Luka 1 - Chiyawo Bible

¹ Ŵakucimbicikwa Teofilo: Ŵandu ŵa jinji ŵalinjile kulondesya ngani ja yindu yiyatendecekwe pasikati petu.

² Jemanjajo ŵalembile yitwasalilidwe ni ŵandu ŵiŵaliji kweleko soni ŵiŵayiweni ni meso gawo yiyatendecekwe kutyocela pandanda, jemanjajo ŵaŵele ali mkulalicila utengawo.

³ Myoyo pinamasile kujilola mwakusamalila cenene ngani josopeji pakuyicisya yiyatendekwe kutyocela pandanda, une nganisisye kuti kuli kwambone kwalembela yeleyo mwakolosya cenenepe ŵalakwe ŵakucimbicikwa Teofilo.

⁴ Ndesile yeleyi kuti namanyisye ŵalakwe ŵakucimbicikwa yakuwona yisyesyene kwambaga yindu yiŵapikene yila.

Lilayika likusala ya kupagwa kwa Yohane M'batisi

⁵ Pandaŵi jiŵaliji Helodi* mwenye jwa cilambo ca Yudeya ŵapali jwakutaga mbopesi lina lyakwe Sakaliya jwa mwikuga lya Abiya ŵakutaga mbopesi. Ŵamkwakwe Sakaliya ŵaliji Elisabeti ŵa mwiŵasa lya Aloni* jwakutaga mbopesi.

⁶ Sakaliya ni Elisabeti ŵaliji ŵakulungama pameso pa Mlungu, mwakuti ŵagakuyaga cenene Malamusi ni yosope yene yiŵalamwile Ambuje.

⁷ Jemanjaji nganakola ŵanace ligongo Elisabeti ŵaliji ŵangaŵeleka soni jemanjaji ŵaliji ŵacekulupe.

⁸ Lisiku line likuga lya Sakaliya lyaliji mkutumicila ku Nyumba ja AMBUJE, pandaŵiji jwalakwejo jwaliji mkutumicila Mlungu mpela jwakutaga mbopesi.

⁹ Malinga ni msyungu wa ŵakutaga mbopesi, jwalakwejo jwasagulidwe pakulondola cisango kuti akajinjile m'Nyumba ja AMBUJE kukututumisya ubani.*

¹⁰ Pandaŵi jiŵatutumisyaga ubani Sakaliya, likuga lyosope lya ŵandu lyaliji mkupopela kusa.

¹¹ Pandaŵi jelejo lilayika lyakutyocela kwa Ambuje lyawonecele kwa jwalakwejo lili lijimi kumbali ja kumlyo kwa malo gakututumicisya ubani.

¹² Sakaliya ŵatojime mnope pakuliwona lilayikalyo ni ŵakamwile ni woga.

¹³ Nambo lilayikalyo lyamsalile jwalakwejo kuti, “Sakaliya, mkajogopa! Mlungu alipikene lipopelo lyenu, mwakuti ŵamkwenu Elisabeti tacimwelecela m'mwejo mwanace jwamlume ni timumpe lina lyakwe Yohane.

¹⁴ Mwanace jweleju pitacipagwapo tiyicimtendesya jemanja kuŵa ŵakondwa soni ŵandu ŵajinji taciŵa ŵakusangalala.

¹⁵ Jwalakwejo taciŵa jwamkulungwa pameso pa Ambuje. Jwalakwejo ngasaŵa jwakumwa yakumwa mpela finyo kapena cine cilicose cakukolelwesya. Jwalakwejo taciŵa jwakulongoleledwa ni Msimu Ŵaswela kutyocela pa ndaŵi jakupagwa kwakwe.

¹⁶ Yohane tacigalawusya mitima ja Aisalaeli ni kuwujila soni kwa Mlungu jwawo.

¹⁷ Jwalakwejo tacilongolela pasogolo pa Ambuje mwakulimba mtima ni mwamacili mpela macili giŵakwete jwakulocesya* Eliya.* Tacasyoŵekanya acinangolo ni ŵanace ŵawo, tacagalawusya ŵandu ŵangapikana kuti akole lunda mpela lwa ŵandu ŵakulungamika, jwalakwejo taciŵicila cile ŵandu ŵakwenela kwatumicila Ambuje.”

