Luka 17 - Chiyawo Bible

Ulemwa

¹ Yesu* ŵasalile ŵakulijiganya* ŵakwe kuti, “Yakumlemwekasya mundu ngasiyilepela kuwoneka, nambo likungu lili kwa mundu jwakwisa nayo.

² Kukaliji kwambone kumkoleka jwalakwejo liganga lyekulungwa mu lukosi mwakwe ni kumponya m'nyasa, kulekangana ni kuti alemwekasye jumo jwa ŵanace ŵanandiŵa.

³ Myoyo mkalamuce pa yele yimkutenda! “Mlongo mjenu naga alemwisye, mumjamuceje, naga akupitikuka mtima ni kuleka ulemwa* mumkululucileje.

⁴ Naga akumlemwecesya kasano ni kaŵili pa lisiku limpepe, ni jwalakwejo akwisa kwenumwe kukumsalila kuti ‘Pepani nimlemwecesye,’ mumkululucileje.”

Ya cikulupi

⁵ Ŵandumetume ŵaŵendile Ambuje kuti, “Acitende cikulupi cetu kuti ciŵe cakulimbangana!”

⁶ Yesu ŵajanjile kuti, “Jemanja mkakole cikulupi atamose camwana mpela lusongolo lwa mbeju ja citela ca mkuju, mkakombolece kucisalila citela cekulungwaci kuti, ‘Mtupuce ni mkalipandicile m'nyasa!’ celeco cikampikanile.”

Masengo ga jwakutumicila

⁷ “Yesu ŵatite soni kuti, tuwanicisye kuti jwine jwa jemanja akwete jwamasengo jwakulima ku migunda kapena jwakulanga ngondolo. Jwalakwejo pawusile ku migunda, ana timumsalile kuti, ‘Myice mtame apa kuti mlye?’

⁸ Ngaŵa myoyo, nambo timumsalile kuti, ‘Mungolocesye yakulya. Mliŵicile cile kundumicila mpaka patimale kulya ni kumwa, nipo m'mwejo timlye ni kumwa panyuma pakwe.’

⁹ Ana mpaka mumtogolele jwamasengo ligongo lyakuti atesile yele yimwamlamwile kuti atende?

¹⁰ Myoyo soni jemanja, mli nimsalile kutenda yosope yimwalamulidwe kuti myitende, mjileje kuti, ‘Uwe tuli ŵamasengo ŵangajenela kupocela kandu. Uwe tugambile kutenda yele yitwaŵajile kuyitenda.’ ”

Yesu ŵaposisye ŵamatana likumi

¹¹ Pa ulendo wakwe wakwawula ku Yelusalemu, Yesu ŵapitile sikati ja malile ga cilambo ca Samaliya ni Galileya.

¹² Piŵajinjilaga m'musi wine, ŵasimene ni ŵandu likumi ŵiŵaliji mkulwala ulwele wa matana. Jemanjajo ŵajimi pakutalicila pamti myoyo,

¹³ nipo ŵaliji mkuŵeceta mwakwesya maloŵe acitiji, “Ambuje Yesu atutendele uwe canasa.”

¹⁴ Yesu piŵaweni jemanjajo ŵasalile kuti, “Mjawule ni mkalilosye kwa ŵakutaga mbopesi.” Jemanjajo piŵaliji mkwawula ŵasimanikwe kuti aposile.

¹⁵ Jumo jwa ŵa matana ŵala piŵaweni kuti aposile, ŵawujilile acimlumbaga Mlungu mwakwesya maloŵe,

¹⁶ kaneko jwatindiŵele ni kwinamila pasi pameso pa Yesu, acimtogolelaga. Munduju jwaliji jwakutyocela ku cilambo ca Samaliya.

¹⁷ Yesu ŵawusisye kuti, “Ana ŵandu ŵaposile ŵala eti ŵaliji likumi? Nambi ŵane msano ni mcece ŵala apite kwapi?

¹⁸ Ana pangali jwawusile kuti amtogolele Mlungu akaŵe mlendo peju?”

