Luka 20 - Chiyawo Bible

Ŵamwusisye Yesu ya Ulamusi wakwe

¹ Lisiku line Yesu* piŵaliji mkwiganya ŵandu m'Nyumba ja AMBUJE kwine acilalicilaga Ngani Syambone,* acakulungwa ŵa ŵakutaga mbopesi, aciŵalimu ŵa Malamusi,* pamo ni acakulungwa ŵa Ayuda* ŵayice kwa jwalakwejo.

² Ŵamwusisye kuti, “Mtusalile, ana ulamusi wumkutendela yeleyi mwawujigele kwapi? Ana ŵani ŵampele macili gelega?”

³ Yesu ŵajanjile kuti, “Tinimwusye ciwusyo cimpepe.

⁴ Yohane* M'batisi kuti abatisyeje, ana ulamusi wakwe watyocele kwapi, kwa Mlungu kapena kwa ŵandu?”

⁵ Pa ndaŵi jiŵapikene ciwusyoci, jemanjajo ŵatandite kuŵecetana acimsyene acitiji kuti, Ana tujile cici? Jemanja jila ŵatandite kuŵecetana acimsyene acitiji kuti, “Naga tukuti ŵagajigele kwa Mlungu, jwalakwe jula tajile kuti, ‘Nambi ligongo cici nganimumkulupilila Yohane?’

⁶ Nambo soni naga tujile kuti, ‘Macili gakwe ŵagajigele kwa mundu,’ nikuti ŵandu wosopeŵa tatuponye uwe maganga, ligongo wosopeŵa akulupilile m'mitima mwawo kuti Yohane ali jwakulocesya* jusyesyene.”

⁷ Myoyo ŵagambile kumjanga Yesujo kuti, jemanjajo ŵajanjile kuti, “Ngatukumanyilila kwele kuŵagajigele macili.”

⁸ Jwalakwe jwatite, “Kwali, uwe ngatukumanyilila.” “None jwakwe soni sambano nganimsalila kwele kunajigele macili gakutendela yeleyi.”

Citagu ca ŵamasengo ŵakulima mu mgunda wa yisogosi ya mpeleya

⁹ Yesu ŵasalile ŵandu citagu* acitiji kuti, “Mundu jwine jwalimile mgunda wa yisogosi ya mpeleya ni ŵawujasimisye kwa ŵandu ŵakulima. Msyene mgundajo jwatyosile ni kwawula ku cilambo cine kuŵatemiko ndaŵi jelewu.

¹⁰ Pijakwanile ndaŵi jakukaŵa yisogosi, msyene jula ŵamtumile jwamasengo jwakwe kwa ŵakulima ŵala kuti akajigale mbuwa jakwe ja yisogosi ya mu mgunda mula. Nambo ŵakulima mu mgunda ŵala ŵamputile ni kumtopola ngampa kandu kalikose.

¹¹ Ŵamtumile soni jwamasengo jwine, nombe najo jwaputidwe ni ŵakulima ŵala ni kumtendela yindu ya cipongwe ni kumjawusya ali ŵangali kandu kalikose.

¹² Kaneko msyene mgunda jula ŵamtumile jwamasengo jwakwe jwatatu. Nombe najo jwaputidwe ni ŵakulima ŵala mpaka kumwulasya, kaneko ŵamponyisye kusa kwa mgundawo.

¹³ Kaneko msyene jwa mgunda jula jwaliwusisye kuti, ‘Ana ndende cici sambano? Tinamtume mwanangu jungusinamnonyela jula, mwine jwelejo takamcimbicisye!’

¹⁴ Ŵakulima ŵala piŵam'weni jwalakwejo, ŵasalilene kuti, ‘Jweleju ni jutacimlecela cipanjeci. Kwende tumwulaje kuti ticiŵe cetu cipanjeci.’

¹⁵ Myoyo ŵamponyisye jwalakwejo kusa kwa mgundawo ni ŵamwuleje.” Yesu ŵawusisye ŵandu ŵala kuti, “Ana mkuganisya kuti msyene mgunda wa mpeleya tacitenda cici pitaciyikapo?”