¹⁸ Sakaliya ŵaŵecete ni lilayikalyo acitiji, “Une ni ŵamkwangu tuli ŵacekulupe sambano. Ana timanyilile uli kuti yeleyi yili yakuwona nambo soni kuti tiyitendekwe?”

¹⁹ Lilayikalyo lyajanjile kuti, “Une ndili Gabuliele,* jwakutumicila jwa Mlungu. Jwalakwejo andumile une kuti mbecete ni m'mwejo ni kumsalila ngani jamboneji.

²⁰ Nambo sambano mpikane, pa ligongo lyakuti nganimkulupilila maloŵe gimbecete, myoyo timciŵa ŵangapakombola kuŵeceta mpaka pa lisiku litiyicitendekwa yinimsalileyi. Nambo yosope tiyicitendekwa pa ndaŵi jakwe.”

²¹ Pandaŵi jelejo ŵandu ŵaŵaliji kumlindilila Sakaliya ŵaliji mkusimonga kuti ana ligongo cici jwalakwejo ŵacelewaga kukopoka m'Nyumba ja AMBUJEMO.

²² Jwalakwejo piŵakopwece m'Nyumbamo nganaŵeceta ni ŵandu, myoyo jemanjajo ŵamanyilile kuti Sakaliya aciweni cindu cine cakwe kupitila m'mesomkulola m'Nyumba ja AMBUJE mula. Jwalakwejo ŵagambile kwajimicila ŵandu ŵala makono, nambo ngaŵeceta liloŵe lililyose.

²³ Pijamasile ndaŵi jakwe jakutumicila m'Nyumba ja AMBUJE, Sakaliya ŵawujile kumangwakwe.

²⁴ Yili yitendekwe yeleyo, kaneko Elisabeti ŵamkwakwe Sakaliya ŵakwete cilu, nipo ŵagambaga kutama m'nyumba kwa miesi msano.

²⁵ Elisabeti ŵaŵecete kuti, “Sambano Ambuje andendele canasa, mwakuti andyocesye une soni syangu syosope pasikati pa ŵandu.”

Lilayika Gabuliele akusalicisya ya kupagwa kwa Yesu

²⁶ Elisabeti piŵaliji ni citumbo ca miesi msano ni umo, Mlungu ŵalitumile lilayika Gabuliele ku msinda wakolanjidwa Nasaleti mu upande wa Galileya.

²⁷ Lilayikalyo ŵalitumile kwa mwali jwine lina lyakwe Maliya juŵatomelwe ni jwamlume jwine lina lyakwe Yosefe jwa mwiŵasa lya Mwenye Daudi.*

²⁸ Lilayika lila lyayice kuŵaliji mwalijo ni lyatite kuti, “Moni Maliya, m'mwejo mli ŵakongwe ŵajaliwe! Ambuje amsagwile kuti amtendele yindu yekulungwa.”

²⁹ Maliya ŵalasile mnope mu mtima ni maloŵego, mwakuti ŵaliwusyaga asyene kuti ana cikomasyo camtuli celeci?

³⁰ Lilayika lila lyamsalile jwalakwejo kuti, “Maliya, mkasimjogopa, Mlungu amsalalile mtima.

³¹ Timcikola cilu, ni timciŵeleka mwanace jwamlume. Timumpe lina lyakwe Yesu.*

³² Jwalakwejo taciŵa jwamkulungwa ni tacikolanjidwa kuti Mwanace jwa Mlungu jwakwinani Mnope. Ambuje Mlungu tacimtenda jwalakwejo kuŵa mwenye mpela muŵaŵelele nangolo jwakwe Daudi

³³ nipo taciŵa mwenye jwa Aisalaeli mpaka kalakala; ucimwene wakwe ngasiwumala kose.”

³⁴ Maliya ŵaliwusisye lilayikalyo kuti, “Ana yeleyi tiyiŵe uli pakutipo une jwangali ŵalume?”

³⁵ Lilayika lila lyajanjile kuti, “Msimu Ŵaswela taciyika pa m'mwejo nipo macili gakwe tigaciŵa pa m'mwejo. Ali ni ligongo lyakwe kuti mwanace jutacipagwajo taciŵa jwamswela; tacikolanjidwa kuti Mwanace jwa Mlungu.

