Luka 4 - Chiyawo Bible

Yesu akulinjidwa ni Satana

¹ Yesu* piŵawusile kutyocela ku Lusulo lwa Yolodani, Macili ga Msimu Ŵaswela galiji pa ŵelewo, nipo Msimu wa Ambuje wamlongolele jwalakwejo kwawula ku cipululu,

² kwele kuŵalinjidwe ni Satana* kwa masiku makumi mcece musi ni cilo. Pa gele masikugo Yesu nganalya cakulya cilicose, myoyo jwalakwejo jamkwete sala.

³ Satana ŵamsalile Yesu kuti, “Naga yili yakuwona kuti m'mwejo mli Mwanace jwa Mlungu, mlilamulile liganga ali kuti liŵe mkate.”

⁴ Yesu ŵajanjile kuti, “M'Malemba yilembedwe kuti, ‘Mundu ngaŵa mkuŵa ni umi ligongo lyakulya mkatepe.’ ”

⁵ Pakumalisya Satana ŵalongene ni Yesu kwawula pa malo gakwela mnope, kweleko ŵamlosisye Yesujo yilambo yosope ya pasi pano kwa ndaŵi jamnono.

⁶ Satana ŵamsalile Yesu kuti, “Tinampe macili ni lumbili losope, ligongo yipegwile kwa une, nipo ngusapeleka kwa jwalijose jungumsaka.

⁷ Yosope yene tiyiŵe yenu, naga mkulambila une.”

⁸ Pelepo Yesu ŵajanjile kuti, “Pakuti yilembedwe m'Malemba kuti, ‘Mwalambileje Ambuje Mlungu jwenu, ni kwatumicila ŵelewo pewo.’ ”

⁹ Pambesi pakwe Satana ŵajile ku Yelusalemu pamo ni Yesu, ni ŵamŵisile Yesujo penani pasyesyene pa Nyumba ja AMBUJE. Ni ŵamsalile kuti, “Naga yili yakuwona kuti m'mwejo mli Mwanace jwa Mlungu, mliponye pasi.

¹⁰ Pakuti yilembedwe m'Malemba kuti, ‘Mlungu tacilamula malayika* gakwe kuti gamjangate m'mwejo.

¹¹ Malayikago tigacimjangata m'mwejo myala mwakwe kuti sajo syenu sikaligombesya pa liganga.’ ”

¹² Nambo Yesu ŵamjanjile Satana kuti, “Yilembedwe m'Malemba kuti, ‘Mkasimwalinga Ambuje Mlungu jwenu.’ ”

¹³ Satana piŵamasile kumlinga Yesu m'matala gakulekanganalekangana, ŵamlesile Yesujo ni kwembeceya ndaŵi jine.

Yesu akutanda masengo gakwe ku Galileya

¹⁴ Kaneko ŵawujile ku Galileya mwakulongoleledwa ni macili ga Msimu Ŵaswela. Mbili jakwe jambone jajenele mcilambo cosope.

¹⁵ Jwalakwejo jwajiganyaga m'nyumba syakupopelela sya Ayuda soni ŵandu wosope ŵaliji kumlapilila.

Ŵandu ŵamkanile Yesu ku Nasaleti

¹⁶ Ndaŵi jine Yesu ŵapite ku Nasaleti kuŵakulile, pa lisiku lyakupumula* jwalakwejo jwajinjile m'nyumba jakupopelela, mpela muŵatendelaga ndaŵi syosope. Kaneko ŵajimi kuti aŵalanje Malemba.

¹⁷ Ŵampele jwalakwejo buku jijalembedwe ni jwakulocesya* Yesaya. Yesu piŵawunukwile bukujo ŵajisimene ndime jijalembedwe kuti,

¹⁸ “Msimu wa Ambuje Mlungu uli pa une, Asagwile une kuti lalicile ngani syambone* kwa ŵakulaga. Jwalakwejo andumile kuti njenesye kwa ŵataŵidwe kuti tacigopoledwa ni kwa ŵakutatala kuti tacipakombola kulola soni. Andumile kuti mbelece mtendele kwa ŵandu ŵali mkusawusidwa,

¹⁹ ni kulalicila ya ndaŵi jitacakulupusya Ambuje ŵandu ŵakwe.”

²⁰ Yesu piŵamasile kuŵalanga ndimeji ŵawunicile bukujo ni kujipeleka kwa jwakutumicila jwa ku nyumba ja mapopelo kaneko ŵatemi pasi ni kutanda kwiganya. Ŵandu wosope ŵaliji kumlolecesya jwalakwejo.

²¹ Kaneko Yesu ŵatandite kwajiganya jemanjajo acitiji, “Lelo jino yitendekwe yigaŵecete cilepe Malemba kwambaga ayi yimpikeneyi.”

²² Ŵandu wosope ŵamlapilile mnope, ni ŵaliji ŵakusimonga pa maloŵe gakamula mtima giŵaŵecete jwalakwejo. Ŵanduwo ŵawusyanaga kuti, “Ana jweleju ngaŵa mwanace jwa Yosefe?”

²³ Yesu ŵajanjile jemanjajo kuti, “Nguwona timusalile citagu* acila cakuti, ‘Jwamtela mliposye mwasyene.’ Timusalile une soni kuti ndende yindu kumangwetu kuno yakulandana ni yimwapikene kuti nayitesile ku Kapelenaumu.”

