Luka 10 - Chiyawo Bible

Yesu ŵatumile ŵakulijiganya makumi msano ni gaŵili kwisa ŵaŵili

¹ Piyamasile yeleyi Ambuje ŵasagwile ŵandu makumi msano ni gaŵili kwisa ŵaŵili ni ŵatumile ŵaŵili ŵaŵili kwawula ku musi uliwose ni kumalo kulikose kuŵatiji ajawule asyene.

² Yesu* ŵasalile jemanjajo kuti, “Yindu yagowola yili yejinji, nambo ŵamasengo ŵakuti ayisonganye yosope pampepe ali ŵamnono. Myoyo mŵende kwa msyene yakugowola atumisye ŵamasengo kuti akasonganye yagowola yakwe.

³ Jawulagani sambano, ngumtuma jemanja mpela ŵanace ŵangondolo sikati ja masogo.*

⁴ Mkajigala msaku wa mbiya, kapena msaku wa pa ulendo kapena sapato; mkasimjima mwitala kuti mkomasyane ni mundu.

⁵ M'nyumba jilijose jitimkajinjile, pandanda mkajile kuti, ‘Mlungu ŵape mtendele ŵandu wosope ŵali m'nyumba muno.’

⁶ Naga m'nyumbamo mwana mundu jwakusaka mtendele, mtendele umsasilewo tiwuciŵa pa jwalakwejo. Nambo naga mwangali jwakusaka mtendele, mtendele umsasilewo tiwuciwujila kwa jemanja.

⁷ Mkatameje m'nyumba m'momo, mkalyeje ni kumwa yitakampe, pakuti jwamasengo akwenela kupocela yakusosekwa pa umi wakwe. Mkasimjaga kutyoka kumyicileko ni kuja kukwinjila m'nyumba sine.

⁸ Naga mkwinjila mu msinda ni kusimanikwa kuti ŵandu ŵa mu msindamo ampocele cenene, mkalyeje yakulya yitakamkolocesyeyo.

⁹ Mkaposye ŵandu ŵakulwala ŵali mu msindamo ni kwasalila kuti, ‘Ucimwene wa Mlungu* uyice pa jemanjajo.’

¹⁰ Nambo naga mkuja kwinjila mu msinda ni kusimanikwa kuti ŵandu ŵa mu msindamo nganampocela cenene, mkajawule m'misewu ja mu msindamo ni mkajile kuti,

¹¹ ‘Atamose luwundu lwa mu msinda mwenu lwalukanilile ku sajo syetu tukumpatila jemanja. Nambo m'manyilile kuti Ucimwene wa Mlungu uyice ciŵandika ni jemanja.’

¹² Nditu ngumsalicisya kuti pa lisiku lyele litacilamula cilambo capasi, jwalakwejo tacatendela canasa cejinji ŵandu ŵakutama mu msinda wa Sodomu kulekangana ni ŵa mu msinda welewo.”

Likungu kwa ŵandu ŵakutama m'misinda ja ŵandu ŵangakulupilila

¹³ “Mkwete likungu jemanja ŵandu ŵimkutama mu msinda wa Kolasini! Mkwete likungu jemanja ŵandu ŵimkutama mu msinda wa Betisaida! Pakuti masengo gamacili gatendekwe kwa jemanja gakaŵe kuti gatendekwe ku cilambo ca Taya ni Sidoni, ni kuti ŵandu ŵa m'misinda jeleji akaliji ali alipakesye liwu ni kuwala yakuwala yakupanganyidwa ni yisaka kulosya kupitikuka mitima kwawo.

¹⁴ Pa lisiku lyakulamula lya Ambuje, ŵalakwewo tacilosya canasa kwa ŵandu ŵakutama mu misinda ja Taya ni Sidoni kwapunda jemanjajo.

¹⁵ Jemanja ŵandu ŵimkutama ku msinda wa Kapelenaumu, ana mkuganisya kuti tacimcimbicisya ni kuja kwinani? Iyayi, timcijawula ku malo ga ŵandu ŵawe.”

¹⁶ Yesu ŵasalile ŵakulijiganya* ŵakwe ŵala kuti, “Jwalijose jwakumpikanila jemanja akumbikanila une, jwakumkana jemanja akungana soni une. Nipo jwakungana une akwakana soni Atati ŵiŵandumile une.”

Kuwuja kwa acalume 72

¹⁷ Acalume 72 ŵala ŵawusile mwa lukondwa ni ŵatite kuti, “Ambuje, atamose misimu jakusakala* jaliji mkutupikanila pitwajilamulaga mu lina lya ŵalakwe.”

¹⁸ Yesu ŵajanjile jemanjajo kuti, “Nalolelele muŵagwilile Satana* mpela mujikusagwila njasi kutyocela kwinani.

¹⁹ Nimpele jemanja macili gakupakombola kuliŵata majoka ni yiŵalaŵala ni kugapunda macili ga Satana m'magongo jwenu. Pangali cindu cilicose citicimwulasya jemanja.

²⁰ Msangalaleje kuti mena genu galembedwe mu buku jakwinani, nambo ngaŵaga ligongo lyakuti misimu jakusakala jaliji mkupikanila jemanja.”

Lukondwa lwa Yesu

²¹ Pandaŵi jelejo Msimu Ŵaswela wamgumbesye Yesu ni lukondwa mu mtima mwakwe ni ŵatite kuti, “Atati, Ambuje ŵakwinani ni cilambo capasi. Ngumtogolela kuti mwasalile ŵandu ŵangalijiganyaŵa yindu yiyaliji yakusisika kwa ŵandu ŵalunda ni ŵamlijiganye. Elo, Atati pakuti amu ni muŵasacile ŵalakwe kuti yitendekwele.”

