Luka 11 - Chiyawo Bible

Yesu ŵajiganyisye kupopela

¹ Lisiku line Yesu* ŵaliji mkupopela pa malo gane. Piŵamasile, jwakulijiganya jwakwe jwine jwamŵendile jwalakwejo kuti, “Ambuje atujiganye uwe kupopela, mpela Yohane* M'batisi muŵajiganyicisye ŵakulijiganya* ŵakwe.”

² Yesu ŵatite, “Pamkupopela mjileje myi: ‘Atati, lina lyawo licimbicikwe, Ucimwene wawo uyice.

³ Atupe uwe lisiku ni lisiku cakulya cetu ca masiku gosope

⁴ Atukululucile yakulemwa yetu, Pakuti uwe tukusitwakululucila ŵakutulemwecesya. Akakunda kuti jwakusakalajo atulinje uwe.’ ”

⁵ Yesu ŵasalile soni ŵakulijiganya ŵakwe kuti, “Tuwanicisye kuti jumo jwa jemanja akwawula ku nyumba ja mjakwe pakati cilo ni kumsalila kuti, ‘Mjangu mumbe yakulya,

⁶ ligongo ku nyumba kuyice mjangu jwali pa ulendo wakupelenganya, mwakuti pa ndaŵi ajino kwangali cakulya cilicose cakuti nimpe jwalakwejo.’

⁷ Sambano mjenu jwali m'nyumbajo ni akwanga kuti, ‘Mkasimusawusya, mbugele kala litanga soni une ni ŵanace ŵangu tugonile katasi, apano ngaŵa mkwimuka kuti nimpe yakulyayo.’

⁸ Ngumsalila kuti jwalakwejo tacijimuka ni kumpa yakulya mjakwejo, ngaŵa ligongo lyakuti ali mjakwe nambo ligongo lya mtawu wa jwakuŵendajo. Myoyo tacimpa yosope yakusoŵa.”

⁹ “Myoyo ngumsalila jemanja kuti, mŵende nipo Mlungu tacimpa yimkusaka, msosesoseje nipo timcisimana, poposyani nipo Mlungu tacimwugulila litanga.

¹⁰ Pakuti jwalijose jwaŵendile ni jwakusapocela, jwakusosasosa ni jwakusasimana, soni jwakupoposya ni jwakusawugulilidwa litanga.

¹¹ Ana ŵani mwa jemanja ŵimli acatati, mpaka mumpe mwanace lijoka kutendaga jwalakwejo ali aŵendile somba?

¹² Kapena ali aŵendile lindanda ana mpaka ampe ciŵalaŵala?

¹³ Naga jemanja ni ungalumbana wenuwo mkusim'manyilila kwapa ŵanace ŵenu yindu yambone, nambi uli Atati ŵenu wa kwinani, ana mpaka calepelekasye cici kupeleka Msimu Ŵaswela kwa ŵele ŵakumŵenda jwalakwejo.”

Yesu ni Msimu wakusakala

¹⁴ Lisiku line Yesu ŵaliji mkukoposya msimu wakusakala uwamtendekasyaga kuti akaŵecetaga. Msimuwo piŵakopwece, mundu jula, jwatandite kuŵeceta mwakuti ŵandu ŵajinji ŵiŵaliji pelepo ŵasimonjile.

¹⁵ Nambo ŵandu ŵane ŵatite, “Macili gakukopocesya misimu jakusakalaji gali gakutyocela kwa Belesebulu,* mcimwene jwa misimu jakusakala.”*

¹⁶ Ŵandu ŵane pakusaka kumlinga jwalakwejo macili gakwe, ŵamŵendile kuti ŵalosye cimanyisyo cakumasya lunda cakutyocela kwinani.

¹⁷ Nambo Yesu ŵasimanyi nganisyo sya jemanjajo ni ŵasalile kuti, “Ŵandu ŵa mu ucimwene uliwose naga akutanda kwimucilana, kumala kwa ucimwenewo kukusaŵa kukoko. Soni ŵandu ŵa m'musi kapena liŵasa lililyose akutanda kukangana, musi kapena liŵasa lyamti myoyo ngaŵa mkulimba kose.

¹⁸ Naga ŵakumkuya Satana* akutanda kwimucilana acimsyene, ana ucimwene wakwe mpaka ulimbe camtuli? Pakuti mkusatiji kuti, une ngukoposya misimu jakusakala kupitila mu macili ga Belesebulu.

¹⁹ Naga uneji ngusakoposya misimu jakusakala kupitila mu macili ga Belesebulu, ana ŵakumkuya ŵenu akusajikoposya kupitila mu macili ga ŵani? Myoyo ŵakulijiganya ŵenu pewo ni ŵitacimgomeka kuti jemanja mli ŵakulemwa.

