Lefitiko 13 - Chiyawo Bible

Malamusi gakwayana ni ulwele ŵa pa cilu

¹ AMBUJE* ŵamsalile Mose* ni Aloni* kuti,

² Naga mundu akukola cisumbukute pa cilu pakwe, kapena lipute, kapena cikanga, soni mwine komboleka kuŵa cilwele ca mpela matana pa cilu pakwepo, mundujo amjigalile kwa jwakutaga mbopesi Aloni, kapena kwa jwalijose jwa ŵanace ŵakwe ŵacalume ŵali ŵakutaga mbopesi.

³ Jwakutaga mbopesijo alolecesye pa cilu pali ulwelepo. Naga akuwona kuti umbo sya pa malo pawuli ulwelepo sili syeswela, soni kuti ulwelewo ujinjile mkati mnope kulipeleta lipende lya pa cilu, ni kuti ulwele welewo uli matana. Jwakutaga mbopesi ali amasile kumlolecesya jwakulwalajo, ajenesye kwa ŵandu kuti jwakulwalajo ali jwamsakale.

⁴ Nambo naga pa malo pali ulwelepo pakuwoneka papaswela, soni kuti ulwelewo nganiwujinjila mkati mnope, uli pacanya pa lipende, ni umbo sya pa malopo nganisiswejela, jwakutaga mbopesi amŵice jwakulwalajo pa malo gajikape kwa masiku msano ni gaŵili.

⁵ Jwakutaga mbopesi amlole soni jwakulwalajo pa lisiku lya msano ni gaŵili, naga akuwona kuti cilweleco nganicijendelela pa cilu, pelepo jwakutaga mbopesi amjonjecesye jwakuwajo masiku msano ni gaŵili gane, gakutama pajika.

⁶ Jwakutaga mbopesi amlole soni jwakulwala jula pa lisiku lya msano ni gaŵili. Naga pa malo paliji cilweleco pasimasice, soni cilweleco nganicijendelela pa cilu, jwakutaga mbopesi ajenesye kwa ŵandu kuti jwakulwalajo ali cenene. Celeco caliji cakuyimba cabe, ni jwakulwalajo acape yakuwala yakwe, ni taciŵa mundu jwamswejele.

⁷ Nambo naga cakuyimbaco cikwendelela pa cilu, mundujo ali alilosisye kala kwa ŵakutaga mbopesi kuti amswejesye, mundujo ajawule soni kulilosya kwa jwakutaga mbopesi.

⁸ Jwakutaga mbopesi amlolecesye soni mundujo. Naga akuwona kuti cakuyimbaco cijendelele kwene pa cilu, ajenesye kuti jwakulwalajo ali jwamsakale, gelego gali matana.

⁹ Naga mundu akukamulwa ni cilwele cacikulungwa ca pa cilu, mundujo amjigalile kwa jwakutaga mbopesi,

¹⁰ jwalakwejo amlolecesye mundu jwakulwalajo. Naga akwete cakuyimba cakuwoneka ceswela pa cilu pakwe, cele cacitendekasisye kuti umbo sya pa malopo siŵe syeswela, soni naga pakuyimbapo pana yilonda

¹¹ welewo uli ulwele wawukulungwa wa pa cilu cakweco, jwakutaga mbopesi ajenesye kuti jwakulwalajo ali jwamsakale. Pangali soni ligongo lyakumŵika pa malo gajika, ligongo ali jwamsakale kusyene.

¹² Nambo naga ulwele ŵa pa cilu ukwanile cilu cosope ca mundu jwakulwalajo, kutandila ku mtwe mpaka kusajo,

¹³ jwakutaga mbopesi amlolecesye soni, naga akuwona kuti ulwele wa pa ciluwo ujenele cilu cosope, ajenesye kuti jwakulwalajo nganaŵa jwamsakale, ali cenene. Naga cilu cakwe cosope cikuwoneka ceswela, jwelejo ali mundu jwangasakala.

¹⁴ Nambo naga pa cilu pa jwakulwalajo pana yilonda, ni kuti jwalakwejo ali jwamsakale.

¹⁵ Myoyo jwakutaga mbopesi ayilolecesye yilondayo, ni ajenesye kuti jwakulwalajo ali jwamsakale. Yilondayo yikulosya kuti mundujo akwete cilwele cacikulungwa ca pa cilu, soni mundujo ali jwa msakale.

¹⁶ Nambo naga yilondayo yikupola ni cilu cikuwoneka soni ceswela, mundu jwakulwalajo ajawule kwa jwakutaga mbopesi,

¹⁷ jwambopesi amlolecesye. Naga yilonda yisandwice yeswela, jwakutaga mbopesi ajenesye kuti jwakulwalajo ali mundu jwangasakala. Ali jwamswela jwelejo.

¹⁸ Naga pa cilu pa mundu jwakulwalajo pana cisumbukute cicaposile,

¹⁹ naga picaliji cisumbukutepo pakukopoka yakuyimbayimba yeswela kapena yakuyimba yecejele, ajawule kwa jwakutaga mbopesi akamlosye yakuyimbayo.