²⁴ Yesu ŵasalile soni ŵanduwo kuti, “Pangali jwakulocesya jwakusanonyeledwa ni ŵandu ŵa ku mangwakwe.

²⁵ Kuŵeceta yakuwona, mu ndaŵi ja jwakulocesya Eliya,* kwaliji kwangali ula kwa yaka yitatu ni miesi msano ni umo mcilambomo mwapali acakongwe ŵamasije* ŵajinji ŵaŵaliji mkulaga.

²⁶ Nambo Eliya ŵatumidwe ni kuti ajawule kwa jwamkongwe jumope jwamasije jwa m'musi wa Salefati, ku msinda wa Sidoni.

²⁷ Pandaŵi ja jwakulocesya Elisha, ŵapali ŵamatana ŵajinji mcilambo ca Isalaeli, mwakuti nganapagwa mundu ni jumo jose juŵaposyedwe kutyosyapo Namani jikape jwa ku cilambo ca Siliya.”

²⁸ Ŵandu wosope ŵaŵaliji m'Nyumba ja mapopelo jila ŵapile mnope mitima piŵapikene ya nganiji.

²⁹ Jemanjajo ŵanyakwice ni ŵamkopocesye Yesu kusa kwa musi, nipo kaneko ŵajile najo Yesujo penani pa litumbi pipataŵidwe msinda wa jemanjajo kuti akamponyele jwalakwejo kwicenje.

³⁰ Nambo Yesu ŵagambile kupeleta pasikati pa jemanjajo ni kwawulaga.

Yesu ŵamposisye mundu juŵakamwilwe ni msimu wakusakala

³¹ Yesu ŵapite ku msinda wa Kapelenaumu wele uli mu upande wa Galileya, ni ŵajigenye ŵandu pa lisiku lyakupumula lya Ayuda.

³² Ŵandu ŵajinji ŵasimonjile ni wiganye wakwe pakuti majiganyogo gakamwile ŵandu mitima soni ŵajiganyaga mwamacili.

³³ M'nyumba ja mapopelomo mwaliji mwana mundu juŵakamwilwe ni msimu wakusakala. Jwalakwejo jwagumisile acitiji,

³⁴ “Ana twatandite cici ŵalakwe Yesu ŵakutyocela ku Nasaleti? Ana ayice kukutujonanga uwe? Ngwamanyilila ŵalakwe, ali jwakutumicila jwamswela jwa Mlungu.”

³⁵ Nambo Yesu ŵawujamwice msimu wakusakalawo acitiji, “Mtulale, mkopoce mwa munduju!” Msimu wakusakala ula wamgwisisye mundu jula pasi pameso pa ŵandu nipo msimuwo wakopwece nambo nganiwumwulasya mundujo.

³⁶ Ŵandu wosope ŵala ŵasimonjile mnope ni ŵaliji mkuwusyana jwine ni mjakwe kuti, “Ana majiganyo gelega gamti uli? Jwalakweju akwete macili gakujilamulila misimu jakusakala kuti jikopoce mwa ŵandu.”

³⁷ Myoyo mbili jambone ja Yesu japikanice mbali josope ja ku Galileya.

Yesu akuposya ŵandu ŵajinji ku nyumba ja Simoni

³⁸ Yesu ŵatyosile ku nyumba jakupopelela jila, ni ŵajile ku nyumba ja Simoni.* Pandaŵi jeleji akwegwe ŵawo Simoni ŵaliji mkulwala malungo, nipo ŵandu ŵanduwo ŵam'manyisye Yesu ya ulwelewo.

³⁹ Yesu ŵajimi pambali pa malo giŵagonile jwamkongwejo nipo ŵakujamwice kulipuka kula nipo kwalesile. Papopo jwamkongwejo jwajimwice ni kutanda kwatumicila jemanjajo.

⁴⁰ Ligulo, lyuŵa lili mkukapila ŵandu wosope ŵaŵakwete acimjawo ŵiŵalwalaga yilwele yakulekanganalekangana ŵayice nawo kwa Yesu. Jwalakwejo ŵamsajikaga magasa gakwe pa jwakulwala jwalijose, ni ŵaposisye wosope.

⁴¹ Nombe najo misimu jakusakala jakopwece kutyoka mwa ŵandu ŵajinji jili mkugumila jicitiji, “Ŵalakwe ali mwanace jwa Mlungu!” Nambo jwalakwejo ŵajijamwice misimu jakusakalajo, pangajikunda kuti jiŵecete, ligongo jele misimujo jamanyilile kuti Yesu ŵaliji Mkulupusyo.

Yesu ŵalalicile ku Galileya

⁴² Pikwacele, Yesu ŵakopwece ni kuja ku malo gajikape kwangapitapita ŵandu. Likuga lya ŵandu lyatandite kumsosasosa, piŵamsimene ŵalinjile kutenda yakomboleka kuti Yesu akasiŵatyocela soni.

⁴³ Nambo Yesu ŵasalile kuti, “Ngwenela kulalicila Ngani Syambone syakwamba ya Ucimwene wa Mlungu* ku misinda jine soni, pakuti ayi ni yiŵandumile Mlungu kuti nayitende.”

⁴⁴ Myoyo jwalakwejo ŵaliji mkulalicila m'nyumba sya mapopelo* mu Yudeya.