Luka 5 - Chiyawo Bible

Yesu akwasagula ŵakulijiganya ŵakwe ŵandanda

¹ Lisiku line Yesu* ŵajimi mungulugulu Nyasa ja Genesaleti; nipo ŵandu ŵajinji ŵaliji mkutama kuti apikane maloŵe ga Mlungu.

² Jwalakwejo ŵagaweni mawato gaŵili ali agakocesye mungulugulu nyasa, acimsyene ŵakuwulaga somba ali akopwecemo nipo ŵaliji ali mkucapa makoka gawo pandaŵijo.

³ Yesu ŵajinjile mu wato umo uwaliji wa Simoni,* ni ŵamŵendile kuti awututile panandi watowo ku nyasa. Pandaŵiji Yesu ŵaliji ali atemi mu watomo ni ŵatandite kwajiganya ŵanduwo.

⁴ Yesu piŵamasile kuŵeceta, ŵamsalile Simoni kuti, “Mpalasile kwakusokoka watowo ni mkaponye makoka genu nipo timwulaje somba.”

⁵ Simoni ŵajanjile kuti, “Uweji tucesisye cilo cosopeci kukamula masengo, nambo ngapagwa citupatile. Nambo ligongo lyakuti ŵalakwe aŵecete myoyo uwe tuponye likoka.”

⁶ Jemanjajo ŵaponyisye likoka ni ŵawuleje somba syejinji mwakuti likokalyo lyatandite kupapuka piŵaliwutilaga pamkuli.

⁷ Kaneko ŵakodwele acimjawo ŵaŵaliji mu wato wine kuti ayice kukwakamucisya. Jemanjajo ŵayice kukwakamusya acimjawowo mwakuti ŵagumbesye sombasyo mawato gaŵili nipo gatandite kutitimila.

⁸ Simoni Petulo* piŵayiweni yiyatendekweyo, jwalakwejo jwatindiŵele pameso pa Yesu aku ali agwisisye ngope jakwe pasi acitiji; “Pepani Ambuje, atyoce pandili une pano, une ndili mundu jwakulemwa.”

⁹ Petulo pamo ni acimjakwe wosope ŵiŵaliji nawo ŵala, ŵasimonjile mnope ni winji wa somba siŵawulejesyo.

¹⁰ Yakobo* ni Yohane* ŵanace ŵa Sebedayo ŵiŵaliji acimjakwe wa Simoni nombe nawo ŵasimonjile. Myoyo Yesu ŵamsalile Simoni kuti, “Mkajogopa, kutandilila sambano jino mpaka msogolo timciŵa ŵakwajigalila ŵandu kwa une.”

¹¹ Myoyo piŵakocesye mawato gaŵili gala pamkuli ŵalesile yosope nipo ŵamkuyisye Yesu.

Yesu ŵamposisye mundu jwa matana

¹² Yesu piŵaliji m'musi wine kwayice mundu juŵalwalaga ulwele wa matana. Jwalakwejo piŵam'weni Yesu ŵaligwisisye pasi ni kumŵenda Yesu acitiji, “Ambuje, naga akusaka, akomboleka kuswejesya.”

¹³ Yesu ŵatambasukwile ligasa lyakwe ni ŵamkwayiye jwakulwalajo acitiji, “Cambone ngusaka, swejelani!” Mwa ndaŵi jijojo, mundu jula jwaposile ku ulwele wakwe ula.

¹⁴ Kaneko Yesu ŵamgombelesye mundu jula kuti, “Kasimumsalila jwalijose yeleyi, m'mwejo mgambeje kwawula ni mkalilosye kwa jwakutaga mbopesi ligongo lyakuti mposile, soni mkapelece mbopesi jiŵalamwile Mose* jila. Jelejo jiŵe umboni pameso pa ŵandu kuti mposile kusyesyene.”

¹⁵ Mbili ja Yesu japundile kwenela posepose, mwakuti ŵandu ŵajinji ŵayikaga kuti apikane majiganyo gakwe, nambo soni kuti jwalakwejo ŵaposye ŵanduwo ku yilwele yawo.

¹⁶ Nambo mwandaŵi sine Yesu ŵajawulaga kumalo gajikape kukupopela kwangapitapita ŵandu.

Yesu ŵamposisye mundu jwamlemale yiŵalo

¹⁷ Lisiku line Yesu ŵajiganyaga, Afalisi** ni aciŵalimu ŵane ŵa Malamusi giŵalembile Mose, ŵayice kutyocela ku misi josope ja ku Galileya, ku Yudeya ni Yelusalemu. Jemanjajo ŵatemi pasi ni kumpikanila Yesu pa ndaŵi jiŵaliji mkwiganya. Pandaŵi jeleji macili gakutyocela kwa Mlungu galiji mwa Yesu kuti ŵaposye ŵandu ŵiŵaliji mkulwala.

¹⁸ Acalume ŵane, ŵayice ni mundu jwamlemale yiŵalo ali agonile pa macila. Myoyo ŵalinjile kuti ajinjile najo mundu jwa kulwala jula m'nyumbamo kuti amgonece pasogolo ciŵandika ni piŵaliji Yesu.