²⁰ Jwakutaga mbopesi alolecesye cenene, naga cisumbukuteco cijinjile mkati mnope, ni umbo sikuwoneka syeswela pa malopo, jwakutaga mbopesijo ajenesye kuti jwakulwalajo ali jwamsakale. Welewo uli ulwele wekulungwa, wawukopwece pa cisumbukuteco.

²¹ Nambo naga jwakutaga mbopesi ali apalolecesye cenene nikusimana kuti umbo nganisikopoka syeswela, soni kuti cisumbukuteco nganicijinjila mkati mnope, nambo cikutanda kusimasika, jwakutaga mbopesijo amŵice jwakulwalajo pa malo gajikape kwa masiku msano ni gaŵili.

²² Naga cilweleco cijenele pa cilu, jwakutaga mbopesijo ajenesye kuti jwakulwalajo ali jwamsakale, welewo uli ulwele wawukulungwa wa pa cilu.

²³ Nambo naga liŵala lya cilweleco lili pa malo gamo, lyangajendelecela pa cilu, lyelelyo lili liŵasi cabe lya cisumbukute. Jwakutaga mbopesi ajenesye kuti jwakulwalajo ali cenene, ali mundu jwangasakala.

²⁴ Naga mundu akukola liŵanga lya moto, ni liŵangalyo likuwoneka lyeswela mwa kucejela kapena likuwoneka lyeswela kwene,

²⁵ jwakutaga mbopesi alilolecesye liŵangalyo. Naga umbo sili peŵangalyo sikuwoneka kuti sili syeswela, soni liŵangalyo naga likuwoneka lyakusokoka, welewo uli ulwele uwukopwece peŵangapo. Welewo uli ulwele wawukulungwa wa pa cilu.

²⁶ Nambo naga jwakutaga mbopesi akulolecesya peŵangapo, ni akupasimana kuti umbo nganisiswejela, soni liŵangalyo nganilisokoka, nambo likusimasika, jwakutaga mbopesi amŵice jwakulwalajo pa malo gajikape masiku msano ni gaŵili.

²⁷ Pa lisiku lya msano ni gaŵiligo, naga liŵangalyo lijenele pa cilu, jwakutaga mbopesijo ajenesye kuti jwakulwalajo ali jwamsakale. Welewo uli ulwele wawukulungwa wa pa cilu.

²⁸ Nambo naga liŵangalyo lili pa malo pamo, nganilijendelecela pa cilu, soni likusimasika, lyelelyo lili litusa lya liŵangalyo, jwakutaga mbopesi ajenesye kuti ali cenene, ali mundu jwangasakala. Pakuŵa liŵasi lya liŵangalyo lili lya moto cabe.

²⁹ Naga mundu jwamlume kapena jwamkongwe akwete liŵanga pa mtwe kapena pa cipundi,

³⁰ jwakutaga mbopesi alilolecesye cenene liŵangalyo. Naga liŵangalyo lisokwece mnope, ni umbo sikuwoneka syamti mpela m'bilicila soni syakunyolola, jwakutaga mbopesijo ajenesye kuti jwakulwalajo ali mundu jwamsakale. Ligongo welewo uli ulwele wawukulungwa wa pa cilu.

³¹ Naga jwakutaga mbopesi akulilolecesya liŵangalyo ni akusimana kuti nganilisokoka mnope, soni pangali umbo syepiliwu peŵangalyo, jwakutaga mbopesijo amŵice pa malo gajikape kwa masiku msano ni gaŵili.

³² Pa lisiku lya msano ni gaŵili, jwakutaga mbopesijo alilole soni liŵangalyo, naga liŵangalyo nganilijenela pa cilu, ni pangali umbo syamti mpela m'bilicila, soni liŵangalyo likuwoneka kuti nganilisokoka mnope,

³³ jwakulwalajo asenje umbo kapena ndewu syakwe, nambo akasenga umbo kapena ndewu sili peŵangapo. Jwakutaga mbopesi amwugalile pa malo gajikape mundu jwakulwala liŵangalyo kwa masiku msano ni gaŵili,

³⁴ Pa lisiku lya msano ni gaŵili, jwakutaga mbopesi alilolecesye liŵangalyo, naga nganilijendelecela pa cilu, soni liŵangalyo nganilisokoka, jwakutaga mbopesijo ajenesye kuti jwakulwalajo ali cenene, ali mundu jwangasakala. Myoyo mundu jwakulwalajo acape yakuwala yakwe, ni aŵe mundu jwangasakala.

³⁵ Nambo naga liŵangalyo lijenele pa cilu, jwakulwalajo ali amswejesye kalape,

³⁶ pelepo jwakutaga mbopesi amlolecesye soni jwakulwalajo, naga liŵangalyo lijendelecele pa cilu, jwakutaga mbopesi akalaga ni kulolecesya umbo syamti mpela m'bilicila, mundujo ali jwamsakale.

³⁷ Nambo naga jwakutaga mbopesi akulilolecesya liŵangalyo nakusimana kuti pamesile umbo syepiliwu ni kuti liŵangalyo liposile. Myoyo jwakutaga mbopesi ajenesye kuti jwakulwalajo ali cenene, soni ali mundu jwangasakala.