³⁶ Mkumbucile ya alongo ajenu Elisabeti, ŵiŵatiji ŵangaŵeleka ŵala, nombe nawo akwete cilu ca miesi msano ni umo mwakuti apano akwembeceya kuŵeleka mwanace jwamlume mu ucekulu wakwe.

³⁷ Pakuti pangali cindu ni cimo cene ca mpaka cimleme Mlungu.”

³⁸ Papopo Maliya jwatite, “Une jwakutumicila jwawo Ambuje, yitendekwe kwa une mpela mwaŵecetelemo.” Lilayika lila lyawujile kwinani.

Maliya ŵajile kukwasonda Elisabeti

³⁹ Gali gapite masiku gapanandi, Maliya ŵalinganyisye ulendo mwacitema kwawula ku msinda uwaliji ku matumbi ku cilambo ca ku Yudeya.

⁴⁰ Piŵayice kweleko jwalakwejo jwajinjile m'nyumba ja Sakaliya asono ŵawo Elisabeti nipo ŵamkomasisye Elisabetijo.

⁴¹ Elisabeti piŵapikene komasya kwa Maliya, ndaŵi jijojo mwanace jwatandite kuwulukuta mcitumbo mwakwemo. Pandaŵiji Elisabeti ŵalongoleledwe ni Msimu Ŵaswela,

⁴² kaneko ŵatandite kuŵeceta mwakwesya maloŵe acitiji, “M'mwejo mli ŵajaliwe kwapunda acakongwe ŵane wosope, soni mwanace jwali mcitumbo mwenu ali jwamjaliwe.

⁴³ Une ndili nduni kuti ŵalakwe, mama ŵawo Ambuje ŵangu kuti ayice kukungungulusya?

⁴⁴ Pakuti pinapikene cikomasyo cenu, mwanace jwawulukwite ni lukondwa mcitumbo mwangu.

⁴⁵ M'mwejo mli ŵajaliwe ligongo mwakulupilile kuti yele yiŵamsalile Ambuje, tiyicitendekwape.”

Nyimbo ja Maliya jakutogolela

⁴⁶ Maliya ŵatite, “Une ni Mtima wangu wosope ngwalumba Ambuje,

⁴⁷ msimu wangu ukusangalala mwa Mlungu Mkulupusyo jwangu,

⁴⁸ pakuti jwalakwejo akuweni kulinandiya kwa jwakutumicila jwakwe. Kutyocelaga sambano jino mpaka msogolo ŵandu ŵa mipago josope tacingolanga une kuti ndili jwamjaliwe,

⁴⁹ pakuti Mlungu Jwamaciligosope andendele yindu yekulungwa, soni jwalakwejo ali jwamswela.

⁵⁰ Jwalakwejo ŵatendele canasa ŵandu ŵa mipago jakulekanganalekangana ŵele ŵakusamjogopa jwalakwejo.

⁵¹ Jwalakwejo ŵapanganyisye yindu yamacili ni mkono wakwe ŵapwilingenye ŵandu ŵakupoka mu nganisyo sya mu mtima mwawo.

⁵² Ŵatulwisye ayimwene ŵakupikanika pa yitengu yawo ni kwakwesya ŵandu ŵakulinondiya pa ma ukumu.

⁵³ Ŵapele ŵandu ŵasala yindu yambone, nambo ŵakusicila ŵajawisye ali ŵangali kandu.

⁵⁴ Jwalakwejo ŵakamucisye Aisalaeli ŵandu ŵakwe, pakumbucila canasa cakwe.

⁵⁵ Yeleyi ni yiŵatesile cilanga* kuti tacatendela acinangolo ŵetu ŵakala ŵala, Abulahamu* ni yisukulu yakwe mpaka kalakala.”

⁵⁶ Maliya ŵatemi ni Elisabeti kwa miesi jitatu, kaneko ŵawujile ku musi.

Kupagwa kwa Yohane M'batisi

⁵⁷ Ndaŵi jakuti Elisabeti aŵelece jakwanile nipo ŵaŵelece mwanace jwamlume.

