Luka 19 - Chiyawo Bible

Yesu ni Sakeyo

¹ Yesu* ŵajinjile mu msinda wa Yeliko pa ulendo wakwe uŵapelenganyaga kwawula ku Yelusalemu.

² Kweleko kwaliji kwana mundu jwamkulungwa jwa ŵakomesya msongo lina lyakwe Sakeyo soni ŵaliji ŵakusicila.

³ Jwalakweju jwasakaga kuti amlole Yesu kuti ana ali mundu jwamti uli. Nambo ligongo lya msingu wakwe wejipi Sakeyojo ŵalepele kumwona Yesu ligongo lya winji wa ŵandu.

⁴ Myoyo jwalakwejo jwawutucile pasogolo ni jwakwesile mcitela ca mkuju kuti amwone Yesu pakuti jwalakwejo ŵaliji mkupita mwitala lilyolyo.

⁵ Yesu piŵayice pa gele malogo ŵalolite mwinani ni ŵamsalile jwalakwejo kuti, “Sakeyo, tulukani mwacitema, pakuti lelo ngwenela kutama namwe ku nyumba jenu.”

⁶ Sakeyo ŵatulwice mwacitema, kaneko ŵampocele Yesu mwalukondwa.

⁷ Ŵandu piŵayiweni yeleyi ŵatandite kunyinyita kuti, “Munduju apite mpela mlendo ku nyumba ja mundu jwakulemwa.”

⁸ Nambo Sakeyo ŵajimi ni ŵamsalile Yesu kuti, “Ambuje, tinjipeleka hafu ja yipanje yangu kwa ŵandu ŵakulaga. Naga najigele kandu kalikose kwa mundu mwakulambusya tinjimwucisya jwalakwejo kacece.”

⁹ Yesu ŵamsalile jwalakwejo kuti, “Lelo, cikulupusyo ciyice pa liŵasa alino, pakuti nombe najo ali mwanace jwa Abulahamu.*

¹⁰ Mwanace jwa Mundu* ayice kukusosasosa ni kukulupusya ŵandu ŵaŵasokonecele.”

Citagu ca mbiya likumi sya golidi

¹¹ Ŵandu piŵaliji kumpikanila Yesu, jwalakwejo ŵapitilisye kuŵeceta ni kwasalila ŵanduwo citagu,* ligongo ŵaliji ciŵandika ni msinda wa Yelusalemu, nipo ŵanduwo ŵaliji mkuganisya kuti Mlungu tawutamilisye Ucimwene wakwe mwangakaŵa.

¹² Jwalakwejo jwatite, “Jwapali mundu jwine juŵaliji nduna nipo ŵapite ku cilambo cakwakutalika kuti akamjinjisye ucimwene nipo panyuma pakwe awujile kumusi.

¹³ Jwalakwejo jwaŵilasile ŵamasengo ŵakwe likumi nipo ŵampele mbiya likumi jwalijose jakwejakwe ni ŵasalile kuti, ‘Mkamulisye masengo mbiyasi pakutendela malonda kuti mpate mbiya sine syakonjecesya penani pa syelesi mpaka pitinjiwuja une.’

¹⁴ Nambo ŵa mcilambo mwakwemo ŵaŵenganaga najo, nipo ŵatumisye mitenga kukusala kuti, ‘Uwe ngatukusaka kuti mundu jweleju aŵe mwenye jwetu.’

¹⁵ “Atamose kuti yaliji myoyo, jwalakwejo ŵamŵecicepe ucimwene ni ŵawujile kwawula kumangwakwe. Piŵayice kumangwakwe kula, ŵaŵilasile ŵamasengo ŵiŵapele mbiya ŵala ni cakulinga cakuti jwalakwejo amanyilile muŵapatile ŵamasengo ŵakwe ŵala.

¹⁶ Jwandanda jwayice ni jwatite kuti, ‘Ambuje ŵangu, mbiya jimwambele jila mbindwile najo mbiya sine likumi.’

¹⁷ Mbujegwe jula ŵamsalile kuti, ‘Mtesile cenene jwamasengo jwambone. Ligongo lyakuti mkulupicice pa yindu yamnono, sambano timŵe ŵakulamulila misinda likumi.’*

¹⁸ Jwamasengo jwaŵili jwayice ni jwatite kuti, ‘Ambuje ŵangu, mbiya jimwambele jila mbindwile nasyo mbiya sine msano.’

¹⁹ Mbujegwe jula ŵamsalile kuti, ‘M'mwejo timciŵa jwakulamulila misinda msano.’

²⁰ “Jwamasengo jwine jwayice ni jwatite kuti, ‘Mbuje ŵangu, mbiya jenu jila aji, nagambile kujitaŵa pa mpango.

²¹ Naliji mkogopa ligongo m'mwejo mli mundu jwakusawusya, mkusajigala yele nganiyiŵa yenu, soni mkusagowola mbeju syele mkupanda jwakwe ngaŵa m'mwejo.’

²² Mbuje jula jwajanjile kuti, ‘M'mwejo mli jwamasengo jwangalumbana, tinamlamule ni maloŵe genu pego gakutyocela mkamwa mwenu! Ana eti mwamanyililaga kuti une ndili mundu jwakusawusya, jwele jungusagowola yindu yele nganiyiŵa yangu, soni ngusagowola mbeju syele mkupanda jwakwe nganimba une.

²³ Nambi ligongo cici nganimja kuŵika mbiya jangujo ku banki, kuti une pakuwuja nisipocele pamo ni congola magasa cakwe?’

