Lefitiko 4 - Chiyawo Bible

Mbopesi syakuŵenda kululucila ulemwa wangatenda mwa mele

¹ AMBUJE* ŵamlamwile Mose*

² kuti ŵasalile Aisalaeli kuti, mundu jwalijose jwalemwisye pakutenda kandu kalikose kalekasisye AMBUJE kuti akatenda, ngaŵa mwa mele, atendeje yindu ayi.

³ Jwakulemwajo naga akuŵa Jwamkulungwa jwa Ŵakutaga Mbopesi,* kulemwa kwa jwalakweju ni kuti awuŵisile mpingo wosope wa ŵandu pa magambo, myoyo akwenela kupeleka kwa AMBUJE mwanace jwa ng'ombe jamkambako, jwangalemala, ligongo lya ulemwa* wakwewo. Jelejo ni mbopesi jakuŵenda kwa AMBUJE kuti akululucile ulemwa.

⁴ Jwakutaga mbopesijo ayice ni ng'ombejo pa mlango wa citenti cakusimanilana, ni asajice ligasa lyakwe pa mtwe pa ng'ombejo, ni ajiwulaje pameso pa AMBUJE.

⁵ Jwamkulungwa jwa Ŵakutaga Mbopesijo ajigale miasi ja ng'ombejo ni kwika najo ku citenti cakusimanilana.

⁶ Jwalakwejo aloŵece cala cakwe m'miasi, ni kujimisila miasijo kasano ni kaŵili, pasogolo pa likatani lyakuciga malo gamaswela, pameso pa AMBUJE.

⁷ Panyuma pakwe jwakutaga mbopesijo apace miasi pa misengo ja malo gakupelecela mbopesi, jakututumisya ubani wakununjila liwungo lyambone pameso pa AMBUJE, gali mkati mwa citenti cakusimanilana. Miasi jakusigala ja ng'ombejo ajipungulile pasi pa malo gakupelecela mbopesi syakutinisya, gagali pa mlango wa citenti ca kusimanilana.

⁸ Mawuta gosope ga ng'ombe jamkambako jakutajidwa mbopesi ligongo lya ulemwa, agatyosye, pampepe ni mawuta gagali pacanya pa matumbo, ni mawuta gane gosope gagali m'matumbomo.

⁹ Atyosye mbyo siŵili pamo ni mawuta gakwe gagali ca mciwunu, soni ni mawuta ga kumatoga gakutyocesya kumpepe ni mbyo siŵili sila,

¹⁰ mpela mwatyocesyeje ku ng'ombe jakupeleka pa mbopesi ja mkamulano.* Jwakutaga mbopesijo ayijoce yosopeyo pa malo gakupelecela mbopesi syakutinisya.

¹¹ Nambo lipende lya ng'ombe jamkambakojo, pampepe ni mnowu wakwe, mtwe wakwe, ngongolo syakwe, ciwukala ni matumbo gangaminya,

¹² gamba kuti ng'ombe josopejo, akopoce najo kusa kwa masakasa, mpaka kumalo geswejesedwe kwakusajasila liwu, ajijoce nyamajo pelepo pa moto wa sasu.

¹³ Naga likuga lyosope lya Aisalaeli lilemwisye mwangatenda mele, nambo ligongo lyakungamanyilila, pakutenda yindu yele AMBUJE akuyilekasya kuyitenda, likuga lyosopelyo lyana magambo.

¹⁴ Naga ali awumanyilile ulemwa wawowo, likuga lyosopelyo lipelece mwanace jwa ng'ombe jamkambako, kuti jiŵe mbopesi jakuŵenda kwa AMBUJE kululucila ulemwa, ni ayice najo pa mlango wa citenti cakusimanilana.

¹⁵ Acakulungwakulungwa ŵa likugalyo, asajice magasa gawo pa mtwe pa ng'ombe jamkambakojo, ni ajiwulaje pameso pa AMBUJE.

¹⁶ Jwamkulungwa jwa Ŵakutaga Mbopesi ajigale miasi ja ng'ombe jamkambako, ni kwika najo ku citenti cakusimanilana.

¹⁷ Jwalakwejo aloŵece cala cakwe miasi, ni kujimisila kasano ni kaŵili pasogolo pa nguwo jakuciga malo gamaswela, pameso pawo AMBUJE.

¹⁸ Panyuma pakwe miasijo ajipace pa misengo ja malo gakupelecela mbopesi, jakutinisya ubani* wakununjila liwungo lyambone, gagali mkati mwa citenti ca kusimanilana. Miasi jine jakusigala ajipungulile pasi pa malo gakupelecela mbopesi syakutinisya, gagali pa mlango wa citenti cakusimanilana.

