Lefitiko 15 - Chiyawo Bible

Yakunyalaya yakukopoka mcilu

¹ AMBUJE* ŵamsalile Mose* ni Aloni* kuti,

² mwasalile Aisalaeli kuti, mundu jwamlume jwalijose jwakwete cilwele cakoposya uwowu mkabudula mwakwe, yeleyo yili yindu yakunyalaya.

³ Lilamusi lyakwayana kulisakasya ni yakunyalaya yakukopoka mkabudula mwa mundu ni ali: naga mkabudulamo mukukopokape uwowu, kanga ulesile kopoka, mundujo ali jwamsakalepe.

⁴ Cindanda cilicose citagonele mundu jwakukopoka uwowujo, tijiŵe jesakale. Cindu cilicose citatamile jwalakwejo, ticiŵe cakusakala.

^5-6 Mundu jwalijose jutakwaye cindanda cakwe, kapena mundu jwalijose jutatamile cindu cilicose cele mundu jwakukopoka uwowujo ciŵatamile, acape yakuwala yakwe, soni ajoje, nambo taŵepe jwamsakale mpaka ligulo.

⁷ Jwalijose jwakucikwaya cilu ca mundu jwakukopoka uwowujo, acape yakuwala yakwe soni ajoje, nambo taŵepe jwamsakale mpakana ligulo.

⁸ Naga mundu jwakukopoka uwowujo akusunila mata pa cilu ca mundu mjakwe jwali cenene, mjakwejo acape yakuwala yakwe soni ajoje, nambo taŵepe jwamsakale mpakana ligulo.

⁹ Cilicose cakutamila pakwela haci, catamile mundu jwakukopoka uwowujo, cili cesakale.

¹⁰ Soni jwalijose jwakukwaya cindu cilicose ciŵatamile mundujo, taciŵa jwamsakale mpakana ligulo. Jwalijose jutacinyakule cakutamilaco, acape yakuwala yakwe, soni ajoje, nambo taŵepe jwamsakale mpaka ligulo.

¹¹ Naga mundu jwakukopoka uwowujo akumkwaya mundu jwalijose akananaŵe m'myala mwakwe, mundu jwakukwayidwajo acape yakuwala yakwe, soni ajoje, nambo taŵepe jwamsakale mpakana ligulo.

¹² Mpika wagumba ni litaka, utawukwaye mundu jwakukopoka uwowujo, awukase, nambo naga cinduco cili cakupanganyikwa ni citela acicape ni mesi.

¹³ Naga mundu jwakukopoka uwowujo akuliwona kuti aposile, akwenela kwembeceya kwa masiku msano ni gaŵili, panyuma pakwe kakwe acape yakuwala yakwe, soni ajoje mesi ganatekape mcisima, ni taciŵa mundu jwamswela.

¹⁴ Pa lisiku lya msano ni gatatu ajigale njuŵa siŵili kapena mawunda ga ngunda gaŵili, ni ayice nasyo pameso pawo AMBUJE, pa mlango wa citenti cakusimanilana, ni ayipelece kwa jwakutaga mbopesi.

¹⁵ Jwakutaga mbopesijo ajipelece njuŵa jimo kapena liwunda limo kuŵa mbopesi jakwaŵenda AMBUJE kululucila ulemwa* ni jinejo jiŵe mbopesi jakutinisya. Pakutenda yindu yeleyi ni kuti jwakutaga mbopesijo atesile msyungu wakwaŵenda AMBUJE, kuwukululucila ulemwa wa mundu jwakukopoka uwowu jula.

¹⁶ Naga mundu jwamlume akwasila pasi mbeju jakwe ja ulume, ajoje cilu cakwe cosope, nambope taŵe jwamsakale mpakana ligulo.

¹⁷ Cakuwala cilicose cakupanganyikwa ni nguwo kapena lipende, pajigwilile mbeju ja ulumepo, acicape, nambo tiyiŵepe yangaswejela mpakana ligulo.

¹⁸ Naga jwamlume akwasa mbeju jakwe ja ulume pakutama malo gamo ni jwamkongwe, wosope ŵanaŵaŵili ajoje, nambo taŵepe ŵasakale mpaka ligulo.

¹⁹ Naga jwamkongwe ali pa ulwele wakwe wacikongwe, taŵe mundu jwamsakale kwa masiku msano ni gaŵili, jwalijose jutamkwaye jwamkongwejo, taŵe mundu jwamsakale mpakana ligulo.

²⁰ Cindu cilicose citagonele jwamkongwejo ali ciŵela jwamsakale, cinduco ticiŵe cesakale. Cindu cilicose citatamile ticiŵe cesakale.

^21-23 Jwalijose jutakwaye cindanda ca jwamkongwejo, kapena cindu cilicose catamile, acape yakuwala yakwe, soni ajoje, ni taŵepe jwamsakale mpaka ligulo.

²⁴ Jwamlume jwalijose jwakutama malo gamo ni jwamkongwe, jwali pa ulwele wakwe wacikongwe, jwamlumejo taŵe jwamsakale kwa masiku msano ni gaŵili. Soni cindanda cilicose citagonele jwalakwejo ticiŵe cangaswejela.

²⁵ Naga jwamkongwe akwasa miasi masiku gamajinji, nambo ngaŵa ndaŵi ja ulwele wakwe wacikongwe, kapena naga ulwele wakwe wacikongwe ukupelenganya ndaŵi jakwe, jwamkongwejo ali jwamsakale pa ndaŵi josopejo jakwita miasijo, mpela mwele mwakasatamila pa ndaŵi ja ulwele wakwe wacikongwe.

²⁶ Cindanda cilicose citagonele soni ni cindu cilicose citatamile jwamkongwejo pa ndaŵi jeleji, ticiŵe cesakale.

²⁷ Jwalijose jutakwaye yindu yeleyi ali mundu jwamsakale, acape yakuwala yakwe ni koga, nambo taŵe jwamsakalepe mpaka ligulo.

²⁸ Uli umasile ulwele wakwe wacikongwewo, jwamkongwejo ajembecele kwa masiku msano ni gaŵili, ni panyuma pakwe taŵe mundu jwamswejele.

²⁹ Pa masiku msano ni gatatu, jwamkongwejo ajigale njuŵa siŵili kapena mawunda ga ngunda gaŵili, ni ayice nago kwa jwakutaga mbopesi pa mlango wa citenti cakusimanilana.

³⁰ Jwakutaga mbopesi tapelece njuŵa jimo kapena liwunda limo, kuŵa mbopesi jakwaŵenda AMBUJE kululucila ulemwa, ni jine jiŵe ja mbopesi jakutinisya. Naga akutenda yeleyi, ni kuti jwakutaga mbopesijo atesile msyungu wakumswejesya jwamkongwejo, ku ulwele wakwe wacikongwe ula.

³¹ Pakutenda myoyo jemanja, Mose ni Aloni, timcakamucisya Aisalaeli, kuti aswejele ku yindu yakwasakasya, kogopela ni mkaŵa kuwa ligongo lyakutenda ulemwa wakusakasya citenti cangu cicili pasikati pawo.

³² Gelega ni malamusi ga mundu jwamlume jwakwete ulwele wakukopoka uwowu mkabudula mwakwe, kapena jwakwitila pasi mbeju jakwe ja ulume, yele yayikusamtendekasya kuti aŵe jwamsakale,

³³ jwamkongwe pa ndaŵi jakulwala ulwele wakwe wacikongwe kapena jwamlume jwakutama malo gamo ni jwamkongwe jwamsakale.