²⁴ “Kaneko ŵasalile ŵandu ŵiŵaliji pelepo kuti, ‘Mumsumule mbiyasyo ni msipelece kwa jwamasengo jwakwete kala mbiya likumi jula.’

²⁵ Ŵanduwo ŵamsalile kuti, ‘Ambuje, jwalakwejo akwete kala mbiya sine likumi.’

²⁶ Nambo jwalakwejo jwajanjile kuti, ‘Ngumsalila kuti jwalijose jwakwete kandu, tacimjonjecesya yine, nambo jwakanakola tacimsumula yosope yakwete.

²⁷ Nambo kwamba ya amagongo ŵangu ŵiŵasosaga kuti une ngaŵa mwenye jwawo ŵala, myice nawo apano ni mwawulaje une ndili mkulola.’ ”

Yesu ŵajinjile mu msinda wa Yelusalemu

²⁸ Yesu piŵamasile kuŵeceta yeleyi ŵalongolele ŵakulijiganya* ŵakwe ni kwawula ku msinda wa Yelusalemu.

²⁹ Piŵaŵandicile misi ja Betifagi ni Betaniya, ciŵandika ni Litumbi lya Olifi, ŵatumile ŵakulijiganya ŵakwe ŵaŵili

³⁰ ni ŵasalile kuti, “Mjawule m'musi wumkuwuwona pasogolo penuwo; pitimkagambe kwinjila m'musimo timkasimane mwanace jwa bulu ali jwamtaŵilile jwele nganakweledwejepo ni mundu jwalijose. Jemanja mkamgopole ni mkayice najo akuno.

³¹ Naga mundu jwalijose akamwusye kuti, ‘Ana mkugopolela cici?’ Jemanja mkasalile kuti Ambuje akwete najo masengo.”

³² Ŵakulijiganya ŵaŵili ŵala ŵajile kusimana yosope mpela muŵasalilile Yesu mula.

³³ Piŵaliji kumgopola mwanace jwa bulujo, acimsyene ŵawusisye kuti, “Ana ligongo cici mkugopola mwanace jwa bulujo?”

³⁴ Jemanjajo ŵajanjile kuti, “Ambuje akumsosa.”

³⁵ Ŵakulijiganya ŵala ŵajile najo kwa Yesu mwanace jwa bulu jula. Kaneko ŵaŵisile yakuwala yawo pa bulujo ni ŵamtesile Yesujo kuti akwele.

³⁶ Yesu piŵaliji mkupita ali akwesile pa bulujo, ŵandu ŵamcimbicisye jwalakwejo pakutandika yakuwala yawo mu msewu.

³⁷ Piŵaliji mkuŵandicila ku Yelusalemu aciselelekaga Litumbi lya Olifi, likuga lyosope lya ŵakulijiganya ŵakwe lyatandite kumlumba Mlungu mwa lukondwa ni mwakwesya maloŵe ligongo lya masengo gosope ga macili ga Yesu giŵagaweni jemanjajo acitiji kuti,

³⁸ “Jwana upile mwenye jwele jwakwisa mu lina lya Ambuje! Mtendele uŵe kwinani, ni ucimbicimbi kwa Mlungu kwinani mnope!”

³⁹ Afalisi* ŵane ŵiŵaliji mwikugamo ŵamsalile Yesu kuti, “Cemwalimu, ŵasalile ŵakulijiganya ŵawo alece yakutendayi.”

⁴⁰ Yesu jwajanjile kuti, “Ngumsalila kuti naga jemanjaji akuleka kugumila, maganga ni gitigatande kugumila.”

Yesu akwalilila ŵandu ŵa mu msinda wa Yelusalemu

⁴¹ Yesu piŵaŵandicile ni kuwuwona msinda wa Yelusalemu ŵawulilile.

⁴² Jwalakwejo jwatite kuti, “Lelo jino ŵandu ŵa mu msinda wa Yelusalemu ngakumanyilila cele citicapa jemanjajo mtendele! Sambano jino cindu celeco cisisice kwa jemanjajo.

⁴³ Ndaŵi tijiciyika jele amagongo ŵenu tacimsyungulila jemanja ni kumtaŵila mapupa gakulimbangana kumsyungulila jemanja ni kumwugalila mbali syosope.

⁴⁴ Tacimjonanga jemanja pamo ni ŵanace wosope ŵali mkati mwa lipupa lyenu lyakulimbangana. Ngasaleka liganga pacanya pa lijakwe. Ayi tiyicitendekwa ligongo nganimwona kuti Mlungu ayice kukumkulupusya jemanja.”

Yesu ŵajiswejesye Nyumba ja AMBUJE

⁴⁵ Kaneko Yesu ŵajinjile m'Nyumba ja AMBUJE ni ŵatandite kwakoposya ŵandu ŵiŵatendaga malonda ga kusumisya ni kucenganya yindu mwelemo.

⁴⁶ Yesu ŵasalile ŵanduwo kuti, “Malemba gakuti, ‘Nyumba jangu tijiciŵa malo gakupopelelamo.’ Nambo jemanja mjitesile kuŵa mbanga jakuŵamo ŵaciswamba.”

⁴⁷ Yesu ŵaliji mkwiganya ku Nyumba ja AMBUJE lisiku ni lisiku. Acakulungwa ŵa ŵakutaga mbopesi, aciŵalimu ŵa Malamusi* ni acakulungwa ŵa Ayuda* ŵasakaga kumwulaga jwalakwejo,

⁴⁸ nambo ŵasoŵile yakutenda ligongo lyakuti ŵandu wosope ŵaliji mkupikanila maloŵe gakwe.