¹⁶ “Yesu ŵapitilisye kuŵeceta kuti msyene mgundajo tacawulaga ŵakulima mgunda ŵala pa ndaŵi jitaciwuja jwalakwejo ni kwajasimisya ŵane mgundawo.” Ŵandu ŵala piŵapikene yeleyi ŵatite kuti, “Alece kuŵeceta yeleyo.”

¹⁷ Yesu ŵalolite ŵandu ŵala ni ŵawusisye kuti, “Ana gopolela kwa Malemba aga kuli cici gagakuti, ‘Liganga liŵalikanile amisili ŵakuŵaka nyumba, lilyolyo lyaŵele liganga lyapandumba, lyakusosekwa mnope.’

¹⁸ Jwalijose jwagwila pa ligangapo taciliwulasya cilu cakwe, soni jwalijose jutilicimgwila ligangali tilicigamba kumswanya.”

Ciwusyo cakwamba kukoma msongo

¹⁹ Aciŵalimu ŵa Malamusi ni acakulungwa ŵa ŵakutaga mbopesi ŵayimanyi kuti Yesu ŵaliji mkwagamba jemanjajo mcitaguci, pa ligongo lyeleli jemanjajo ŵalinjilile kuti amkamule Yesu ndaŵi jijojo nambo ŵajogopaga ŵandu.

²⁰ Myoyo ŵaliji kumlolecesya, ligongo jemanjajo ŵasakaga kumpeleka jwalakwejo kwa jwamkulungwa jwakulamulila upande wa ku Loma. Myoyo ŵatumile ŵandu ŵakumsonda uŵaliji mkulilosya mpela ŵakulupicika. Nambo jemanjaji ŵaliji ŵakusonda ŵasyesyene ŵiŵalinjililaga kuti akamjigale jwalakwejo maloŵe.

²¹ Ŵakumsondawo ŵamsalile Yesu kuti, “Cemwalimu, tukumanyilila kuti ŵalakwe akusaŵeceta ni kwiganya cenene mwangali lusagu. Akusajiganya Malamusi ga Mlungu mu litala lyakuwona.

²² Ana Malamusi ga Mlungu gakusatukunda kuti tukomeje msongo kwa Mwenye jwa ku Loma, kapena iyayi?”

²³ Nambo Yesu ŵasimanyi nganisyo sya ndale sya jemanjajo ni ŵasalile kuti,

²⁴ “Mundosye likobili. Ana ngopeji ni linali ya ŵani?” Jemanjajo ŵajanjile kuti, “Yosopeyi yili ya Mwenye jwa ku Loma.”*

²⁵ Yesu ŵasalile jemanjajo kuti, “Sambano mpeleceje kwa mwenye yakwenela kupeleka kwa mwenye, soni mpeleceje kwa Mlungu yayili yakwe ya Mlungu.”

²⁶ Myoyo ŵalepele kumsapula mkamwa pameso pa ŵandu pa yele yiŵaŵecete jwalakwejo. Nombe nawo jemanjajo ŵagambile kuti jii, kusimonga ni maloŵe giŵaŵecete Yesu.

Ciwusyo cakwamba ya kwimuka ku ŵawe

²⁷ Ŵandu ŵane ŵa mwikuga lya ŵakutaga mbopesi ŵakolanjidwa Asaduki* ŵayice kwa Yesu. Jemanjajo ŵatiji kuti ŵawe ngasajimuka soni. Kaneko ŵamwusisye Yesu kuti,

²⁸ “Cemwalimu, Mose* ŵatulembele lilamusi lyakuti, ‘Naga jwamlume akuwa ni kumleka jwamkongwe jwakwe ali jwangali mwanace, mlongo mjakwe jwa mundu jwakuwajo amlombe jwamkongwejo kuti amŵelecele ŵanace mlongo mjakwe jula.’