⁵⁸ Acanasi ni acalongo acimjakwe ŵa Elisabeti piŵapikene kuti Ambuje amsalalile mtima jwalakwejo, jemanjajo ŵasangalele najo pampepe Elisabetijo.

⁵⁹ Pigakwanile masiku msano ni gatatu mwanacejo ali apali, acalongo acimjakwe ni acanasi ŵasongene kuti amwumbasye, nipo ŵasacile kumpa lina lya Sakaliya babagwe.

⁶⁰ Nambo mamagwe mwanacejo ŵakanile acitiji, “Iyayi, lina lyakwe tiliŵe Yohane.”

⁶¹ Ŵanduwo ŵamsalile Elisabeti kuti, “Pa ulongo wenu pangali mundu jwakwete lina mpela lyeleli.”

⁶² Myoyo ŵanduwo ŵaŵecete ni Sakaliya pakamulisya masengo makono nipo ŵamwusisye lina liŵasakaga kuti ampe mwanacejo.

⁶³ Sakaliya ŵaŵilasisye pakulembela, ni ŵalembile kuti, “Lina lyakwe lili Yohane.” Ŵandu wosopewo ŵasimonjile nayo.

⁶⁴ Pandaŵi jijojo Sakaliya ŵatandite kuŵeceta soni, ni ŵamlumbile Mlungu.

⁶⁵ Acalongo acimjakwe ŵala ŵakamwilwe ni woga, mwakuti nganiji japikanice ku cilambo cosope ca matumbi ga ku Yudeya.

⁶⁶ Ŵandu wosope ŵiŵapikene yeleyi ŵaliji mkuganisya m'mitima mwawo aciliwusyaga kuti, “Ana mwanaceju taciŵa jwamtuli?” Pakuti yawonece cilepe kuti Ambuje ŵaliji najo mwanacejo.

Maloŵe gakulocesya ga Sakaliya

⁶⁷ Sakaliya babagwe Yohane acilongoleledwaga ni Msimu Ŵaswela ŵa kwa Mlungu ŵatandite kuŵeceta maloŵe ga Mlungu acitiji:

⁶⁸ Ngwalumba Ambuje, Mlungu juŵamlambilaga Aisalaeli, pakuti ŵalakwewo ŵayice kukwawombola ŵandu ŵakwe.

⁶⁹ Ŵatutumicisye Mkulupusyo jwamacili jwa mu lukosyo lwa Daudi jwakutumicila jwakwe.

⁷⁰ Ayi ni yiŵaŵecete jwalakwejo kupitila mwa ŵakulocesya ŵaswela ŵakalakala

⁷¹ kuti tacitukulupusya kwa amagongo ŵetu, soni kwa wosope ŵakusatuŵenga uwe.

⁷² Ŵatesile cilanga cakuti tacasalalila mtima acinangolo ŵetu ŵakala, ni kucikumbucila cilanga cakwe.

⁷³ Mlungu ŵamsalile mu cilanga Abulahamu nangolo jwetu kuti

⁷⁴ Mlungujo tacitukulupusya uwe kwa amagongo ŵetu, kuti kaneko tumtumicileje jwalakwejo mwangatenda woga,

⁷⁵ ni kutama ni mitima jakulungama pa masiku gosope ga umi wetu.

⁷⁶ Sambano m'mwe mwanangu timcikolanjidwa ni Mlungu kuti mli jwakulocesya jwakwe, ligongo timcilongolela pasogolo pa Ambuje kukolosya cile matala gakwe.

⁷⁷ Timcamanyisya ŵandu ŵakwe ŵa Mlungu kuti, Mlungu tacakulupusya ni kwakululucila ulemwa* wawo.

⁷⁸ Umbone mtima wa Mlungu uli wekulungwa, tacitutumicisya lilanguka lya lyuŵa kundaŵi kutyocela kwinani.

⁷⁹ Lilanguka lyakwe tilicamulicila ŵandu wosope ŵakutama mu cipi soni ŵele ŵakogopa ciwa soni tilicitulongolela uwe mu litala lya mtendele.

⁸⁰ Yohane jwakusile mu usimu mwakulimbangana. Kaneko ŵajile kukutama ku cipululu mpaka pijakwanile ndaŵi jakuti alilosye kwa Aisalaeli.