jwalakwe ŵasalile ŵakulijiganya ŵakwe kuti,

Yesu ŵaŵecete soni ya ciwa cakwe

⁴⁴ “Mgapikanicisye cenene maloŵe ganguga: Mwanace jwa Mundu tacipelecedwa myala mwa ŵandu.”

⁴⁵ Nambo ŵakulijiganyawo nganapikanicisya gopolela kwa maloŵe giŵaŵecete Yesu. Maloŵega galiji gakusisika kwa jemanjajo mwakuti nganapikanicisya. Myoyo jemanjajo ŵajogopaga kumwusya jwalakwejo ya yeleyi.

Jwamkulungwa nduni?

⁴⁶ Ŵakulijiganya ŵatandite kusisyana kuti, “Ana ŵani ŵali ŵakulungwa pasikati petu?”

⁴⁷ Nambo Yesu ŵamanyilile yiŵaganisyaga jemanjajo m'mitima mwawo. Myoyo Yesu ŵamjigele mwanace ni kumjimika pambali pakwe.

⁴⁸ Kaneko ŵasalile ŵakulijiganya ŵakwe ŵala kuti, “Jwalijose jwakumpocela cenene mwanaceju ligongo lyakuti jwalakwejo ali jwakunguya une ni kuti akumbocela une. Jwakumbocela une cenene ni kuti soni akwapocela Atati ŵiŵandumile une. Pakuti jwali jwamnondi pasikati penu jwalakwejo ali jwamkulungwa.”

Jwangakusisyana ni jemanja ali jwakukamusyana namwe

⁴⁹ Yohane ŵatite, “Cemwalimu, twam'weni mundu jwine ali mkukoposya misimu jakusakala pakukolanga lina lya ŵalakwe. Uwe twamlekasisye ligongo jwalakwejo nganaŵa jwakwakuya ŵalakwe mpela mutukusatendela uwe.”

⁵⁰ Nambo Yesu ŵamsalile Yohane kuti, “Mkasimumlekasya ligongo jwangakusisyana ni jemanja, jwelejo ali jwakukamusyana namwe.”

Ŵandu ŵa m'musi wa ku Samaliya ŵakanile kumpocela Yesu

⁵¹ Masiku pigaŵandicilaga gakuti Yesu ajigalidwe kwawula kwinani, jwalakwejo ŵaganisisye yakuti ajawule ku msinda wa Yelusalemu.

⁵² Ŵatumile ŵa mitenga kuti alongolele, akajinjile m'musi wine wa ŵandu ŵa ku Samaliya kuti akamkolocesye jwalakwejo malo gagona.

⁵³ Nambo ŵandu kweleko nganasaka kumpocela, ligongo jwalakwejo ŵaliji pa ulendo wa ku Yelusalemu.

⁵⁴ Piŵayiweni yeleyi ŵakulijiganya ŵakwe ŵaŵili ŵala Yakobo ni Yohane ŵatite, “Ambuje, ana akusaka kuti tuŵilasye moto kutyocela kwinani kuti watinisye ŵanduŵa?”

⁵⁵ Nambo Yesu ŵagalawucile jemanjajo ni kwajamuka.

⁵⁶ Kaneko wosopewo ŵajile ku musi wine.

Ya kumkuya Yesu

⁵⁷ Jemanjajo piŵaliji mkwenda mwitala mundu jwine ŵamsalile Yesu kuti, “Cemwalimu, tinakuye kulikose kutajawuleje.”

⁵⁸ Yesu ŵatite, “Makule gakwete mbanga syakwe, soni yijuni yikwete yisusi yakwe, nambo Mwanace jwa Mundu nganakola palipose pakuti agone ni kupumula.”

⁵⁹ Kaneko Yesu ŵamsalile mundu jwine kuti, “Munguye.” Mundujo jwatite, “Ambuje, ambe lipesa kuti njawule kumusi ngasice malilo ga baba ŵangu.”

⁶⁰ Yesu ŵajanjile kuti, “Mwaleceni ŵawe asiceje ŵawe acimjawo. Nambo m'mwejo mkalalicile ya Ucimwene wa Mlungu.”

⁶¹ Mundu jwine soni ŵamsalile Yesu kuti, “Tinamkuye Ambuje, nambo pandanda angunde ngalanje ŵandu ku nyumba.”

⁶² Yesu ŵatite, “Mundu jwatandite kulima aku ali mkulola munyuma jwalakwejo ngakuŵajilwa mu Ucimwene wa Mlungu.”