Lefitiko 9 - Chiyawo Bible

Aloni ni ŵanace ŵakwe ŵacalume akupeleka mbopesi

¹ Pa masiku msano ni gatatu, namalape msyungu wakwapakasya mawuta ŵakutaga mbopesi, Mose* ŵaŵilasile Aloni,* ŵanace ŵakwe ŵacalume, ni acimlongola ŵa ku Isalaeli.

² Ŵamsalile Alonijo kuti, “Mjigale mwanace jwa ng'ombe jamkambako, kuti jiŵe mbopesi jakwaŵenda AMBUJE* kululucila ulemwa, ni ngondolo jamkambako kuti jiŵe mbopesi jakutinisya. Yinyama yosopeyo yiŵe yangalemala, ni myipelece pameso pa AMBUJE. Mwasalile Aisalaeli kuti ajigale mbusi jamkambako, kuti ajipelece mbopesi jakwaŵenda AMBUJE kululucila ulemwa.*

³ Ajigale soni mwanace jwa ng'ombe ni mwanace jwangondolo. Ŵanace wosopewo aŵe ŵa caka cimo, ŵangalemala, kuti aŵe mbopesi jakutinisya.

⁴ Ajigale soni ng'ombe ni ngondolo kuti asitaje mbopesi ja mkamulano.* Apelece mbopesi jeleji kwa AMBUJE pampepe ni mbopesi ja utandi wewanganye ni mawuta. Mkwenela kupeleka mbopesi syelesi ligongo lyakuti, lelo jino AMBUJE tamwonecele.”

⁵ Ŵanduwo ŵayice nayo yindu yosope yiŵalamwile Mose, pa mlango wa citenti cakusimanilana. Ŵandu wosope ŵa ku Isalaeli ŵasongene pa malopo kwalambila AMBUJE.

⁶ Pelepo Mose ŵasalile jemanjajo kuti, “AMBUJE akumlamula jemanja kuti myitende yindu yosopeyi, kuti lilanguka lya kunyesima kwawo AMBUJE limwonecele.”

⁷ Myoyo Mose ŵamsalile Aloni kuti, “Mjawule pa malo gakupelecela mbopesi, ni mtaje mbopesi jenu jakwaŵenda AMBUJE kululucila ulemwa ni mbopesi jenu jakutinisya, kuti mtende msyungu wakwaŵenda AMBUJE kuwukululucila ulemwa wenu ni ulemwa wa ŵandu ŵa ku Isalaeli. Mtaje mbopesi sya ŵanduwo ni kutenda msyungu wakwaŵenda AMBUJE kululucila ulemwa wawo, mpela yatite pakulamula AMBUJE.”

⁸ Myoyo Aloni ŵajile kumalo gakupelecela mbopesi, ni ŵawuleje mwanace jwa ng'ombe jwakupelecela mbopesi jakwaŵenda AMBUJE kuti amkululucile ulemwa wakwe.

⁹ Ŵanace ŵakwe ŵacalume ŵapelece miasi ja mwanace jwa ng'ombejo kwa Aloni. Jwalakwejo ŵacuyiye cala cakwe m'miasijo, ni ŵapacile pa misengo ja pa malo gakupelecela mbopesi, ni miasi jakusigalajo ŵajipungulile pasi, mwiŵanda mwa malo gakupelecela mbopesi.

¹⁰ Nambo mawuta ni mbyo pampepe ni mawuta ga kumatoga, ga mbopesi jakwaŵenda AMBUJE kululucila ulemwawo, ŵayitinisye pa malo gakupelecela mbopesi, mpela yiŵatite AMBUJE pakumlamula Mose.

¹¹ Nyama jakwe ni lipende lyakwe, ŵayitinicisye kusa kwa masakasa.

¹² Aloni ŵawuleje soni nyama jakuti apelece mbopesi jakutinisya, ni yisukulu yakwe ŵayipele miasi ja nyamajo, jemanjajo ŵajipungulile miasijo kusyungulila mbali syakwe syosope sya malo gakupelecela mbopesi.

¹³ Panyuma pakwe yisukulu ya Aloni ŵala, yapelece nyama jekatanyekatanye ja mbopesi jakutinisya, kwa atati ŵawo, pamo ni mtwe wakwe, nipo jwalakwe ŵayitinisye pa malo gakupelecela mbopesi.

¹⁴ Ŵacicapile ciwukala ni matumbo pampepe ni ngongolo sya munyuma, ŵayitinisye pa malo gakupelecela mbopesi gagogo, pamo ni nyama ja mbopesi jakutinisya jila.

¹⁵ Ali amasile yeleyi, Aloni ŵatasile mbopesi siŵapelece ŵandu. Ŵajigele mbusi ja mbopesi jakwaŵenda AMBUJE, kuti akululucile ulemwa wa ŵanduwo, ŵajiwuleje, ni ŵajitasile mbopesi mpela muŵatajile jwalakwe mbopesi jakwe jandanda, jakwaŵenda AMBUJE kuwukululucila ulemwa wakwe.

¹⁶ Ŵayice najo nyama jakuti apelece mbopesi jakutinisya, ni ŵajitasile pakuya malamusi gakwe.

¹⁷ Ŵatasile soni mbopesi ja utandi, ŵasapwile utandiwo ligasa limo ni ŵawutinisye pa malo gakupelecela mbopesi, konjecesya pa mbopesi syakutinisya syakupelecedwa kundaŵi kulikose.

¹⁸ Ŵawuleje ng'ombe kwisa soni ngondolo jamkambako, ni ŵatasile mbopesi jamkamulano m'malo mwa ŵandu. Panyuma pakwe yisukulu ya Aloni ŵayipele miasi, Alonijo ni ŵajipungulile miasi kusyungulila mbali syakwe syosope sya malo gakupelecela mbopesi.

¹⁹ Aloni ŵajigele mawuta ga ng'ombe ni ga ngondolo jamkambako, mcila wa mawuta, mawuta ga pacanya pa matumbo, mbyo ni mawuta ga kumatoga,

²⁰ ni ŵagaŵisile mawutago pacanya pa yidali, ni Aloni ŵagatinisye mawutago pa malo gakupelecela mbopesi.

²¹ Nambo cidali ni ciga ca lukongolo lwamunyuma lwa mlyo ŵayipelece kuŵa mtuka wapadela kwa AMBUJE, pakuyiyuya m'makono mwakwe, kuti yiŵe mbopesi jakupeleka pameso pa AMBUJE, mpela muŵalamulile Mose.

²² Piŵamasile Aloni kutaga mbopesi, ŵanyakwile makono gakwe pa ŵandu ŵa ku Isalaeli, ni ŵapele upile. Ŵatulwice kutyoka kumalo gakupelecela mbopesi, kuŵapelece mbopesi jakwaŵenda AMBUJE kululucila ulemwa, ni mbopesi jakutinisya, ni mbopesi ja mkamulano.

²³ Mose ni Aloni ŵajile kwinjila m'citenti cakusimanilana. Pa ŵakopwece ŵapele upile ŵandu ŵala, ni lumbili lwa AMBUJE lwawonecele ŵandu wosopewo.

²⁴ Mwacisisimucila moto wakutyocela kwa AMBUJE, watinisye mbopesi jakutinisya ni mawuta gakutyocela ku mbopesi sine, gagaliji pa malo gakupelecela mbopesi pala. Piŵawuweni motowo Aisalaeli, ŵagumisile niŵajinamile ngope syawo pasi.