²⁰ Nambo naga une ngusakamulisya masengo macili ga Mlungu pakujikoposya misimu jakusakala, ni kuti yikulosya kuti Mlungu atandite kala kuwutamilisya Ucimwene wakwe pasikati pa jemanja.”

²¹ “Naga mundu jwamacili akulondela nyumba jakwe ali akwete yida yakuputila ngondo, katundu jwakwe akusasunjika cenene.

²² Nambo naga akwisa mundu jwamacili jwine, ni kumpunda jwelejo, akusamsumula yida yakwe yakuputila ngondo yiŵaliji mkuyikulupilila yila, nipo akusamgaŵanya katundu jwasumwilejo.”

²³ “Mundu jwangakukamulana ni une ni kuti ali jwakusisyana ni une. Jwele jwakakungamusya kusonganya ni kuti jwelejo ali jwakumwasanya.”

Kuwujila kwa msimu wakusakala

²⁴ “Msimu wakusakala naga ukopwece mwa mundu ukusajaga kukwendajenda kumalo kukuli kwangali mesi, kukusosasosa malo gakupumulila. Naga msimuwo ulepele kugasimana malogo ukasatiji kuti, ‘Timbujile soni ku nyumba jangu kunaliji kula.’

²⁵ Myoyo naga uli uwusile, ukusasimana m'nyumba mula muli mwekolosye cenene.

²⁶ Pelepo ukusajaga kujijigala misimu jine msano ni jiŵili jakusakala kuwupunda winewo, josopejo jikusajinjila ni kutamilicika m'momo. Myoyo ndamo syakuyicisya sya mundu jula sikusaŵaga syakusakala kupunda ndamo syakwe sya pandanda sila.”

Ya upile usyesyene

²⁷ Yesu piŵamasile kuŵeceta yeleyi, jwamkongwe jwine juŵaliji mwikuga pemo ŵaŵecete mwakwesya maloŵe kumsalila Yesu acitiji kuti, “Ŵana upile ŵakongwe ŵiŵaŵelece ni kwajonjesya ŵalakwe.”

²⁸ Nambo Yesu ŵajanjile kuti, “Ŵana upile usyesyene ali ŵandu ŵakugapikana maloŵe ga Mlungu ni kugakamulisya masengo.”

Ŵandu ŵasakaga cimanyisyo cakumasya lunda

²⁹ Ŵandu piŵatandite kutupa, Yesu ŵasalile jemanjajo kuti, “Ŵandu ŵa mpago awuno ali ŵangalumbana, akusaka kulola cimanyisyo cakumasya lunda cakutyocela kwa Mlungu. Pangali jutaciciwona cimanyisyo cakumasya lundaco, akaŵe cilacila ca jwakulocesya* Yona.

³⁰ Pakuti mpela Yona jula ŵaliji cimanyisyo kwa ŵandu ŵa ku Ninefe, myoyo soni Mwanace jwa Mundu* taciŵa cimanyisyo kwa ŵandu ŵa mpago awuno.

³¹ Pa lisiku lyakulamula, mwenye jwamkongwe jwa ku cilambo ca Sheba tacijima pampepe ni ŵandu ŵa mpago awuno ni taciŵaga mkwasisya, ligongo ŵajesile kutyocela kumbesi kwa cilambo kuja kupikanila yakuŵeceta ya lunda ya Mwenye Solomoni. Mlole sambano, apanotu pana jwakumpunda Solomoni.

³² Pa lisiku lyakulamula, ŵandu ŵa ku cilambo ca Ninefe tacijima ni kumsisya jemanja ligongo lyakuti jemanjajo ŵapitikwice mitima ni kuleka ulemwa* wawo pa ndaŵi jiŵapikene kulalicila kwa Yona, ni mlole jwakumpunda Yona ali apano.”

Ya nyali ja cilu

³³ Pangali mundu jwakusapamba nyali ni kujiŵika pakusisika kapena kujiwunicila ni ciŵiga. M'malo mwakwe akusajiŵika pa malo gakuwonecela kuti ŵandu ŵakwinjila m'nyumbamo aliwone lilanguka lyakwe.

³⁴ Meso genu gali mpela nyali jakumulicila cilu cenu. Naga meso genu gali cenene, cilu cenu mosope cikusaŵa mwilanguka. Nambo naga meso genu nganigaŵa cenene, cilu cenu cosope cikusaŵa mu cipi.

³⁵ Sambano mganicisye mwakalamuka kuti lilanguka lyalili mcilu mwenu likasanduka kuŵa cipi.

³⁶ Naga cilu cenu cosope cili mwilanguka, pangali mbali jenu jine jitijiŵe mcipi, pakuti lilangukalyo tilimlangucisye mosope mpela nyali mujikusamlangucila m'mwejo ni lilanguka lyakwe.