¹⁹ Kaneko atyosye mawuta gosope ga ng'ombejo ni agajoce pa malo gakupelecela mbopesi.

²⁰ Mwelemu ni mutajitendele ng'ombe jamkambakojo. Mpela muŵajitendele ng'ombe jamkambako jakujipeleka pa mbopesi, jakuŵenda kwa AMBUJE kululucila ulemwa. Jwakutaga mbopesi tacitenda msyungu welewu wakuŵenda kululucila ulemwa, ni AMBUJE tacilikululucila likuga lyosope lya Aisalaeli.

²¹ Ng'ombejo tajikoposye kusa kwa masakasa, ni tajijoce mpela muŵajitendele jandanda jila. Jeleji ni mbopesi jakuŵenda kwa AMBUJE kululucila kwa ulemwa, jakupeleka likuga lyosope lya ŵandu.

²² Naga mwenye akulemwa mwangamanyilila, kwalemwecesya AMBUJE Mlungu jwakwe, pakutenda cindu calekasisye AMBUJE, pelepo akwete magambo.

²³ Ali amanyilile mwenyejo kuti alemwisye, ayice ni mbusi jamkambako jangalemala kuti ajipelece mbopesi.

²⁴ Mwenyejo asajice ligasa lyakwe pa mtwe ŵa mbusijo, ni kujiwulajila pa malo pele pakusawulajila mbopesi syakutinisya pameso pa AMBUJE. Jelejo ni mbopesi jakuŵenda kwa AMBUJE kululucila ulemwa.

²⁵ Jwakutaga mbopesi akoŵe miasi ja mbusijo ni cala cakwe, ajipace pa misengo ja malo gakupelecela mbopesi syakutinisya, ni kujitaga miasi jakusigalajo pasi pa malo gakupelecela mbopesigo.

²⁶ Kaneko agajoce mawuta gakwe gosope pa malo gakupelecela mbopesi, mpela mwakusatendela ni mawuta ga mbopesi ja mkamulano. Jwakutaga mbopesijo ali atesile msyungu wakwaŵenda AMBUJE kuti amkululucile mwenye jula, AMBUJEWO tacimkululucila mwenyejo.

²⁷ Naga mundu wamba akulemwa mwangamanyilila, pakutenda kandu kele AMBUJE akukalekasya, akwete magambo.

²⁸ Naga mundujo akumanyilile kulemwa kwakweko, apelece mbusi jamkolo jangalemala, ligongo lya ulemwa wakwewo

²⁹ Asajice ligasa lyakwe pa mtwe pa mbusi jambopesi jakwaŵenda AMBUJE kululucila ulemwa, ni ajiwulajile pa malo pakusapelecela mbopesi syakutinisya.

³⁰ Ali atesile myoyo, jwakutaga mbopesi aloŵece cala cakwe m'miasi ni kujipaka pa misengo ja malo gakupelecela mbopesi syakutinisya, miasi jakusigalajo ajitaje pasi pa malo gakupelecela mbopesigo.

³¹ Atyosye mawuta gakwe gosope, mpela mwakusatyocesya mawuta ga mbopesi jamkamulano, ni jwakutaga mbopesi agajoce pa malo gakupelecela mbopesigo, kuti gakoposye liwungo lyakwanonyelesya AMBUJE. Jwakutaga mbopesijo ali atesile msyungu wakwaŵenda AMBUJE kuti amkululucile ulemwa mundu wambajo, AMBUJEWO tacimkululucila mundujo.

³² Naga mundu akupeleka ngondolo ja mbopesi jakwaŵenda AMBUJE kululucila ulemwa, ngondolo jakwe jiŵe jamkolo, jangalemala.

³³ Asajice ligasa lyakwe pa mtwe pa ngondolo ja mbopesi jakwaŵenda AMBUJE kululucila ulemwawo, ni kujiwulajila pa malo pakusawulajila mbopesi jakutinisya.

³⁴ Ali atesile myoyo, jwakutaga mbopesi aloŵece cala cakwe m'miasi ja ngondolojo, ni kujipaka pa misengo ja malo gakupelecela mbopesi syakutinisya, miasi jakusigalajo ajitaje pasi pa malo gakupelecela mbopesigo.

³⁵ Atyosye mawuta gakwe gosope, mpela mwakusatyocesya mawuta ga ngondolo jakupeleka mbopesi jamkamulano, ni ajoce pa malo gakupelecela mbopesi pampepe ni mbopesi sine syakutinisya pa moto, syakupeleka kwa AMBUJE. Mwelemu ni mutatendeleje jwakutaga mbopesi msyungu wakwaŵenda AMBUJE, kumkululucila mundu jwakulemwajo cileŵi cakwe, ni AMBUJEWO tacimkululucila mundujo.