Luka 24 - Chiyawo Bible

Yesu ŵajimwice ku ŵawe

¹ Kumasikusiku kwa lisiku lya mlungu, acakongwe ŵala ŵajile ku malembe, ali ajigele mawuta ni yakununjila yiŵapanganyisye yila.

² Piŵayice ku malembeko, ŵasimene liganga liŵawugalile pa mlango lila lili lyetyosye pa mlango wa lilembepo.

³ Piŵajinjile mwilembe mula, jemanjajo nganawusimanamo mtembo wa Ambuje Yesu.*

⁴ Piŵaliji mkusimonga camti myoyo, mwacisisimucisya ŵaweni acalume ŵaŵili ŵawale yakuwala yakunyesima mnope ali ajimi pambali pa jemanjajo.

⁵ Acakongwewo ŵakwete woga ni ŵajinamile pasi. Nambo acalume ŵala ŵawusisye kuti, “Ana mkumsosela cici mundu jwa cijumi ku malo kwa ŵandu ŵawe kuno?

⁶ Nganaŵa amuno, ajimwice ku ŵawe. Mkumbucile yiŵamsalile pa ndaŵi jiŵaliji ku Galileya.

⁷ Kwekula ŵamsalile jemanja kuti, ‘Mwanace jwa Mundu* akwenela kupelecedwa m'myala mwa ŵandu ŵakulemwa kuti amkomele ni kuwila pa msalaba kaneko ni kwimuka soni ku ŵawe pa lisiku lyatatu ciwile.’ ”

⁸ Kaneko acakongwe ŵala ŵakumbucile gele maloŵego,

⁹ ni ŵatyosile ku malembe kula ni kuja kukwasalila yosope yeneyo ŵakulijiganya* ŵala ni ŵandu ŵane wosope.

¹⁰ Acakongwewo ŵaliji Maliya jwakutyocela ku msinda wa Magadala, Yowana, Maliya mamagwe Yakobo,* pamo ni acimjawo ŵane ŵajile kukwasalila ŵandumetume ŵane wosope ŵala kwambaga ya nganiji.

¹¹ Nambo ŵandumetume ŵala ŵagambaga kupela kuti yeleyi yili yangali mate, nipo nganiŵakulupilila acakongwewo.

¹² Nambo Petulo* ŵatyosile kwawula ku malembe, nipo piŵayice kweleko ni kulingulila mwilembemo, jwalakwejo ŵagambile kusiwona sandape nipo kaneko ŵawujile ku musi aku ali mkusimonga ni yiyatendekweyo.

Yiyatendekwe petala lyakuja ku Emau

¹³ Lisiku lilyolyo ŵakulijiganya ŵaŵili ŵaliji pa ulendo wakuja kumusi wine wakolanjidwa Emau. Kutyoka ku Emau kuja ku Yelusalemu kutalikangana kwakwe kwaliji makilomita 11.

¹⁴ Jemanjaji ŵaliji mkuŵecetana kwambaga yiyatendekwe yila.

¹⁵ Piŵaliji mkuŵecetana ni kuwusyana, Yesu msyene ŵaŵandicile jemanjajo nipo ŵaliji mkulongana nawo.

¹⁶ Nambo meso ga jemanjajo gatesile mpela cidima mwakuti nganam'manyilila jwalakwejo.

¹⁷ Sambano Yesu ŵawusisye jemanjajo kuti, “Ana yimkuŵeceta mli mkwendayi yikwamba cici?” Acalume ŵaŵiliwo ŵajimi papopo ni ngope sya kudandawula ni sya canasa.

¹⁸ Kaneko jumo jwa jemanjajo jwakolanjidwa kuti Kiliyopa jwawusisye kuti, “Ana ŵalakwe ali mlendo jikape mu msinda wa Yelusalemu muno, jwangakumanyilila yindu yiyatendekwe kweleko lijusi.”

¹⁹ Yesu ŵawusisye kuti, “Ana yamtuli?” Jemanjajo ŵatite, “Yakwamba Yesu jwa ku Nasaleti. Jwalakwejo jwaliji jwakulocesya* nipo yosope yiŵatendaga yaliji yakumnonyelesya Mlungu ni ŵandu ŵakwe.

²⁰ Acakulungwa ŵa ŵakutaga mbopesi ni acimlongola ŵetu ŵampelece kuti ajimbidwe magambo ni kuwulajidwa pakumkomela pa msalaba.

²¹ Uwe twajembecelaga kuti jwelejo ni jutiŵawombole Aisalaeli. Citendekwele yeleyi papite masiku gatatu.

²² Konjecesya pa yeleyi, acakongwe ŵane ŵa mwikuga mwetu ŵatusimonjesye. Jemanjajo ŵapite ku malembeko kundaŵindaŵipe,

²³ nambo nganawusimana mtembo wa Yesu. Piŵawusile ŵatusalile uwe kuti ŵagaweni malayika* gigasalile jemanjajo kuti Yesu ali cijumi.

²⁴ Acalume ŵane ŵa mwikuga mwetu ŵapite ku malembeko nipo ŵajile kusimana mpela muŵaŵecetele acakongwe mula, nambo jwalakwejo nganamwona kose.”

²⁵ Kaneko Yesu ŵatite, “Ana jemanja mli ŵandu ŵakuloŵela camti myiyi, ŵangasaka kulupilila mwacitema yosope yiŵaŵecete ŵakulocesya.

²⁶ Ana jemanja nganim'manyilila kuti Mesiya* ŵaŵajilwe kuyiwona yipwetesi, mkanajinjile mu Ucimwene wakwe?”