Yesu akwajamuka Afalisi ni Aciŵalimu ŵa Malamusi

³⁷ Yesu piŵamasile kuŵeceta jumo jwa Afalisi* ŵamŵilasile jwalakwejo kuti akalye najo, myoyo Yesujo jwapite nipo ŵajinjile m'nyumba ni kutama pasi kuti alye.

³⁸ Mfalisi* jwine ŵasimonjile piŵam'weni Yesu ali mkulya jwanganaŵa myala pakukuya msyungu wa Ayuda wakunaŵa myala.

³⁹ Ambuje ŵajanjile kuti, “Jemanja Afalisi mkusacapaga kusa kwa mgawo ni mbale, nambo m'mitima mwa jemanja mugumbele ni nganisyo syakusakala.

⁴⁰ Jemanja mli ŵandu ŵakuloŵela! Ana juŵapanganyisye kusa nganapanganya soni ni mkati mwakwe?

⁴¹ Pimkupeleka mituka jenu mwa kusosa kwenu kwa ŵandu ŵakulaga mpeleceje yayili mkatimo, nipo yida yenu yakulila tiyiciŵa yeswela.”

⁴² “Mkwete likungu jemanja Afalisi! Mkusapeleka calikumi* kwa Mlungu ca tumbeju twakununjila, ni tumbeju twakunonyesya yakulya, soni mbeju sya ku matimbe sya mtundu uliwose. Nambo jemanja mkusimnyosya cilungamo ni cinonyelo ca Mlungu. Mkaŵajilene kutenda yeleyi, nambo soni ngaleka yineyi.”

⁴³ “Ŵana likungu jemanja Afalisi, ligongo mkusanonyela kutamila pa yitengu ya ucimbicimbi ku nyumba sya mapopelo* soni akusanonyela kuti ŵakomasyeje mwakumcimbicisya m'misika.

⁴⁴ Mkwete likungu jemanja, ligongo mkulandana ni malembe gangali yimanyisyo, ŵandu ŵakuliŵata pelepo ngakusamanyilila kuti akuliŵata pa malembe.”

⁴⁵ Jumo jwa aciŵalimu ŵa Malamusi* ŵamwusisye Yesu kuti, “Cemwalimu, ŵalakwe pakuŵeceta yeleyi, ana akutujamuka ni uwe ŵakwe?”

⁴⁶ Yesu ŵamjanjile jwalakwejo kuti, “Ŵana likungu jemanja aciŵalimu ŵa Malamusi, ligongo mkwatwika ŵandu misigo ja usito, jimkujilepela mwacisyene atamose kumkwaya ni cala cenu.

⁴⁷ Ŵana likungu jemanja, ŵimkuŵaka malembe ga ŵakulocesya ŵiŵawulajidwe ni acinangolo ŵenu ŵakala.

⁴⁸ Sambano jemanja mkwiticisya kuti yitendo ya acinangolo ŵenu ŵakalawo yaliji yambone, pakuti jemanjajo ŵawuleje ŵakulocesyawo, nipo jemanja ni mkuŵaka malembe gawo.

⁴⁹ Kwa lyele ligongoli, Mlungu kupitila mu lunda lwakwe ŵatite, ‘Tinjatumicisya jemanjajo ŵakulocesya ni ŵandumetume, nambo ŵane taciwulajidwa ni ŵandu soni ŵane mwa jemanjajo tacilagasidwa.’

⁵⁰ Myoyo ŵandu ŵa mpago awuno tacipocela cilango ligongo lya ŵakulocesya wosope ŵiŵawulajidwe kutyocela ndaŵi jicapanganyidwe cilambo capasi.

⁵¹ Kutandilila pa kuwulajidwa kwa Abele mpaka kuwulajidwa kwa Sakaliya ŵele ŵaŵawulajidwe m'nyumba ja Mlungu sikati ja malo gakupelecela mbopesi ni malo gamaswela mnope. Ngumsalila kuti ŵandu ŵa mpago awuno tacilagasidwa ligongo lya ŵakuwulajidwawo.”

⁵² “Mkwete likungu jemanja aciŵalimu ŵa Malamusi, ligongo mwasumwile kiyi jwakuwugulila m'nyumba ja umanyilisi. Jemanja mwacimsyene ngasimjinjilamo, nipo mkusimwasiŵilicisya ŵele ŵakulinjilila kuti ajinjilemo.”

⁵³ Yesu piŵatyosile gele malogo, aciŵalimu ŵa Malamusi ni Afalisi ŵala ŵatandite kumsonda ni kumpanika ni yiwusyo yejinji yakusawusya.

⁵⁴ Cakulinga ca jemanjajo caliji cakuti ampale Yesu mkamwa.