²² Kaneko Yesu ŵapitilisye kuŵeceta kwa ŵandu ŵala kuti, “Atati ŵangu ambele yindu yosope yene, ŵelewo ni ŵakum'manyilila Mwanace. Ŵane soni ŵakwamanyilila Atati ali Mwanace. Nambo mwanace akusaka kwasalila ŵandu ŵane kwambaga ya Atati, kuti nombe nawo jemanjajo ŵamanyilile ŵelewo.”

²³ Kaneko Yesu ŵagalawucile ŵakulijiganya ŵakwe ŵala ni ŵasalile kuti, “Ŵana upile ŵandu ŵakuyiwona yindu yimkuyiwona jemanjayi.

²⁴ Ngumsalila kuti ŵakulocesya ni ayimwene ŵajinji ŵasakaga kuti ayiwone cenene yimkuyiwona jemanjayi, nambo nganayiwona. Jemanjajo ŵasacile kuti apikane cenene yimkupikana jemanjayi, nambo nganayipikana.”

Ndamo ja Msamaliya jwa canasa

²⁵ Mwalimu jwine jwa Malamusi jwajimi ni cakulinga cakuti ampatile Yesu ligongo pa maloŵe gitaŵecete jwalakwejo. Ŵamwusisye kuti, “Cemwalimu, ana ngwenela kutenda cici kuti ngole umi wangamala?”

²⁶ Yesu ŵamjanjile jwalakwejo kuti, “Ana m'Malemba ga Mlungu mulembedwe cici? Ana mkusagagopolela uli Malembago?”

²⁷ Mundu jula jwajanjile kuti, “Mwanonyeleje Ambuje Mlungu jwenu ni mtima wenu wosope, ni umi wenu wosope, ni macili genu gosope ni lunda lwenu losope, mumnonyeleje soni mjenu mpela yimkuti pakulinonyela mwasyene.”

²⁸ Yesu ŵatite, “Mjanjile cenene, mtendeje yeleyi nipo timkole umi wangamala.”

²⁹ Nambo mundu jula pakusaka kulilosya kuti ali jwakulungama, ŵamwusisye Yesu kuti, “Ana mjangujo nduni?”

³⁰ Pakwanga Yesu ŵatite, “Jwapali mundu jwine juŵatyocelaga ku Yelusalemu nipo ŵajawulaga ku Yeliko. Petala ŵasimene ni ŵaciswamba ŵamputile ni kumwula yakuwala ni kumleka ali akomwece.

³¹ Yili yitendekwe yeleyi, jwakutaga mbopesi jwine ŵapitile litala lilyolyo. Piŵam'weni mundu jula ŵamŵambele.

³² Yalumo soni mundu jwine jwa lukosyo lwa Lefi jwayice pa malo piŵagonile mundu pala, nambo nombe najo jwalakwejo ŵamŵambele.

³³ Nambo mundu jwine jwa ku Samaliya jwaliji pa ulendo nipo ŵayice pa malo galagala. Piŵam'weni mundu juŵaputidwe ni ŵaciswamba jula ŵamtendele canasa.

³⁴ Jwalakwejo jwapite pa malo pijwagonile mundu jula ni ŵamtasile mawuta ga olifi* ni finyo pa maŵanga gakwe gala ni ŵamtaŵile. Kaneko ŵamkwesisye pa bulu jwakwe ni kwawula najo mundujo ku nyumba jagona acalendo kuŵamsamalile cenene.

³⁵ Kundaŵi kwakwe Msamaliyajo* ŵakopwesye mbiya siŵili, ni ŵampele msyene nyumba ja acalendo jula ni ŵamsalile kuti, ‘Mumlolele cenene munduju, naga timjonanje mbiya sine, tinimwucisye pakuwuja.’ ”

³⁶ Yesu ŵamalisisye kuŵeceta pakumwusya mundujo kuti, “Mu nganisyo syenu, ana mkuganisya kuti mwa ŵandu ŵatatuŵa, ŵani ŵatesile mpela mnasi jwa mundu juŵaputidwe ni ŵaciswamba jula?”

³⁷ Jwalakwejo jwajanjile kuti, “Juŵamtendele canasa jula.” Yesu ŵamsalile kuti, “Nomwe ŵakwe mjawule mkatendeje iyoyo.”

Yesu ŵajile kukunguluka kwa Malita ni Maliya

³⁸ Yesu ni ŵakulijiganya ŵakwe piŵaliji pa ulendo wawo, jwalakwejo jwajinjile m'musi wine. M'musimo mwaliji mwana jwamkongwe jwine lina lyakwe Malita juŵampocele Yesu ndaŵi jiŵayice ku nyumba jakwe.

³⁹ Jwalakweju jwakwete mpwakwe lina lyakwe Maliya juŵatemi mwakuŵandikana ni Yesu ni kupikanilaga maloŵe gakwe.

⁴⁰ Pandaŵi jeleji, Malita gatupile masengo nipo ŵajile piŵaliji Yesu pala ni kumsalila kuti, “Ambuje, ana akuyiwona kuti cili cindu cambone kuti mpwangaju andecele jikape masengo? Amsalile kuti ayice kukungamusya.”

⁴¹ Ambuje ŵatite, “M'mwe Malita, mkujijilika ni kulaga ni yindu yejinji,

⁴² nambo cakusosekwa ni cimope basi. Maliya asagwile cindu cakupunda mnope, soni celeci pangali jwine jutacimsumula.”