Luka 6 - Chiyawo Bible

Lisiku lyakupumula lya Ayuda

¹ Pa lisiku line lyakupumula lya Ayuda, Yesu* ni ŵakulijiganya* ŵakwe ŵaliji mkwenda kupitila m'migunda ja tiligu. Ŵakulijiganya ŵakwewo ŵatandite kupulula masace ga tiligu ni kugatikita myala mwawo kaneko ni kulyaga.

² Afalisi* ŵane ŵawusisye kuti, “Ligongo cici mkutenda yindu yele yigakukana Malamusi getu kuyitenda pa lisiku lyakupumula?”*

³ Yesu ŵajanjile kuti, “Ana nganimŵalanga yiŵatesile Daudi* pampepe ni acimjakwe pa ndaŵi jijakwete sala?

⁴ Daudi ŵajinjile m'Nyumba ja AMBUJE ni kuja kulya mikate jakupelecedwa kwa Ambuje ni kujilya, jele nganijiŵa jakukundidwa kuti jwalakwejo kapena acimjakwewo alye, akaŵe ŵakutaga mbopesipe.”

⁵ Yesu ŵapitilisye kuŵeceta kuti, “Mwanace jwa Mundu* akwete ulamusi wosope wakwayana ni yakwenela kuyitenda pa lisiku lyakupumula.”

Yesu ŵamposisye mundu jwamnyolole mkono

⁶ Pa lisiku line lyakupumula Yesu ŵajinjile m'Nyumba ja mapopelo nipo ŵaliji mkwiganya. Mwelemo mwaliji mwana mundu jwine jwamnyolole ligasa lyakwe lya kumlyo.

⁷ Aciŵalimu ŵa Malamusi* pamo ni Afalisi ŵasosaga kupata magongo gakuti akamŵecetele Yesujo. Myoyo ŵaliji kumlolecesya kuti alole naga jwalakwejo takamule masengo gakuposya pa lisiku lyakupumula.

⁸ Nambo Yesu ŵamanyilile nganisyo sya jemanjajo ni ŵamsalile mundu jula kuti, “Mjimuce, nipo myice kusogolo kuno.” Mundujo jwanyakwice ni ŵajile kukwima kusogolo kula.

⁹ Kaneko Yesu ŵawusisye ŵandu ŵala kuti, “Ana Malamusi gakusatukunda kutenda cici pa lisiku lyakupumula? Kumtendela yambone kapena yakusakala? Kuwukulupusya umi kapena kuwujonanga?”

¹⁰ Jwalakwejo piŵasilolecesye ngope sya ŵandu ŵala, ŵamsalile mundu jula kuti, “Tambasukulani ligasa lyenu.” Mundu jula ŵatesile myoyo nipo ligasa lyakwe lyaŵele cenene mpela mulyaŵelele pandanda.

¹¹ Nambo Aciŵalimu ni Afalisi ŵala ŵatumbile mnope, mwakuti ŵatandite kupangana yitajile najo Yesu.

Yesu akusagula ŵakulijiganya

¹² Pandaŵi jelejo Yesu ŵatyosile ni ŵakwesile litumbi kukupopela, mwakuti ŵacesisye cilo cosope ali mkupopela kwa Mlungu.

¹³ Pikwacele jwalakwejo ŵaŵilasile ŵakulijiganya ŵakwe ŵala, mwa jemanjajo ŵasagwilepo likumi ni ŵaŵili ŵele ŵaŵakolasile kuti, “Ŵandumetume.”

¹⁴ Aga gali mena ga ŵakulijiganya likumi ni ŵaŵili uŵasagulidwe ni Yesu: Simoni* (juŵapegwile lina ni Yesu lyakuti Petulo,)* Andileya* mpwakwe Simoni, Yakobo* ni Yohane,* Filipi ni Batolomeyo,

¹⁵ Mateyu* ni Tomasi,* Yakobo mwanace jwa Alifeyo, ni Simoni jwa mu likuga lya ndale lya Aseloti,*

¹⁶ Yudasi mwanace jwa Yakobo ni Yudasi Isikaliyoti* (juŵampelece Yesu kwa amagongo ŵakwe.)

