Lefitiko 5 - Chiyawo Bible

Mbopesi syakululucila ulemwa

¹ “Mundu naga akuŵilanjidwa ku nganya ja magambo, nakumlumbilisya kuti apelece umboni wa yindu yiŵayiweni kapena yindu yakuyimanyilila, jwalakwejo ni kukana kupeleka umboniwo, mundu jwele jwalemwisyejo akwenela kupocela cilango.

² Naga mundu jwine mwangamanyilila akukwaya cindu cilicose cakunyalaya, mpela nyama jakuwa jika ja mwitinji kapena jakulanga, kapena cakwaŵa cakuwa jika, mundu jwelejo ali jwamsakale, soni atesile ulemwa.*

³ Yalumope naga mundu mwangamanyilila akukwaya yindu yakusakala yakutyocela mwa mundu jwine, panyuma pakwe ali amanyilile, jwelejo ali jwamsakale soni atesile ulemwa.

⁴ Naga mundu akulemwa pakulumbila mwangaganicisya cenene, kuti tacitenda cindu cakusakala kapena cambone, kulumbila* kwa mtundu uliwose wakusatenda ŵandu, ni pakulumbilapo ngakumanyilila yisawusyo yakwe yakuyicisya, naga mundujo panyuma pakwe akumanyilila kuti alemwisye, soni mundujo ali jwamsakale.

⁵ Naga mundu akulemwa pakutenda cindu cilicose ca yitukolasileyi, akwenela kupesya ulemwa wakwewo.

⁶ Kaneko ayice kupeleka mbopesi kwa AMBUJE,* ligongo lya ulemwa wakwewo. Mbopesi jakwe jiŵe ja ngondolo jamkolo kapena mbusi jamkolo. Jwakutaga mbopesi atende msyungu wakwaŵenda AMBUJE, kumkululucila mundu jwakulemwajo cileŵi cakwe.

⁷ “Nambo naga mundujo nganakola mbusi kapena ngondolo, ajigale ngunda siŵili kapena njuŵa siŵili, kuti siŵe mbopesi jakupeleka kwa AMBUJE kwaŵenda kululucila kwa ulemwa wakwe ni jinejo jiŵe mbopesi jakutinisya.

⁸ Ayice nasyo kwa ŵakutaga mbopesi, ni jwakutaga mbopesijo atande kupeleka cijuni cakwaŵenda AMBUJE kululucila ulemwa. Apotokole lukosi nambo akabudula mtwe wakwe,

⁹ amise miasi ja cijunico mumbali mwa malo gakupelecela mbopesi. Miasi jine jakusigala ajijitile pasi, kuti jijendelele mungulugulu malo gakupelecela mbopesi. Jeleji ni mbopesi jakwaŵenda AMBUJE kululucila ulemwa.

¹⁰ Jwakutaga mbopesijo apelece cijuni cineco kuti jiŵe mbopesi jakutinisya, pakuyicisya msyungu wakwe. Jwakutaga mbopesi ali atesile msyungu wakwaŵenda AMBUJE kumkululucila jwakulemwa cileŵi cakwe, jwalakwejo tacikululucidwa.

¹¹ “Naga mundu nganakola njuŵa siŵili kapena ngunda siŵili, ayice ni utandi wakwanila kilogalamu jimo, kuti uŵe mbopesi jakwaŵenda AMBUJE kuwukululucila ulemwawo. Akataga mawuta kapena ubani,* ligongo jeleji jili mbopesi jakwaŵenda AMBUJE kuwukululucila ulemwa.

¹² Ayice nawo utandiwo kwa jwakutaga mbopesi, ni jwakutaga mbopesijo awusapule ligasa, kuti uŵe cikumbukumbu, ni awujoce utandiwo pa malo gakupelecela mbopesi pampepe ni mbopesi syakupeleka kwa AMBUJE. Jeleji ni mbopesi jakwaŵenda AMBUJE kululucila ulemwa.

¹³ Mwelemu ni mutatendeleje jwakutaga mbopesi msyungu wakwaŵenda AMBUJE, kumkululucila mundu jwalemwisye, nipo jwalakwejo tacikululucidwa. Utandi wakusigala uŵe wa jwakutaga mbopesijo, mpela mwele mwakusatendela ni mbopesi sine sya utandi.”

Mbopesi jakulipa magambo

¹⁴ AMBUJE ŵamsalile Mose* kuti,

¹⁵ Naga mundu akulemwa, nambo ngaŵa mwa mele, pakutenda yindu mwangakulupicika, pakulepela kupeleka kandu kwa AMBUJE, mundujo apelece mbopesi jakulipila kwa AMBUJE, ligongo lya kulemwa kwakweko. Mbopesi jakwe jiŵe ngondolo jamkambako jangalemala, ni ngondolojo jiŵe jakwanila pa mtengo wa mbiya sya silifa,* pakuya mitengo mwakuŵalanjila ku Nyumba ja AMBUJE. Jeleji ni mbopesi jakwaŵenda AMBUJE kululucila ulemwa.

¹⁶ Panyuma pakwe mundujo apelece kwa AMBUJE yindu yiŵalepele kupelekayo, ni ajonjecesye mbali jimo ja mbuwa msano pa yinduyo, ni ayipelece kwa ŵakutaga mbopesi. Jwakutaga mbopesijo tatende msyungu wakwaŵenda AMBUJE kuti amkululucile mundujo, pakupeleka mbopesi ja ngondolo jamkambako jila, ni AMBUJE tacimkululucila ulemwa wakwe mundujo.

¹⁷ “Naga mundu akulemwa pakutenda mwangamanyilila, yindu yele AMBUJE yakulekasya, jwelejo alemwisye soni ali jwakwenela kupocela cilango.

¹⁸ Ayice kwa jwakutaga mbopesi ni ngondolo jamkambako jangalemala, soni jiŵe jakwanila pa mtengo ŵa mbiya sya silifa, pakukuya mtengo wakuŵalanjila ku Nyumba ja AMBUJE. Jwakutaga mbopesijo atende msyungu wakwaŵenda AMBUJE kuti amkululucile mundujo ulemwa uŵawutesile mwangamanyililawo, ni AMBUJE tacimkululucila mundujo.

¹⁹ Jeleji ni mbopesi jakwaŵenda AMBUJE cikululuko, ligongo mundujo ali jwakulemwa pameso pa AMBUJE.”