Lefitiko 16 - Chiyawo Bible

Lisiku lyakwaŵenda AMBUJE kululucila ulemwa

¹ AMBUJE* ŵaŵecete ni Mose* panyuma pa ciwa ca ŵanace ŵaŵili ŵacalume ŵa Aloni* ŵiŵawulajidwe, ligongo lyakuŵandicila mwangajenela pameso pawo AMBUJE.

² AMBUJE ŵamsalile Mose kuti, “Mwasalile akulu ŵenu Aloni kuti, akajinjilaga ndaŵi jilijose mwakusacila, ku Cipinda Ceswela Mnope, cicili kusyeto kwa likatani lyakuciga, ligongo lyakuti kweleko ni kunguwonecela une mwiwunde, pacanya pa ciwuniko ca Libokosi lya Cilanga,* naga ngakupikanila taciwa.

³ Aloniwo akukomboleka kwinjila ku Cipinda Ceswela Mnope, ali ajigele mwanace jwamkambako jwa ng'ombe, kuti akaŵe mbopesi jakwaŵenda AMBUJE kululucila ulemwa,* ni ngondolo jamkambako kuti jikaŵe mbopesi jakutinisya.”

⁴ AMBUJE ŵalamwile Aloni kuti, mkanajinjile Aloni ku Cipinda Ceswela Mnope, Aloniwo ajoje cilu cosope ni awale mwinjilo weswela wa nguwo ja bafuta, awale soni kabudula jwa nguwo ja bafuta ni kutaŵila lamba jwa nguwo ja bafuta, ni ataŵe nduŵila janguwo ja bafuta ku mtwe kwakwe. Yeleyi ni yakuwala ya jwakutaga mbopesi.

⁵ Likuga lya Aisalaeli tilicipeleka kwa Aloni mbusi sya mkambako siŵili, kuti siŵe mbopesi syakwaŵenda AMBUJE kululucila ulemwa, ni ngondolo jamkambako jimo kuti jiŵe mbopesi jakutinisya.

⁶ Aloni apelece ng'ombe jamkambako kuti jiŵe mbopesi jakwaŵenda AMBUJE kuwukululucila ulemwa wakwe ni sya liŵasa lyakwe.

⁷ Asijigale mbusi siŵili sila ku mlango ŵa citenti cakusimanilana, pameso pawo AMBUJE.

⁸ Aloni alondole cisango, pakamulisya masengo maganga gaŵili, limo lyakulembedwa kuti, “kwa AMBUJE” ni line lyakulembedwa kuti, “kwa Asaseli”.

⁹ Aloni ajigale mbusi jele cisango cilosisye kuti aji ni ja AMBUJE, ni ajipelece mbopesi jakwaŵenda AMBUJE kuwutyosya ulemwa.

¹⁰ Nambo mbusi jilosisye cisango kuti aji ni ja Asaseli, ayice najo ja umi pameso pa AMBUJE, kuti atende msyungu wakwaŵenda AMBUJE kululucila ulemwa wa ŵandu ŵa ku Isalaeli, ni ajitumisye mbusijo ku cipululu ca Asaseli.

¹¹ Ndaŵi jakupeleka Aloni ng'ombe jamkambako, kuti jiŵe mbopesi jakwaŵenda AMBUJE kuti akululucile ulemwa wakwe pamo ni liŵasa lyakwe,

¹² ajigale kaŵiga kegumbale ni makala ga moto gakutyocela pa malo gakupelecela mbopesi, asapule magasa gaŵili ga ubani* wesyajesyaje, wakununjila cenene, ni ajinjile nayo ku Cipinda Ceswela Mnope, kusyeto kwa likatani lyakucinga malo gamaswelago.

¹³ Ali ku Cipinda Ceswela Mnope, pameso pawo AMBUJE, ataje ubani pa moto, kuti lyosi lya ubaniwo liwunicile ciwuniko cicili pacanya pa Libokosi lya Cilanga, kuti jwalakwe akaliwona Libokosilyo, ni mkaŵa kuwa.

¹⁴ Ajigale miasi panandi ja ng'ombe jamkambako jila, ni ajimisile pa ciwuniko ca Libokosi lya Cilanga cila, mbali ja kungopoko lyuŵa. Amisile soni miasijo kasano ni kaŵili ni cala cakwe, pasogolo pa ciwunikoco.

¹⁵ Panyuma pakwe kakwe Aloni awulaje mbusi ja mbopesi jakwaŵenda AMBUJE kuwukululucila ulemwa wa ŵandu. Miasi jakwe ajinjile najo ku Cipinda Ceswela Mnope, kusyeto kwa nguwo jakucinga, ni ajimisile miasijo pa ciwuniko ni pasogolo pa Libokosi lya Cilanga, mpela muŵatendele ni miasi ja ng'ombe jila.

¹⁶ Pakutenda yeleyi ni kuti jwakutaga mbopesi atesile msyungu wa kugaswejesya Cipinda Ceswela Mnope, ku yindu yakusakala yakutenda Aisalaeli pamo ni ulemwa wawo wosope. Atende soni msyungu wamtundu uwowo, ku ciswejesya citenti cakusimanilana, ligongo cili pasikati pa masakasa gawo, gele gagumbele ni yakulemwa yawo.

