Lefitiko 7 - Chiyawo Bible

Mbopesi jakulipila magambo

¹ Mbopesi jakulipila magambo jili japajika, jajiswela mnope. Lilamusi lyakwe ni ali:

² Mbopesi jakulipila magambo, ajiwulajile ca kumpoto, pa malo pele pakusawulajila mbopesi jakutinisya, ni ajipungulile miasi jakwe kusyungulila mbali syakwe syosope sya malo gakupelecela mbopesi.

³ Apelece mawuta gakwe gosope, mcila wa mawuta, ni mawuta ga pacanya pa matumbo.

⁴ Apelece soni mbyo siŵili pampepe ni mawuta gakwe ga mciwunu, ni mawuta ga kumatoga gakutyosya kumpepe ni mbyo sila.

⁵ Jwakutaga mbopesi ayitinisye yosopeyi pa malo gakupelecela mbopesi, kuti yiŵe mbopesi ja yakulya jakoca pa moto, jakupeleka kwa AMBUJE.* Jelejo ni mbopesi jakulipila magambo.

⁶ Mundu jwalijose jwamlume jwa mwiŵasa lya ŵakutaga mbopesi akukomboleka kulya nyama ja mbopesijo. Alye ali m'malo gamaswela. Jelejo ni mbopesi japajika, jajiswela mnope.

⁷ Mbopesi jakulipila magambo jikulandana ni mbopesi jakwaŵenda AMBUJE kululucila ulemwa,* mbopesi siŵilisi sikwete lilamusi limpepe. Jwakutaga mbopesi jwakutendesya msyungu wakupeleka mbopesi jakwaŵenda AMBUJE kululucila ulemwa, jwalakwejo nyamajo tijiŵe jakwe.

⁸ Jwakutaga mbopesi jwakupeleka mbopesi jakutinisya ja mundu jwine jwalijose, ajigale lipende lya nyama jakutinisyajo kuti liŵe lyakwe.

⁹ Mbopesi ja utandi jakutelecela mu ufuni, kapena jakutelecela mciŵiga kapena mciwaya, yiŵe ya jwakutaga mbopesi jwakutendesya msyungu wakupeleka yeleyo kwa AMBUJE.

¹⁰ Nambo mbopesi jilijose jangateleka ja utandi wangawanganya ni mawuta, kapena wewanganye ni mawuta, jiŵe ja ŵanace ŵosope ŵa Aloni.* Ŵanacewo agaŵane mwakulandana.

Mbopesi sya mkamulano

¹¹ Lilamusi lyakupeleka mbopesi ja mkamulano* jele mundu jwalijose akukomboleka kupeleka kwa AMBUJE ni ali:

¹² Naga akupeleka ligongo lya kusaka kutogolela, konjecesya pa nyama jajigele kukupeleka mbopesi ja mkamulano, apelece soni mikate jangali cakusasaŵilisya, jewanganye ni mawuta, ni tumikate twamti mpela tumabisikete twangali cakusasaŵilisya, twepace mawuta, soni ni makeke ga utandi wambone wewanganye cenene ni mawuta.

¹³ Konjecesya pa mbopesi jakutogolela ja mkamulanojo, ayice najo mitanda ja mikate jana cakusasaŵilisya.

¹⁴ Ajigale mtanda umo pa mtundu uliwose wa mikate, kuti jiŵe mbopesi ja mtuka wapadela, jakupeleka ali mkuyuya makono kwa AMBUJE. Mitandajo jiŵe jakwe jwakutaga mbopesi, jutamise miasi ja nyama ja mbopesi ja mkamulano, kumalo gakupelecela mbopesi.

¹⁵ Nyama ja mbopesi ja mkamulano, jakutogolelajo ajilye pa lisiku lyakupeleka mbopesijo. Akajisunga mpaka kundaŵi.

¹⁶ Nambo naga mbopesijo jikuŵa kuti ajipelece ligongo lyakusaka kukwanilisya cilanga* ciŵaŵisile kapena akupeleka mwagamba kusaka, ajilye nyamajo pa lisiku lyakupeleka mbopesijo, naga jine jikusigala alye kundaŵi kwakwe.

¹⁷ Nambo nyama jakusigala mpaka gali gapite masiku gatatu, ajitinisye pa moto.

¹⁸ Naga mundu akulya nyama ja mbopesi ja mkamulano gali gapite masiku gatatu, mundu jwapelece mbopesijo Mlungu ngasampocela, soni mbopesijo ngasijimpindulila kandu. Nyamajo tijiciŵa jangaŵajilwa, soni mundu jutacilyajo taciyiwona yipwetesi.

¹⁹ “Naga nyamajo jikwayana ni cindu cilicose ca usakwa, mundu akalya, nambo ajitinisye pa moto. Wosope ŵakuyisye msyungu wa mapopelo akukomboleka kulya nyama ja mbopesijo.