Yesu akwiganya ni kwaposya ŵandu

¹⁷ Yesu piŵatulwice mwitumbimo pamo ni ŵandumetume ŵakwe, ŵajimi pa ciŵata. Paliji pana ŵakulijiganya ŵakwe ŵajinji kwisa soni ŵandu ŵajinji ŵakutyocela ku Yudeya, ku Yelusalemu ni Nyasa ja ku Taya ni Sidoni.

¹⁸ Jemanjaji ŵayice kukupikanila maloŵe ga Yesu, nambo soni kuti ŵaposye jemanjajo ku yilwele yawo. Nombe nawo ŵiŵaliji mkusawusidwa ni misimu jakusakala* ŵayice nipo ŵaposisye.

¹⁹ Ŵandu wosope ŵasakaga kumkwaya Yesu, pakuti macili galiji mkukopoka mwa jwalakwejo giŵaposisye nago ŵandu.

Ŵandu ŵajaliwe ni ŵandu ŵa likungu

²⁰ Yesu ŵalolite ŵakulijiganya ŵakwe ni ŵasalile kuti, Ŵana upile jemanja, ŵimkulaga m'mitima mwenu, pakuti Ucimwene wa kwinani uli wenu.

²¹ Ŵana upile jemanja ŵijimkwete sala sambano jino, pakuti Mlungu tacikwanilisya yakusoŵa yawo. Ŵana upile jemanja ŵimkulila sambano, pakuti timcisecelela.

²² Ŵana upile jemanja ŵandu ŵane pakumŵenga, kumkana, ni kumnyosya ni kuŵeceta yakusakala yakwamba m'mwejo ligongo lya Mwanace jwa Mundu.

²³ Payikutendekwa yeleyi, msangalaleje ni kuŵina mwa lukondwa, ligongo mbote jenu jili jajikulungwa kwinani. Pakuti acinangolo ŵawo ŵatendele ŵakulocesya ŵa kalakala yindu yamti myiyi.

²⁴ Nambo mkwete likungu jemanja ŵakusicila, pakuti mpocele cilepe yakumsangalasya pa ma umi genu.

²⁵ Mkwete likungu jemanja ŵimkwikuta sambano jino, pakuti timciŵa ni sala! Pakuti timcikola canasa, soni timcilila.

²⁶ “Mkwete likungu ŵandu wosope pakumlumba jemanja; pakuti acinangolo ŵawo ŵatendelaga ŵakulocesya ŵa unami yamti myiyi.”

Yakwanonyela amagongo

²⁷ “Nambo ngumsalila jemanja ŵimkumbikana kuti, mwanonyeleje amagongo ŵenu, ni kwatendela yambone ŵandu ŵakumŵenga jemanja.

²⁸ Mwapeje upile ŵakumlwesa, soni mwapopeleleje ŵele ŵakumsawusya.

²⁹ Naga mundu akumputa pa lijeje, mumkunde kuti ampute pa lijeje linelyo soni. Naga mundu akumsumula mkanjo wenu, mumkunde kuti ajigale ni malaja gakwe.

³⁰ Naga mundu akumŵenda kandu, mumpeje. Soni naga mundu jwine akujigala yindu yenu, mkasimumsalila kuti ayiwusye.

³¹ Mwatendeleje ŵandu ŵane mpela mumkusacila kuti ŵane amtendeleje jemanja.”

³² “Naga mkwanonyela ŵawowo pewo ŵakusamnonyela jemanja, ana mkwembecela kupocela mbote jamti uli? Ana ngaŵaga atamose ŵa ulemwa* akusatenda iyoyo peyo?

³³ Nipo naga mkwatendela yambone ŵelewo pewo ŵakumtendela yambone, ana mkwembecela kupocela mbote jamti uli? Pakuti nombe ŵandu ŵa ulemwa akusatenda iyoyo peyo.

³⁴ Soni naga mkwakongosya ŵelewo pewo ŵimkwakulupilila kuti tacimwucisya, ana mkwembecela kupata mbote jamti uli? Pakuti atamose ŵandu ŵa ulemwa akusiŵakongosyaga ŵa ulemwa acimjawo, kuti akapocele soni mbiya sisyosyo.