¹⁷ Ndaŵi jakwinjila Aloni ku cipinda ceswela mnope kuja kutenda msyungu wa kuswejesya Cipinda Ceswela Mnopeco, mpaka pa ndaŵi ja kukopoka, akasajinjila mundu jwalijose mcitenti cakusimanilana, mpaka ali amasile kutenda msyungu wakwaŵenda AMBUJE kululucila ulemwa wakwe, ulemwa wa liŵasa lyakwe, ni ulemwa wa likuga lyosope lya Aisalaeli.

¹⁸ Ali akopwece, Aloniwo ajawule kumalo gakupelecela mbopesi sya kutinisya ni kugaswejesya. Ajigale miasi ja ng'ombe jamkambako ni miasi ja mbusi, ni kujipaka pa misengo jijili pa ndumba syosope sya malo gakupelecela mbopesi.

¹⁹ Amise miasi jine penani pa malo gakupelecela mbopesigo ni cala cakwe kasano ni kaŵili, kuti agaswejesye malo gakupelecela mbopesigo ku ulemwa wa Aisalaeli.

Mbusi jakutyocesya ulemwa

²⁰ Ali amasile msyungu wakuciswejesya Cipinda Ceswela Mnope, ni citenti cakusimanilana pamo ni malo gakupelecela mbopesi, jwakutaga mbopesijo apelece kwa AMBUJE mbusi ja cijumi.

²¹ Aloni aŵice magasa gakwe gaŵili pa mtwe pa mbusijo, ni apesye ulemwa, yakulemwa, ni ungapikanila wosope wa Aisalaeli, ni ayitule pa mtwe pa mbusijo, mundu juŵamsagulile cile ajisakulile mbusijo ku cipululu.

²² Mbusijo tijicitwicila ulemwa wawo wosope ni kuja nawo ku cipululu.

²³ Aloni ajinjile mcitenti cakusimanilana, awule yakuwala ya bafuta yiŵawete pakwinjila ku Cipinda Ceswela Mnope cila, nipo ayilece m'momo.

²⁴ Ajoje cilu cakwe cosope kumalo gamaswela gakojela, ni akawale yakuwala yakwe. Ni akopoce kuja kupeleka mbopesi jakutinisya jakutyosya ulemwa wakwe msyene, soni ni mbopesi jakutinisya jakutyosya ulemwa wa ŵandu wosope.

²⁵ Mawuta ga nyama siŵili syakutaga mbopesi jakutyosya ulemwa, agajoce pa malo gakupelecela mbopesi.

²⁶ Mundu juŵajisakulile mbusi ku cipululu ca Asaseli jula, acape yakuwala yakwe ni ajoje, mkinawujile ku masakasa kwawo.

²⁷ Ng'ombe ni mbusi sisyakamulisidwe masengo pa mbopesi sya ulemwa, syele miasi jakwe ŵajijigele kuja kutendela msyungu wakuswejesya Cipinda Ceswela Mnope kuti atyocesye ulemwa, asikopocesye kusa kwa masakasa. Mapende, nyama ni ndoŵe syakwe ayitinisye.

²⁸ Mundu jutatinisye yeleyi akwenela kucapa yakuwala yakwe ni koga cilu cakwe cosope mkanawujile ku masakasa.

Pa lisiku lyakwaŵenda AMBUJE kululucila ulemwa

²⁹ Ali liŵe lilamusi lyenu lya mpaka kalakala, kuti pa lisiku lya likumi lya mwesi wamsano ni jiŵili, jemanja Aisalaeli ni acalendo ŵakutama pasikati penu, mkalya cakulya cilicose, soni mkakamula masengo galigose.

³⁰ Pa lyele lisikuli tipaciŵa msyungu wakumswejesya jemanja, kuti ulemwa wenu wosope utyoce. Kuti timŵe ŵaswela pameso pa AMBUJE.

³¹ Lyeleli tiliciŵa lisiku lyenu lyalikulungwa lya sabato lyakupumula, soni timtame ŵangalya cakulya cilicose pa lyele lisikuli. Lyeleli liŵe lilamusi lyenu lyangamala lya mpaka kalakala.

³² Jwakutaga mbopesi jwampakesye mawuta ni kumswejesya kuti aŵe jwakutaga mbopesi m'malo mwa babagwe, tatende msyungu welewu wakuswejesya, ali awete yakuwala ya masengo gakwe gakutaga mbopesi ya bafuta.

³³ Tatende msyungu wakuciswejesya Cipinda Ceswela Mnope. Tatende soni msyungu wakuciswejesya citenti cakusimanilana ni malo gakupelecela mbopesi, soni ni msyungu wakwaswejesya ŵakutaga mbopesi acimjakwe ni likuga lyosope lya ŵandu.

³⁴ Lyeleli liŵe lilamusi lyenu lyangamala lya yaka yosope, kuti timtendeje msyungu welewu wakwaswejesya Aisalaeli ku ulemwa wawo wosope, pa caka kamo. Nipo Mose ŵatesile mpela yiŵatite pakumlamula AMBUJE.