Luka 18 - Chiyawo Bible

Citagu ca jwamkongwe jwa masije ni mundu jwakulamula magambo

¹ Yesu* ŵasalile ŵakulijiganya* ŵakwe citagu* cakwajiganya jemanjajo kuti aŵeje ŵakupopela ndaŵi syosope mwangawujila panyuma.

² Kaneko ŵatite, “M'musi wine wakwe mwapali jwakulamula jwine jwele nganamjogopaga Mlungu kapena kusamalila ya ŵandu ŵane.

³ M'musi m'momo mwaliji mwana jwamkongwe jwa masije. Jwalakweju jwayikaga kwa jwakulamulaju kaŵilikaŵili kukuŵenda kuti, ‘Mjilanye mwakunonyela une pa magambo sikati ja une ni m'magongo jwangu.’

⁴ Kwandaŵi jelewu jwakulamulila jula jwaliji mkukana, nambo panyuma pakwe jwalakwejo jwaganisisye kuti, ‘Atamose une jwangamjogopa Mlungu kapena kusamalila ya umi wa ŵandu ŵane,

⁵ nambope tinamkamucisye jwamkongweju ligongo akulimbicila kusawusya une, tinamjilanyile magambo gakwe, kogopela kumbesya une mtande wa kwikayika kwakwe.’ ”

⁶ Ambuje ŵapitilisye kuŵeceta kuti, “Mpikene yiŵaŵecete jwakulamula jula?

⁷ Nambi Mlungu ngasiŵacenjela ŵakusagulidwa ŵakwe ŵakusapopela kwa jwalakwejo musi ni cilo? Ana tacigamba kwaleka?

⁸ Ngumsalila kuti tacalamulila magambo gawo mwacitema. Nambo pitaciyikaga Mwanace jwa Mundu,* ana tacasimana ŵandu ali ŵana cikulupi pa cilambo pano?”

Citagu ca Mfalisi ni jwakomesya msongo

⁹ Yesu ŵasalile soni citagu ŵandu ŵane ŵakulitenda ŵakulungama ni kwanyosyaga acimjawo.

¹⁰ Ŵatite kuti, “Ŵandu ŵaŵili ŵajile ku Nyumba ja AMBUJE kukupopela. Jwine jwaliji Mfalisi jwine jwakukomesya msongo.”

¹¹ “Mfalisijo jwajimi ni kutanda kupopela mu mtima mwakwe acitiji, ‘Mlungu une ngwatogolela ŵalakwe pakuti une nganimba mpela ŵandu ŵane, ŵawiyi, ŵangalumbana, ni ŵalilama kapena mpela jwakomesya msongoju.

¹² Une ngusalijima kulya kaŵili pa cijuma, soni ngusapeleka ca likumi ca yindu yosope yingusaka.’ ”

¹³ “Nambo jwakomesya msongo* jula jwajimi patali pamti myoyo, soni ngananyakulila meso gakwe kwinani. Jwalakweju ŵaliputile pamtima kulosya kulinondiya kwakwe acitiji, ‘Mlungu andendele canasa une mundu jwa kulemwa.’ ”

¹⁴ Yesu ŵatite, “Ngumsalila kuti jwakomesya msongoju ŵajawile kumangwakwe ali jwamkululucidwe ulemwa* wakwe kupunda Mfalisijo, pakuti jwalijose jwakulinondiya tacimkwesya, ni jwakulikwesya tacimtulusya.”

Yesu akwajaliwasya ŵanace

¹⁵ Ŵandu ŵane ŵayice ni ŵanace ŵawo kwa Yesu kuti ŵape upile jemanjajo, nambo ŵakulijiganya ŵakwe piŵayiweni yeleyi ŵakalipile jemanjajo.

¹⁶ Nambo Yesu ŵaŵilasisye ŵanacewo ni ŵatite kuti, “Mwaleceni ŵanacewo ayice kwa une, mkasimwalekasya pakuti Ucimwene wa Mlungu* uli wa jemanjaji.

¹⁷ Kusyene ngumsalila kuti, jwalijose jwangakupocela Ucimwene wa Mlungu mpela mwanace, jwelejo ngasajinjila mu Ucimwene.”

Mundu jwine jwakusicila

¹⁸ Jwamkulungwa jwine jwa Ayuda jwamwusisye Yesu kuti, “Cemwalimu ŵambone, ana ngwenela kutenda cici kuti ngapocele umi wangamala?”*

¹⁹ Yesu ŵamjanjile kuti, “Ana ligongo cici mkundenda kuti ndili jwambone, pakuti jwambone jika ni Mlungupe?

²⁰ Mkumanyilila yigakuti Malamusi, ‘Mkatenda cikululu, mkawulaga, mkajiŵa, mwacimbicisyeje baba ni mama ŵenu.’ ”

²¹ Mundu jula jwatite, “Malamusi gosopega mbele ndili mkugakuya kutandilila ndili mcanda.”