¹⁹ Ligongo lya winji wa ŵandu, acalumewo nganapakombola kwinjila najo mundujo m'nyumbamo. Myoyo jemanjajo ŵakwesile pa msakasa ni ŵawamwile manyasi nipo kaneko ŵamtulucisye pa licikapo jwakulwalajo mpaka kuja kwika sikati ja ŵandu piŵaliji Yesu.

²⁰ Yesu piŵaciweni cikulupi ca ŵanduwo ŵamsalile mundujo kuti, “Mjangu, ulemwa* wenu ukululucidwe.”

²¹ Aciŵalimu ŵa Malamusi* ŵala ni Afalisi ŵatandite kuliwusya m'mitima mwawo kuti, “Ana nduni jwakumnyosya Mlungu mwacipongweju? Ana ŵani ŵa mpaka akululucile ulemwa, ana ngaŵa Mlungupe basi?”

²² Yesu ŵamanyilile nganisyo sya jemanjajo ni ŵawusisye kuti, “Ligongo cici mkuganisya yeleyo m'mitima mwenu?

²³ Ana cangasawusya ni capi, kumsalila mundu kuti, ‘Ulemwa wenu ukululucidwe,’ kapena kuŵeceta kuti, ‘Jimukani mjende?’

²⁴ Tinamlosye jemanja kuti Mwanace jwa Mundu* akwete ulamusi pacilambo capasi pano wakukululucila ulemwa.” Papopo ŵamsalile mundu jwamlemale yiŵalo jula kuti, “Mjimuce, mjigale licika lyenu ni mjawuleje kumangwenu.”

²⁵ Mwandaŵi jijojo jwakulwala jula jwajimwice ŵandu wosope ali mkulola nipo ŵajigele licika lyakwe liŵagonele lila, kaneko ŵawutandite ulendo wakwawula kumangwakwe aku ali kumtogolela Mlungu.

²⁶ Ŵandu wosope ŵala ŵasimonjile mnope mwakuti nombe nawo ŵatandite kumlumba Mlungu, nambo soni ŵakamwilwe ni woga, aciŵecetaga kuti, “Lelo tuyiweni yindu yakusimonjesya.”

Yesu ŵamŵilasile Lefi

²⁷ Kaneko Yesu ŵakopwece pasa nipo ŵam'weni mundu jwine lina lyakwe Lefi juŵaliji jwakomesya msongo.* Pandaŵiji Lefi ŵaliji ali atemi m'nyumba jakomecesya msongo. Yesu ŵamsalile jwalakwejo kuti, “M'mwe, munguye une.”

²⁸ Lefi jwanyakwice, kuyileka yosope ni jwatandite kumkuya.

²⁹ Kaneko Lefi ŵamlinganyicisye Yesu yakulya ku nyumba jakwe. Kwasongene ŵakomesya msongo ŵajinji ni ŵandu ŵane wamba nombe nawo ŵaliji pa cindimbaco.

³⁰ Afalisi pamo ni acakulungwa ŵane ŵakwiganya malamusi giŵalembile Mose ŵatandite kunyinyita nipo ŵawusisye ŵakulijiganya* ŵa Yesu kuti, “Ligongo cici mkulya ni kumwa pamo ni ŵakomesya msongo ni ŵandu ŵa ulemwa.”

³¹ Yesu ŵajanjile kuti, “Ŵandu ŵangakulwala ŵangamsosa jwa mtela, nambo awo pewo ŵakulwala.

³² Une nganiyika kukwaŵilanga ŵandu ŵakulungama, nambo ŵandu ŵa ulemwa kuti apitikuce mitima jawo.”

Ciwusyo cakwamba kulijima kulya

³³ Ŵandu ŵane ŵamsalile Yesu kuti, “Ŵakulijiganya ŵa Yohane akusalijima yakulya kaŵilikaŵili soni akusapopela pampepe, nombe nawo ŵakulijiganya ŵa Afalisi akusatenda myoyo. Nambo ŵakulijiganya ŵenu akusagambaga kulya ni kumwa.”

³⁴ Yesu ŵawusisye jemanjajo kuti, “Ana ŵaŵilanjidwe ku cindimba ca ulombela mpaka akombolece kulijima yakulya pa ndaŵi jali ni mlombela? Yangakomboleka!

³⁵ Nambo pitijiciyika ndaŵi jitacatyocesya mlombelajo. Ndaŵi jelejo ni jitacilijima yakulya.”

³⁶ Yesu ŵapitilisye kwasalila jemanjajo kuti, “Pangali mundu jwakusapapula cigamba ca cakuwala casambano ni kucitotelela pa cakuwala cakalakala. Ligongo naga akutenda myoyo tagambe konanga nguwo jasambanojo ligongo cigamba casambanoco ngacijilana ni nguwo jakalakalajo.

³⁷ Soni pangali mundu jwakusataga finyo wasambano mu misaku ja mapende gakalakala, ligongo naga akutenda myoyo, finyo wasambanowo tiwuwulisye misakujo, nipo finyowo tiwujasicile pasi, nipo misakujo tijijonasice.

³⁸ Nambo finyo jwasambano jukwenela kutajidwa m'misaku ja sambano.

³⁹ Pangali mundu jutamsace finyo jwasambanojo kutendaga jwalakwejo ali amwele kala finyo jwakala, pakuti akusatiji, finyo jwakalajo ni jwakunong'a.”