Lefitiko 21 - Chiyawo Bible

Malamusi ga ŵakutaga mbopesi

¹ AMBUJE* ŵamsalile Mose* kuti aŵecete ni Aloni* ni ŵanace ŵakwe ŵacalume ŵiŵaliji ŵakutaga mbopesi kuti, “Pakasimanikwa jwakutaga mbopesi jwalijose jutalisakasye pakukwaya mtembo wa mundu jwa mtundu wakwe.

² Nambo akukomboleka kwaya mtembo wa mamagwe, wa babagwe, mwanace jwakwe, mlongo mjakwe jwakupagwa citumbo cimo,

³ kapena mlumbugwe jwangalombela jwakutama mwakuŵandikana najo.

⁴ Nambo akalisakasya pakuwukwaya mtembo wa mlumbugwe jwamlombedwe.

⁵ Jwakutaga mbopesi jwalijose akasenga umbo sya mu mtwe mwakwe, kapena kucenyendela ndewu syakwe, kapena kulikatakata pa cilu pakwe kulosya kuti ali pa malilo.

⁶ Akwenela kuŵa ŵaswela soni akalisakasya lina lyangu, pakuŵa akusapeleka mbopesi ja yakulya kwa une, myoyo akwenela kuŵa ŵaswela.

⁷ Jwakutaga mbopesi akalombela jwamkongwe juŵaliji hule, kapena jwamsakale, soni akalombela jwamkongwe jwa umasile ulombela wakwe, pakuŵa jwakutaga mbopesijo ali jwamswela pameso pa Mlungu jwakwe.

⁸ Ŵandu amtende jwakutaga mbopesi kuti ali jwamswela, ligongo lyakuti akusapeleka mbopesi ja yakulya kwa Une AMBUJE. Aŵe jwamswela kwa jemanja, ligongo Une AMBUJE jungumswejesya jemanja ndili jwamswela.

⁹ Naga mwanace jwamkongwe jwa ŵakutaga mbopesi akulisakasya pakutenda ya uhule, akwasambula babagwe. Mwanacejo akwenela amwulaje pakumjoca pa moto.”

¹⁰ Mundu jwamkulungwa kwa ŵakutaga mbopesi acimjakwe, ŵampungulile mawuta pa mtwe pakwe, ni ŵamswejesye kuti awaleje yakuwala ya jwakutaga mbopesi, myoyo akasileka umbo syakwe syangasakula kapena kupapula yakuwala yakwe kulosya kuti ali jwa kuwilwa.

^11-12 Jwakutaga mbopesi aŵicidwe pajika kuti andumicileje Une, ni ngakwenela kulisakasya kapena kugasakasya malo ga citenti cakusimanilana, pakuwuŵandicila mtembo, kapena kulisakasya ligongo lya malilo ga babagwe kapena mamagwe. Naga akukopoka mcitenti cakusimanilana kuja ku malilo, jwakutaga mbopesijo ni citentico yikuŵa yesakale, ligongo ali jwakutaga mbopesi jwamkulungwa.

¹³ Alombele mwali jwamkanatame malo gamo ni ŵalume.

¹⁴ Akasalombela jwamkongwe jwamasije, kapena jwamkongwe jwa umasile ulombela wakwe, kapena hule. Nambo alombele mwali jwa mtundu wakwe, jwamkanasimane ni ŵalume.

¹⁵ Naga jwakutaga mbopesi jwamkulungwa ngakupikanila yeleyi, ŵanace ŵakwe ŵakaliji ŵaswela, taciŵa ŵasakale. Une ndili AMBUJE junamswejesye jwakutaga mbopesijo.

¹⁶ AMBUJE ŵamsalile Mose,

¹⁷ kuti amsalile Aloni kuti, “Pangali mundu jwalijose mwa yisukulu yenu pa mipago josope, jwali jwamlemale, jutaciyika kutaga mbopesi ja yakulya kwa Une.

¹⁸ Mundu jwalijose jwamlemale akaŵandicila kwa une kutaga mbopesi. Kutandila mundu jwangalola kapena jwamlemale ngongolo, jwamlemale ngope, kapena mundu jwakwete ciŵalo cine cakulekangana ni mwakuŵela ŵandu ŵane wosope.

¹⁹ Mundu jwamlemale lusajo kapena mkono,

²⁰ mundu jwakwete cindundumuli pa mgongo wakwe kapena jwamjipi mwakulemala ni jwakuwoneka jwakunyolola cilu cakwe, mundu jwakwete ng'ala m'meso mwakwe, mundu jwakwete cilwele cakunyanya, kapena upele pa cilu pakwe, kapena jwakwete mwela mkabudula mwakwe.

²¹ Mwa yisukulu ya Aloni, akasimanikwa jwalijose jwamlemale, jutacitaga mbopesi ja mkate kwa Mlungu.

²² Nambo mundu jwamlemalejo akukomboleka kulya mkate wa Mlungu mnope wawupelecedwe kwa AMBUJE, ni yakulya yine yeswela.

²³ Nambo mundu jwamlemalejo akaŵandicila kugali makatani kapena kugali malo gakupelecela mbopesi. Akayisakasya yindu yayiswelayi, ligongo une ndili AMBUJE junguyiswejesya yele yinduyi.”

²⁴ Yeleyi ni yindu yiŵasasile Mose kwa Aloni ni ŵanace ŵakwe ŵacalume, ni ŵandu wosope ŵa ku Isalaeli.