²⁹ Sambano ŵapali acalume msano ni ŵaŵili ŵa pa ulongo. Jwandanda ŵamlombile jwamkongwe nambo nganamŵelecela jwamkongwejo ŵanace.

³⁰ Jwamlume jwaŵili, ŵamlombile jwamkongwejo nambo nganamŵelecela ŵanace.

³¹ Yeleyi yatendekwe soni kwa jwamlume jwatatu. Pambesi pakwe acalume ŵa pa ulongo wosope msano ni ŵaŵili ŵala ŵamlombile jwamkongwejo nambo ŵawile ngamŵelecela jwamkongwejo ŵanace.

³² Pambesi pakwe nombe najo jwamkongwe jula jwawile.

³³ Sambano pa lisiku lyele Mlungu litacajimusya ŵandu ku ŵawe, ana jwamkongwe jweleju taciŵa jwa ŵani, pakuti acalume msano ni ŵaŵili ŵa pa ulongo ŵala ŵamlombile jwamkongwejo?”

³⁴ Yesu ŵajanjile jemanjajo kuti, “Acalume ni acakongwe ŵa pa cilambo capasi pano akusalombela ni kulombedwa,

³⁵ nambo acalume ni acakongwe ŵitaciŵa ŵakwenela kuŵa ni umi pitacijimuka ku ŵawe ngasalombela kapena kulombedwa.

³⁶ Jemanjajo taciŵa mpela malayika,* nipo ngasawa soni, jemanjajo ali ŵanace ŵa Mlungu ligongo lyakuti jemanjajo ŵajimusidwe ku ŵawe.

³⁷ Kupitila mu ngani ja liwukutu lyakukolela ni moto, Mose akutulosya uwe cenene kuti ŵandu tacijimuka ku ŵawe. Jwalakwejo jwatite kuti, ‘Ambuje ali Mlungu jwele Abulahamu,* Isaki ni Yakobo* ŵamlambilaga.’

³⁸ Jwalakwejo ali Mlungu jwa ŵandu ŵali cijumi ngaŵaga jwa ŵandu ŵawe, ali ni ligongo lyakwe kwa jwalakwejo ŵandu wosope ali ŵa cijumi.”

³⁹ Ŵane mwa aciŵalimu ŵa Malamusi ŵamsalile Yesu kuti, “Cemwalimu ajanjile cenene.”

⁴⁰ Ŵaŵecete myoyo ligongo Asaduki ŵala nganalimba mtima kumwusya jwalakwejo yiwusyo.

Ya Mkulupusyo

⁴¹ Yesu ŵawusisye jemanjajo kuti, “Ana ligongo cici mkusatiji Klistu* ali mwanace jwa Daudi?*

⁴² M'buku ja Masalimo msyene Daudi akuŵeceta kuti; ‘Ambuje ŵasalile Ambuje ŵangu, Tamani ku mkono wangu wamlyo

⁴³ mpaka pitinjasandusya amagongo ŵenu, kuŵa mpela cakuliŵatila sajo syenu.’

⁴⁴ “Myoyo jwalakwejo akusiŵakolanga Daudi kuti ‘Ambuje;’ nambi mpaka aŵe uli mwanace jwakwe?”

Yesu ŵakalamwisye ŵandu kwambaga ya aciŵalimu ŵa Malamusi

⁴⁵ Ŵandu wosope piŵaliji kumpikanila Yesu, jwalakwejo ŵasalile ŵakulijiganya* ŵakwe kuti,

⁴⁶ “Mkalamuce nawo aciŵalimu ŵa Malamusi. Akusanonyela kwenda ali awete mikanjo jelewu ni cakulinga cakuti ŵandu ŵakomasyeje jemanjajo mwa ulemu m'misika. Akusanonyela kutama pa malo ga ucimbicimbi m'Majumba gakupopelela ni soni ku yindimba.

⁴⁷ Akusiŵalambusya acakongwe ŵamasije* ni kupopelaga mapopelo gelewu. Ŵandu ŵeleŵa tacipegwa cilango kwa mnope kwapunda ŵane.”