²² Yesu piŵapikene maloŵego, ŵamsalile mundu jula kuti, “Cikumsoŵa cimo cakuti mtende. Mkasumisye yindu yosope yimkwete, nipo mbiya syakwe mkasipelece kwa ŵandu ŵakulaga, ni timcipocela yipanje yakwinani. Kaneko myice munguye une.”

²³ Nambo mundu jula pijwapikene yeleyi, jwadandawile mnope ligongo lyakuti jwaliji jwakusicila mnope.

²⁴ Yesu ŵamlolite jwalakwejo ni kumsalila kuti, “Cili cindu cakusawusya kuti mundu jwakusicila akajinjile mu Ucimwene wa Mlungu.

²⁵ Cili cindu cakusawusya kuti mundu jwakusicila akajinjile mu Ucimwene wa Mlungu, kulekangana ni kuti ngamila* jijinjile pebowo lya singano.”

²⁶ Ŵandu ŵaŵapikene maloŵega ŵawusisye kuti, “Nambi ŵani ŵitakakulupuce?”

²⁷ Yesu ŵasalile kuti, “Yindu yili yangakomboleka ni mundu yili yakomboleka ni Mlungu.”

²⁸ Kaneko Petulo* ŵatite, “Alole, uwetu tulesile mangwetu kwakuya ŵalakwe.”

²⁹ Yesu ŵasalile kuti, “Ngumsalila yakuwona kuti, jwalijose jwalesile mangwakwe kapena ŵamkwakwe, kapena acalongo acimjakwe, kapena acinangolo ŵakwe, kapena ŵanace ligongo lya Ucimwene wa Mlungu,

³⁰ jwalakwejo tacikola mangwakwe gejinji pa ndaŵi ajino kupunda kala, ni ndaŵi jikwisa ja msogolo tacipocela umi wangamala.”

Yesu akuŵeceta katatu ya kuwa ni kwimuka kwakwe

³¹ Yesu ŵajigalile pambali ŵakulijiganya ŵakwe likumi ni ŵaŵili ŵala ni kwasalila kuti, “Tuli pa ulendo wakuja ku Yelusalemu, nipo yosope yiŵalembile ŵakulocesya kwambaga Mwanace jwa Mundu tiyikatendecekwe kweleko.

³² Takampelece kwa ŵandu ŵa mitundu jine* ŵele ŵitakamlalatile, ni kumnyosya jwalakwejo ni kumsunila mata.

³³ Takamkwapule ni kumwulaga, nambo gali gamasile masiku gatatu jwalakwejo tacijimuka ku ŵawe.”

³⁴ Ŵakulijiganya ŵala nganayipikanicicisya yeleyi. Gopolela kwa maloŵe gelega kwaliji kwakusisika kwa jemanjajo, ali ni ligongo lyakwe nganapikanicisya yiŵaŵecetaga Yesujo.

Yesu ŵamposisye mundu jwangalola

³⁵ Yesu piŵaliji mkuŵandicila msinda wa Yeliko, mundu jwine jwangalola jwatemi mungulugulu msewu nipo jwaliji mkuŵenda kwa ŵandu.

³⁶ Jwalakweju piŵapikene kwenda kwa ŵandu ŵajinji mu msewumo jwawusisye kuti, “Ana cikutendekwa cici?”

³⁷ Ŵandu ŵala ŵamjanjile kuti, “Yesu jwa ku Nasaleti akupita.”

³⁸ Jwalakwejo jwaŵecete mwakwesya maloŵe kuti, “Ŵalakwe Yesu mwanace jwa Daudi,* andendele canasa!”

³⁹ Ŵandu ŵiŵaliji pasogolo ŵamjamwice acitiji kuti, “Mtulale!” Nambo jwalakwejo jwapitilisye kugumila mwakwesya maloŵe acitiji kuti, “Ŵalakwe Mwanagwawo Daudi, andendele canasa!”

⁴⁰ Yesu ŵajimi nipo ŵalamwile ŵandu ŵala kuti amjigale mundujo ayice najo piŵaliji jwalakwepo. Mundu jula piŵayice pakuŵandicila ni Yesu, Yesu ŵamwusisye jwalakwejo kuti,

⁴¹ “Ana mkusosa kuti nimtendele cici?” Mundujo jwajanjile kuti, “Ambuje, ngusosa nipakombole kulola.”

⁴² Yesu ŵamsalile kuti, “Lolani, kulupilila kwenu kumposisye.”

⁴³ Ndaŵi jijojo ŵapakombwele kulola nipo jwalakwejo jwatandite kumkuya Yesu, acimtogolelaga Mlungu. Ŵandu wosope piŵayiweni yeleyi ŵamtogolele Mlungu.