Lefitiko 2 - Chiyawo Bible

Mbopesi sya utandi

¹ Mundu jwalijose naga akwika kupeleka mbopesi ja utandi kwa AMBUJE,* mbopesijo jiŵe ja utandi wambone wakutililika cenene. Utandiwo awutaje mawuta ni ubani*

² ayice nayo kwa ŵakutaga mbopesi, yisukulu ya Aloni. Asapule utandi wewanganye ni mawuta ula ligasa limo, pampepe ni ubani wosope. Jwakutaga mbopesi ayijoce yosopeyi pa malo gakupelecela mbopesi, kwalosya AMBUJE kuti mbopesi josopejo jili jawo AMBUJE. Liwungo lya mbopesi jakoca pa moto ja yakulya yeleyi, lili lyakwanonyelesya AMBUJE.

³ Yakusigala ya mbopesi ja utandiyo yiŵe ya ŵakutaga mbopesi. Yeleyi yili mbuwa ja pajika, jajiswela mnope, ligongo ayisapwile kutyocela pa mbopesi ja yakulya jakoca pa moto, jakupeleka kwa AMBUJE.

⁴ Pa ndaŵi jimkupeleka mbopesi ja mkate wakoca mu ufuni wagumba ni litaka, uŵeje mkate ŵa utandi wambone ŵangali cakusasaŵilisya, wewanganye ni mawuta, kapena tuŵeje tumikate twakwepepala, twangali cakusasaŵilisya twepace mawuta.

⁵ Naga mbopesi jenu jikuŵa ja mkate ŵakoca pa ciwaya, uŵe mkate wa utandi ŵambone wangali cakusasaŵilisya, wewanganye ni mawuta.

⁶ Mjikatanye katanye mikatejo, ni kujipungulila mawuta. Mwelemu ni mwakupelecela mundu mbopesi ja utandi.

⁷ Naga mbopesi jenu jikuŵa jamikate jakoca pa ciwaya, jiŵe ja utandi wambone wewanganye ni mawuta.

⁸ Myice najo mbopesi jeleji kwa AMBUJE, mli mjipelece kwa ŵakutaga mbopesi, ŵalakwejo tajijigalile pa malo gakupelecela mbopesi.

⁹ Jwakutaga mbopesi asapule mbuwa jine ja mbopesijo, kulosya kuti mbopesi josopejo ajipelece kwa AMBUJE, ni ajijoce pa malo gakupelecela mbopesi.

¹⁰ Yakusigala ya mbopesi ja utandijo yiŵe ya Aloni ni ŵanace ŵakwe. Jeleji ni mbuwa ja pajika, jajiswela mnope, ligongo ayisapwile pa mbopesi jakoca pa moto, jakupeleka kwa AMBUJE.

¹¹ Mbopesi ja yakulya yimkuyipeleka kwa AMBUJE, jiŵeje jangali cakusasaŵilisya ligongo lyakuti ngimkuŵajilwa kupeleka kwa AMBUJE mbopesi jakoca pa moto, ja cakusasaŵilisya kapena uci.

¹² Mbopesi ja yimanga yandanda yimkugowola caka ni caka, myiceje nayo kwa AMBUJE, nambo mkayijocela pa malo gakupelecela mbopesi.

¹³ Mtajeje njete pa mbopesi syenu syosope sya yakulya, mkasimliŵalila, ligongo njetejo jili jakulosya cilanga,* ca pasikati pa m'mwejo ni Mlungu jwenu. (Mtajeje njete pa mbopesi syenu syosope).

¹⁴ Ndaŵi jimkupeleka kwa AMBUJE mbopesi ja yakulya yandanda kukomala, myitajeje mbopesi yili yekalanje kapena yesyaje.

¹⁵ Ayitaje mawuta ni ubani. Jelejo ni mbopesi ja yakulya.

¹⁶ Jwakutaga mbopesi ajoce mbuwa ja yakulya yesyaje yila ni mawuta kuti jiŵe mbopesi ja cikumbukumbu, soni ataje ubani wosope, kuti jiŵe mbopesi ja yakulya jakupeleka kwa AMBUJE.