²⁷ Kaneko Yesu ŵatandite kulondesya yosope yilembedwe yakwamba jwalakwejo m'Malemba gosope kutandilila m'mabuku giŵalembile Mose* mpaka mabuku gane giŵalembile ŵakulocesya wosope.

²⁸ Piŵaŵandicile ku musi kuŵajawulagako, Yesu ŵatesile mpela akupelenganya.

²⁹ Jemanjajo ŵamcondelele acitiji kuti, “Atame ni uwe pakuti kusaku kuswele sambano, soni lyuŵa likukapila.” Myoyo jwalakwejo jwajinjile m'nyumba ni kutama ni jemanjajo.

³⁰ Yesu piŵatemi ni jemanjajo pasi kuti alye, ŵajigele mkate, ni ŵatogolele ni kuwugaŵanya, kaneko ŵapele jemanjajo kuti alye.

³¹ Ndaŵi jijojo meso ga acalume ŵaŵili ŵala gawugwice nipo ŵam'manyilile jwalakwejo, kaneko Yesu ŵasoŵile sikati ja jemanjajo.

³² Jemanjajo ŵatandite kuwusyana jwine ni mjakwe acitiji kuti, “Mitima jetu jatesile mpela jikolele moto pa ndaŵi jaŵeceteje ni uwe, ni kutulondecesya ya Malemba mwitala mula.”

³³ Ndaŵi jijojo acalume ŵaŵili ŵala ŵawujile ku Yelusalemu. Kweleko ŵajile kukwasimana ŵakulijiganya 11 ŵala ni ŵane ali asongene pampepe,

³⁴ ali mkuŵeceta kuti, “Yili yakuwona kuti Ambuje ajimwice ku ŵawe nipo awonecele kwa Simoni.”*

³⁵ Acalume ŵaŵili ŵala ŵasalile jemanjajo yiyatendekwe mwitala mula, ni mwele jemanjaji muŵam'manyililile Yesu pa ndaŵi jiŵagaŵanyaga mkate.

Yesu ŵawonecele kwa ŵakulijiganya ŵakwe

³⁶ Acalume ŵaŵili ŵala piŵaliji mkwasalila ŵakulijiganya ŵa Yesu kwambaga yiyatendekwe mwitala pakuja ku Emau, mwacisisimucisya Ambuje asyene ŵajimi pasikati pa jemanjajo ni ŵakomasisye acitiji kuti, “Mtendele uŵe kwa jemanja.”

³⁷ Nambo jemanjajo ŵatojime soni ŵakamwilwe ni woga ligongo ŵaganisyaga kuti awuweni msimu.

³⁸ Nambo Yesu ŵawusisye kuti, “Ana mkulilagasya ni kukayicila m'mitima mwenu ligongo cici?

³⁹ Mlole magasa ni sajo syangu, kuti yisyene ndili une. Mungwaye ni mundole, pakuti msimu ukusaŵa wangali mnowu ni maupa mpela mumkumbonelamu.”

⁴⁰ Piŵaŵecete gele maloŵega ŵalosisye jemanjajo magasa ni sajo syakwe.

⁴¹ Jemanjaji nganakulupilila ligongo lyakuti ŵaliji ŵakusangalala nipo lunda lwamalile jemanjajo. Kaneko Yesu ŵawusisye jemanjajo kuti, “Ana mkwete kandu kakulya apano?”

⁴² Jemanjajo ŵampele Yesu ciduswa ca somba jakoca.

⁴³ Yesu piŵapocele sombajo ŵajilile ŵanduwo ali mkulola.

⁴⁴ Yesu ŵatite kuti, “Ayi ni yinamsalile pinaliji ni jemanja pala. Yosope yikwenela gumbalicisidwa yele yiyalembedwe yakwamba une m'Malamusi giŵalembile Mose, ŵakulocesya ni m'buku ja Masalimo.”

⁴⁵ Kaneko Yesu ŵakamucisye jemanjajo kuti agapikanicisye Malemba.

⁴⁶ Ŵasalile jemanjajo kuti, “Malemba gakuti, Mesiya akwenela kuyiwona yipwetesi, kaneka pakumala kwa masiku gatatu tacijimuka ku ŵawe,

⁴⁷ kuti mu lina lyakwe maloŵe gakwamba kupitikuka mtima ni kululucidwa kwa ulemwa* galalicidwe kwa ŵandu ŵa ngosyo syosope kutandilila ku Yelusalemu.

⁴⁸ Jemanja ni ŵimkwenela kuŵa mboni pa yosope yiyatendekwe.

⁴⁹ Une tinjimtumicisya mtuka wele Atati ŵangu uŵasasile kuti tacitumisya. Nambo jemanja mkwenela kutama mu msinda muno mpaka pa ndaŵi jitimcipocela macili gakutyocela kwinani.”

Yesu ŵajigalidwe kwawula kwinani

⁵⁰ Kaneko Yesu ŵalongolele ŵakulijiganya ŵakwe kutyoka mu msinda wa Yelusalemu mpaka kuja kwika ku musi wine wakolanjidwa Betaniya. Kweleko Yesu ŵanyakwile makono gakwe mwinani ni kwapa upile jemanjajo.

⁵¹ Piŵaliji mkwapa upile jemanjajo, ŵalekangene nawo, nipo ŵajigalidwe kwawula kwinani.

⁵² Jemanjajo ŵamlambile jwalakwejo nipo panyuma pakwe ŵawujile ku msinda wa Yelusalemu ali ŵakusangalala mnope.

⁵³ Ndaŵi syosope jemanjaji ŵatamaga m'Nyumba ja AMBUJE ni kumlambilaga jwalakwejo.