Lefitiko 8 - Chiyawo Bible

Msyungu wakwaŵika pajika Aloni ni ŵanace ŵakwe ŵacalume kuti aŵe ŵakutaga mbopesi

¹ AMBUJE* ŵamsalile Mose kuti,

² “Mwajigale Aloni* ni ŵanace ŵakwe ŵacalume ku mlango ŵa citenti cakusimanilana, ni mjigale soni yakuwala, mawuta gakutendela msyungu wakupakasya, ng'ombe jamkambako jakupeleka mbopesi jakwaŵenda AMBUJE kululucila ulemwa,* ngondolo siŵili sya mkambako, ni lupeta lwa mikate jangali cakusasaŵilisya.

³ Mwusonganye mpingo ŵosope wa ŵandu pa mlango ŵa citenti cakusimanilana.”

⁴ Mose* ŵatesile mpela yiŵatite pakumlamula AMBUJE. Mpingo wosope wa ŵandu ŵasongene pa mlango wa citenti cakusimanilana.

⁵ Mose ŵawusalile mpingo ŵa ŵandu wosope ŵala kuti, “Yindu yitindende sambano yili yindu yalamwile AMBUJE kuti yitendecekwe.”

⁶ Jwalakwejo ŵaŵilasile Aloni ni ŵanace ŵakwe ŵacalume kuti ayice pasogolo, ni ŵasalile kuti akasukusule.

⁷ Panyuma pakwe ŵam'wecice Aloni mwinjilo ni mkanjo, ni ŵamtaŵile lamba mciwunu mwakwe. Ŵam'wecice cakuwala ca efodi,* ni ŵamtaŵile ni lamba jwa mtundu wa efodijo uwowo.

⁸ Ni ŵam'wecice cakuwala ca pa mtima, ni mkati mwakwe ŵaŵisile yindu yakolanjidwa Ulimu ni Tumimu.*

⁹ Ni ŵam'wecice nduŵila ku mtwe. Pasogolo pa nduŵilajo ŵaŵisile liluŵa lya cisyano ca golidi,* cimanyisyo cakulosya kuŵicidwa pajika kwa Aloni kuŵa jwakutaga mbopesi, mpela mwele AMBUJE muŵamlamulile Mose.

¹⁰ Mose ŵajigele mawuta gakupakasya, ni ŵacipakesye citenti cakusimanilana ni yindu yosope yaliji mkati mwakwe, ni ŵayiswejesye.

¹¹ Ŵamisile mawuta kasano ni kaŵili pa malo gakupelecela mbopesi, ni ŵapakesye mawuta gane pa malo gakupelecela mbopesigo pampepe ni yida yakwe yosope. Ŵapakesye soni libeseni lyakunaŵila pampepe ni cipaka cakwe, kuti yiŵe yeswela.

¹² Mawuta gane gakupakasyago, ŵagapungulile pa mtwe pa Aloni, ni ŵampakesye, kuti amswejesye.

¹³ Panyuma pakwe, Mose ŵajigele yisukulu ya Aloni, ni ŵawecice mikanjo, ni ŵataŵile malamba mciwunu mwawo, ni kwaweca yikofiya ku mitwe jawo.

¹⁴ Mose ŵayice ni ng'ombe jamkambako ja mbopesi jakwaŵenda AMBUJE kululucila ulemwa, Aloni ni ŵanace ŵakwe ŵacalume ŵasajice magasa gawo pa mtwe wa ng'ombe jamkambakojo.

¹⁵ Kaneko Mose ŵajiwuleje ng'ombejo, ni ŵajigele miasi jakwe ni kujipaka ni cala cakwe pa misengo ja malo gakupelecela mbopesi, mwakugasyungulila ni ŵagaswejesye. Ŵajipungulile miasi jakusigalajo mwiŵanda mwa malo gakupelecela mbopesi ni ŵagaswejesye. Pakutenda myoyo ŵatesile msyungu wakwaŵenda AMBUJE kululucila ulemwa.

¹⁶ Mose ŵajigele mawuta gosope ga pacanya pa matumbo ni mawuta ga kumatoga, mbyo siŵili ni mawuta gakwe gosope, ni ŵayitinisye yosopeyi pa moto, pa malo gakupelecela mbopesi.

¹⁷ Nambo ŵajigele nyama jakusigala ja ng'ombe jamkambako jila, kupwatikanya ni lipende lyakwe, ciwukala ni matumbo gakwe gangaminya, ni ŵayitinisye yosopeyi kusa kwa masakasa, mpela yitite AMBUJE pakumlamulila Mose.

¹⁸ Panyuma pakwe Mose ŵajigele ngondolo jamkambako kuti ajipelece mbopesi jakutinisya, Aloni ni ŵanace ŵakwe ŵacalume ŵasajice magasa gawo pa mtwe pa ngondolojo.

¹⁹ Mose ŵajiwuleje ngondolojo, ni ŵajipungulile miasi jakwe kusyungulila mbali syakwe syosope sya malo gakupelecela mbopesi.

^20-21 Ŵajikatenye ngondolojo nduli nduli, ciwukala ni matumbo, pampepe ni ngongolo sya munyuma ŵasicapile ni mesi, Mose ŵatinisye mtwe, mawuta, ni nyama josope ja ngondolo ja mtundu, pa malo gakupelecela mbopesi, kuti jiŵe mbopesi jakutinisya pa moto, ja liwungo lyambone lyakwanonyela AMBUJE, mpela muŵalamulile AMBUJEWO.