³⁵ Nambo jemanja mwanonyeleje amagongo ŵenu ni kwatendela yindu yambone, soni mwakongosyeje pangajembecela kupocela cijongola yala. Naga mkutenda myoyo timcipocela mbote jajikulungwa, soni timcitendedwa kuŵa ŵanace ŵa Mlungu jwakupunda yosope yene. Pakuti Mlungu akusiŵatendela yambone ŵandu ŵangatogolela ni ŵa ulemwa wosope.

³⁶ Mŵeje ŵa canasa mpela mwaŵelele Atati ŵenu ŵakwinani.”

Ya kwalamula ŵane

³⁷ “Mkasimwalamulaga ŵandu ŵane kuti ali ŵakulemwa, nipo Mlungu ngasamlamula m'mwejo. Mkasimwajimbaga ŵane magambo kuti jemanjajo ali ŵakulemwa. Mwakululucileje ŵane nipo Mlungu tacimkululucila.

³⁸ Mpeleceje kwa ŵane mtuka mwakoloŵa magasa, nipo Mlungu tacimpa iyoyo peyo. Jwalakwejo tacimpa m'mwejo mpimo wambone, wegumbale, wecinyindile ni wakwasicila cenene. Pakuti mpimo uwowo umkusakamulicisya masengo pakwalamula ŵane, Mlungu tacikamulicisya masengo uwowo pewo pakumlamula jemanja.”

³⁹ Yesu ŵasalile soni jemanjajo citagu* cakuti, “Ana mundu jwangalola mpaka apakombole kumlongolela jwangalola mjakwe? Ana wosopewo ngagwila mwisimbo?

⁴⁰ Jwakulijiganya ngaŵa kumpunda mwalimu jwakwe, nambo naga ali amalisisye majiganyo gakwego, akusalandana ni mwalimu jwakwe.”

⁴¹ “Ligongo cici mkusalolecesya kaciswani kakali mliso lya mjenu, nambo ngaganicisya ya ciswani cekulungwa cacili mliso mwenu?

⁴² Ana mpaka mumsalile uli mlongo mjenu kuti, ‘Mjime nimtyosye kaciswani kakali mliso mwenu,’ kutendaga ugweji mliso mwakwe muli mwana ciswani cekulungwa. M'mwe ŵa unami, mtande kutyosya ciswani cekulungwa cacili mliso mwenumo, kaneko ni timpakombole kulola cenene ni kuja kutyosya kaciswani kakali mliso lya mlongo mjenujo.”

Citela ni yisogosi yakwe

⁴³ Citela cambone ngaŵa mkusogola yisogosi yakusakala, atamose citela cakusakala ngaŵa mkusogola yisogosi yambone.

⁴⁴ Citela cilicose cikusamanyika ni yisogosi yakwe. Pakuti ngaŵa mkukaŵa yisogosi ya mipeleya kutyocela mu yitela ya miŵa, kapena midodo kutyocela mu yitela ya nguju.

⁴⁵ Mundu jwambone akusakoposya yambone kutyocela mcipanje cakwe ca yindu yambone ya mu mtima mwakwe, nambo mundu jwakusakala akusakoposya yakusakala kutyocela mcipanje cakusakala ca mu mtima mwakwe.

Ya ŵandu ŵaŵili ŵakuŵaka nyumba

⁴⁶ “Ana ligongo cici mkungolanga une, ‘Ambuje,’ nambo mli mkakutenda yingusamsalila une?

⁴⁷ Mundu jwalijose jwakwisa kwa une ni kugapikanila maloŵe ni kutenda yigakuti maloŵego, tinamsalile jwakulandana najo jwele mundujo.

⁴⁸ Jwelejo akulandana ni mundu jwakutaŵa nyumba, juŵasokwele mnope ni kuŵika yilimbilimbi yakwe pa lwala. Pijayice tutumule ja mesi gagundile nyumbajo, nambo nganijitenganyika kose ligongo nyumbajo jataŵidwe cenene.

⁴⁹ Nambo mundu jwalijose jwakugapikana maloŵe ganguga ni ngagakamulisya masengo, jwalakwejo akulandana ni mundu jwakuloŵela juŵataŵile nyumba pacanya pa msanga, nambo nganaŵika yilimbilimbi. Pijagwile ula, cikumba ca mesi cayice, mesi gakwe gagombile nyumbajo ni jagwile ndaŵi jijojo, nipo kulindimukuka kwakwe kwaliji kwakogoya.”