¹⁹ Kaneko Yesu ŵamsalile mundu jula kuti, “Jimukani mjawuleje, cikulupi cenu cimposisye.”

Ya mwele Mlungu mutaciwutamilisya Ucimwene wakwe

²⁰ Afalisi* ŵane ŵamwusisye Yesu kuti, “Ana Mlungu taciwutamilisya cakaci Ucimwene wakwe pa cilambo capasi pano?” Yesu ŵajanjile kuti, “Mlungu jwangatamilisya Ucimwene wakwe mcilolaga ni meso.

²¹ Pangali mundu jutacijila kuti, ‘Mlole uli apano,’ kapena ‘Awo uli akowo!’ Pakuti Ucimwene wa Mlungu* uli mwa jemanja m'mitima mwenu.”

²² Kaneko Yesu ŵasalile ŵakulijiganya ŵakwe kuti, “Jikwisa ndaŵi jitimcisosa kujiwona ndaŵi jakwisa kwa Mwanace jwa Mundu,* nambo ngasimjiwona.

²³ Ŵandu tacimsalilaga kuti, ‘Mlole awo uli akowo,’ kapena ‘Awu uli apanowu,’ mkasimjawula kweleko kapena kwakuya jemanjajo.

²⁴ Mpela njasi jikusamesya ni kuŵala kwinani kutyocela mbali jine kuja ku mbali jine, myoyo soni Mwanace jwa Mundu tiyiciŵa myoyo pa lisiku litaciyikaga.

²⁵ Nambo jwalakwejo akwenela kuti awone yisawusyo yakogoya ni kukanidwa ni ŵandu ŵa mpago awuno.

²⁶ Lisiku lyakwisa kwa Mwanace jwa Mundu tiliciŵa mpela muyatendekwele yindu mu ndaŵi ja Nowa.

²⁷ Mu gele masikugo, ŵandu ŵagambaga kulya ni kumwa, ŵaliji mkulombela ni kulombedwa mpaka pa lisiku liŵajinjile Nowa mcombo mula. Kaneko cayice cikumba ca mesi ni cajonasile wosopewo.

²⁸ Mu ndaŵi ja Loti, ŵandu ŵalyaga ni kumwa, soni ŵaliji mkusumisya malonda, kupanda mbeju ni kutaŵa majumba.

²⁹ Nambo lisiku liŵakopwece Loti mu msinda wa Sodomu, Mlungu ŵagwisisye moto wa maganga ga sulufule* gakutyocela kwinani nipo ŵawuleje ŵandu wosope.

³⁰ Tiyiciŵa soni myoyo pitaciyika Mwanace jwa Mundu.

³¹ “Pa lyele lisikulyo jutaciŵa pa msakasa wa nyumba, katundu jwakwe ali m'nyumbamo, akatuluka kuja kujigala katundujo, yalumo soni ni jutaciŵa ku migunda nombe najo akawujila ku nyumba.

³² Mkumbucile yiyatendekwe kwa ŵamkwakwe Loti.

³³ Jwalijose jwakulinga kuwukulupusya umi wakwe taciwujasa, nambo jwalijose jwa kuwujasa acatumicilaga Ambuje taciwukulupusya.

³⁴ Ngumsalila kuti cele ciloco ŵandu ŵaŵili tacigonaga cindanda cimpepe, nambo jumo tacijigalidwa nipo jwinejo tacimleka.

³⁵ Acakongwe ŵaŵili taciŵa ali mkutwa, jumojo tacimjigala, jwinejo tacimleka.

³⁶ Ŵandu ŵaŵili taciŵa ali mu mgunda, jumo tacijigalidwa nipo jwinejo tacimleka.”

³⁷ Kaneko ŵakulijiganya ŵa Yesu ŵawusisye kuti, “Ambuje, ana yeleyi tiyicitendekwa kwapi?” Yesu ŵajanjile kuti, “Kulikose kuciwilile cindu, matumbusi gakusasongana kweleko.”