²² Mose ŵajigele soni ngondolo jamkambako jaŵili, jakutendela msyungu wakwapakasya mawuta ŵakutaga mbopesi. Aloni pampepe ni ŵanace ŵakwe ŵacalume ŵasajice magasa gawo pa mtwe wa ngondolo jamkambakojo.

²³ Kaneko Mose ŵajiwuleje ngondolo jamkambakojo, ŵajigele miasi jakwe ni ŵajipacile pa songa ja lipikanilo lya Aloni lya mkono wamlyo. Ni ŵapacile soni pacanya pa cikongo ca ligasa lyakwe lya mkono wamlyo, ni pacanya pa cikongo ca lusajo lwa mkono wamlyo.

²⁴ Mose ŵajigele yisukulu ya Aloni, ni ŵapacile miasi pa songa sya mapikanilo gawo ga ku mkono wamlyo, ni pa yikongo ya magasa gawo ga mkono wamlyo, soni pa yikongo ya sajo syawo sya mkono wamlyo. Mose ŵapungulile miasi jakusigalajo pa mbali syakwe syosope sya malo gakupelecela mbopesi.

²⁵ Ŵajigele mawuta, ni mcila wa mawuta, ni mawuta gosope gapacanya pa matumbo, mawuta ga kumatoga, mbyo siŵili ni mawuta gakwe gosope, ni ciga ca lukongolo lwa munyuma lwa mlyo.

²⁶ Ŵasapwile mkate umo wangali cakusasaŵilisya, ni mkate umo wepace mawuta, ni kamkate kamo kangali cakusasaŵilisya kakuwoneka mpela bisiketi, kutyocela mlupeta lwa mikate jangali cakusasaŵilisya, lwakuŵicidwa pajika kwa AMBUJE. Ŵayiŵisile yosopeyi pacanya pa mawuta gala ni ciga ca lukongolo lwa munyuma lwa mlyo cila.

²⁷ Mose ŵayiŵisile yosopeyi m'magasa mwa Aloni ni m'magasa mwa ŵanace ŵakwe, ni ŵayipelece kuŵa mtuka wapadela, pa kuyiyuya m'makono mwawo kuti yiŵe mbopesi jakupeleka pameso pa AMBUJE.

²⁸ Panyuma pakwe Mose ŵayityosisye m'magasa mwawo mula ni ŵayijocice pa malo gakupelecela mbopesi, pampepe ni mbopesi jakutinisya, kuti yiŵe mbopesi jakupeleka pa msyungu wakwapakasya ŵakutaga mbopesi. Jeleji jaliji mbopesi ja liwungo lyambone lyakwanonyela AMBUJE.

²⁹ Mose ŵajigele cidali ni ŵacipelece kuŵa mtuka wa padela, pakuciyuya cidalico m'makono mwakwe, kuti jiŵe mbopesi jakupeleka pameso pa AMBUJE. Cidali ca ngondolo jamkambako, jakupeleka pa msyungu wakwapakasya mawuta ŵakutaga mbopesi, caliji mbuwa jakwe Mose, mpela yiŵatite AMBUJE pakumlamulile jwalakwe.

³⁰ Mose ŵajigele mawuta gakupakasya ni miasi jijaliji pa malo gakupelecela mbopesi, ni ŵam'misile najo Aloni pampepe ni yakuwala yakwe, soni ŵanace ŵakwe ŵacalume ŵala pampepe ni yakuwala yawo. Pakutenda myoyo Mose ŵamswejesye Aloni ni yakuwala yakwe, ni ŵanace ŵakwe ŵacalume ni yakuwala yawo.

³¹ Mose ŵamsalile Aloni ni ŵanace ŵakwe ŵacalume kuti, “Mtelece nyama ja ngondolo jamkambako jaŵili jila, pa mlango wa citenti cakusimanilana, mlyeje pa mlango papopo, pampepe ni mikate jili mlupeta lwa yakupeleka ya pa msyungu wakwapakasya mawuta ŵakutaga mbopesi, mpela muŵandamulile une AMBUJE kuti, ‘Aloni pampepe ni ŵanace ŵakwe ŵacalume ni ŵatacilya yeleyo.’

³² Yakusigala ya nyamajo ni mikatejo, myitinisye.

³³ Mkasimkopoka kusa kwa citenti cakusimanilana kwa masiku msano ni gaŵili, mpaka msyungu wakumpakasya mawuta kuti mŵe ŵakutaga mbopesi uli umasile. Pakuŵa msyungu welewu uli wa masiku msano ni gaŵili.

³⁴ AMBUJE atulamwile kuti tumtende jemanja yitumtesile lelo jinoyi, kuti uŵe msyungu wakwaŵenda AMBUJE kuti amkululucile ulemwa wenu.

³⁵ Mtameje pa mlango wa citenti cakusimanilana kwa masiku msano ni gaŵili, cilo ni musi, mli mkutenda yindu yamlamwile AMBUJE. Naga ngamkutenda, timciwa. Pakuŵa gelega ni malamusi ginapocele kwa AMBUJE.”

³⁶ Myoyo Aloni ni ŵanace ŵakwe ŵacalume, ŵayitesile yindu yosope yiŵalamwile AMBUJE, kupitila mwa Mose.