²⁰ Nambo naga mundu akulya nyama ja mbopesi ja mkamulano, jakupeleka kwa AMBUJE, ali jwamsakale, amtyosye mundujo pasikati pa Aisalaeli acimjakwe.

²¹ Naga mundu jwine akulya nyama ja mbopesi ja mkamulano, jakupeleka kwa AMBUJE, ali akwayiye cindu cakunyalaya, cangakwayana ni malamusi ga mapopelo, kanga cakunyalayaco cili cakutyocela mwa mundu kapena mwa nyama, kapena cindu cine cilicose cakunyalaya, mundujo amtyosye pasikati pa Aisalaeli acimjakwe.”

²² AMBUJE ŵamsalile Mose* kuti

²³ ŵasalile ŵandu ŵa ku Isalaeli kuti akalya mawuta ga ng'ombe, kapena ga ngondolo kapena ga mbusi.

²⁴ Mawuta ga nyama jakuwa jika, ni mawuta ga nyama jakukamulwa ni yilombo, akukomboleka kukamulisya masengo gane gali gose, nambo jemanjajo akalya.

²⁵ Ligongo lyakuti, mundu jwalijose jwakulya mawuta ga nyama jakupelecedwa mbopesi kwa AMBUJE, jakuti jiŵe mbopesi jakutajidwa pa moto, akuŵajilwa kumtyosya pasikati pa Aisalaeli acimjakwe.

²⁶ Soni kulikose kutakatame Aisalaeli akalya miasi jilijose, ja yijuni kapena nyama.

²⁷ Jwalijose jwakulya miasi, akuŵajilwa kumtyosya pasikati pa Aisalaeli acimjakwe.

²⁸ AMBUJE ŵamsalile Mose kuti,

²⁹ Mwasalile Aisalaeli kuti, mundu jwalijose jwakupeleka mbopesi jakwe ja mkamulano kwa AMBUJE, asapule mbali jine ja nyamajo ni kwika najo kwa AMBUJE.

³⁰ Ajigale m'magasa mwakwe yiŵalo ya nyama yakuŵajilwa kuyijoca pa moto pa kuyipeleka kwa AMBUJE, ajigale cidali pampepe ni mawuta. Cidalico acipelece kuŵa mtuka wa padela, ali mkuyuya makono gakwe, kuti ciŵe mbopesi jakupeleka pameso pa AMBUJE.

³¹ Jwakutaga mbopesi agajoce mawuta pa malo gakupelecela mbopesi, nambo cidalico ciŵe ca Aloni ni ŵanace ŵakwe ŵacalume.

³² Ciga ca lukongolo lwamunyuma lwa mlyo, mcipelece kwa jwakutaga mbopesi, kuti ciŵe cakupeleka cakutyocela pa mbopesi jenu jamkamulano.

³³ Pacilikati pa ŵanace ŵacalume ŵa Aloni, jwele jutataje miasi ni mawuta ga mbopesi ja mkamulanojo, ni jutapocele ciga ca lukongolo lwa munyuma lwa mlyo, kuti jiŵe mbuwa jakwe.

³⁴ Myoyo cidali cakucipeleka ali mkuyuya makono, pampepe ni ciga cakucipelekaco, AMBUJE ayityosisye yosopeyo m'myala mwa Aisalaeli. Ayityosisye pa mbopesi syawo sya mkamulano. Ni ayipelece kwa jwakutaga mbopesi Aloni ni kwa ŵanace ŵakwe ŵacalume, kuti yiŵeje mbuwa jawo kwa yaka yosope.

³⁵ Jelejo ni mbuwa jawo Aloni ni ŵanace ŵakwe ŵacalume, jakusapula pa mbopesi jakupeleka kwa AMBUJE jakuŵajilwa koca pa moto, yiyaŵicidwe pajika kuti yiŵe mbuwa jawo, pa lisiku liŵapakesye mawuta kuti aŵe ŵakutaga mbopesi ŵakutumicila AMBUJE.

³⁶ AMBUJE ni ŵalamulile Aisalaeli kuti apeleceje mbuwa jeleji ja nyama kwa ŵakutaga mbopesi, pa lisiku lyele liŵapakasyaga mawuta. Jelejo ni mbuwa jawo kwa yaka yosope.

³⁷ Gelega ni malamusi ga mbopesi syakutinisya, sya utandi, syakwaŵenda AMBUJE kululucila ulemwa, sya magambo, syakupakasya mawuta, soni ni mbopesi sya mkamulano.

³⁸ Malamusi gelega ni giŵapelece AMBUJE kwa Mose Petumbi lya Sinayi lila, pa lisiku lyele AMBUJE liŵalamwile Aisalaeli kuti ayice ni mbopesi syawo kwa AMBUJEWO, ku cipululu ca Sinayi kula.