³⁸ Naga jwamlume kapena jwamkongwe akukola maŵala gamaswela pa cilu pakwe,

³⁹ jwakutaga mbopesi agalolecesye cenene. Naga maŵala ga pa cilugo nganigaŵa gamaswela mnope, ni kuti yeleyo yagamba kuwulika pa cilupo. Myoyo jwakulwalajo ali cenene, soni mundujo ali jwangasakala.

^40-41 Naga umbo sya mundu sikumala kundungu kapena pasogolo pa mtwe wakwe, mundujo ali cenene, ali mundu jwangasakala. Lwelelo luli lulasi cabe.

⁴² Nambo naga palulasipo pakuŵa pana liŵala lyeswela mwakucejela, welewo uli ulwele wawukulungwa wa pa cilu.

⁴³ Myoyo jwakutaga mbopesi amlolecesye jwakulwalajo, naga liŵala lyakuyimbalyo likuŵa lyeswela mwakucejela pa lulasipo, mpela mwele mugakusawonecela matana pa cilu,

⁴⁴ pelepo nikuti jwakulwalajo ali jwamsakale, Jwakutaga mbopesi akwenela kwenesya kuti ali jwamsakale, akwete ulwele wawukulungwa wa pa mtwe.

⁴⁵ Mundu jwele jwakwete ulwele wawukulungwa wa pa cilu, awale yiwisa, umbo syakwe agambe kusileka, ajiwunicile ngope jakwe kutandila pa lugomo lwamwinani kutulucila mwiŵanda, soni agumileje kuti, “Ndili jwamsakale! Ndili jwamsakale.”

⁴⁶ Jwakulwalajo taŵe jwamsakale kwa ndaŵi syosope, naga ulwelewo ngawukupola, soni atameje kumalo gajikape kusa kwa masakasa.

Malamusi gakwaya cakuwala cana cimbulukuku

⁴⁷ Naga cakuwala cakupanganyidwa ni manyunya kapena ni litonji cikwete cimbulukuku,

⁴⁸ kapena nguwo jakupanganyidwa ni litonji kapena ni manyunya, soni lipende kapena cindu cilicose cakupanganyidwa ni lipende,

⁴⁹ naga cimbulukukuco cikuwoneka ca mtundu wacisamba kapena wecejewu pa cakuwalaco, msyene cakuwalaco akacilosye kwa jwakutaga mbopesi.

⁵⁰ Jwakutaga mbopesi acilolecesye cakuwala cicikwete cimbulukukuco. Aciŵice pambali kwa masiku msano ni gaŵili.

⁵¹ Pa lisiku lya msano ni gaŵili acilolecesye soni cakuwalaco, naga cimbulukukuco cijenele pa cakuwala, kapena pa lipende lyakutendela masengo ga mtundu uliwose, liŵaliŵisile pa mbali lila, celeco cili cimbulukuku cakogoya, soni cakuwalaco cili cesakale.

⁵² Jwakutaga mbopesijo acijoce cakuwalaco, ligongo mtundu wa cele cimbulukukuco, ukwenela kuwujonanga pakuwujoca ni moto.

⁵³ Naga jwakutaga mbopesijo akucilolecesya cakuwalaco, ni akulola kuti cimbulukukuco nganicijenela pa cakuwalaco, kapena pa cindu cilicose cakupanganyidwa ni lipende,

⁵⁴ jwakutaga mbopesijo alamule kuti acicape cakuwalaco, ni aciŵice soni pambali kwa masiku msano ni gaŵili gane.

⁵⁵ Jwakutaga mbopesijo acilolecesye soni cakuwala cecape cila, naga liŵala lya cimbulukuku cila lili ciŵela lya cisamba kapena lyecejewu, atamose kuti nganilijendelela pa cakuwala, celeco cili ciŵela cesakale. Msyene cakuwalaco acijoce, pangaganicisya yakuti liŵala lya cimbulukuku lili cakumeso, kapena kunyuma kwa cakuwalaco.

⁵⁶ Nambo jwakutaga mbopesijo ali alolecesye, nakulola kuti liŵala lya cimbulukuku likuwoneka mwakusimasika ali acapile cakuwalaco, msyene cakuwalaco apapule liŵala lili pacakuwala cakupanganyidwa ni litonji kapena lipende.

⁵⁷ Naga liŵalalyo likuwoneka soni pa cakuwalaco kapena pa cindu cilicose cakupanganyidwa ni lipende, pelepo ni kuti cimbulukuku cikwendelelape, ni msyenejo ayijoce pa moto.

⁵⁸ Nambo naga cakuwala, kapena cindu cilicose cakupanganyidwa ni lipende, mli mcapile, ni cimbulukuku cosope cikutyoka, acape soni kaŵili cinduco, ni ticiciŵa caciswela.

⁵⁹ Lyeleli ni lilamusi lya cimbulukuku cakutama pa cakuwala cakupanganyidwa ni manyunya kapena litonji, kapena cindu cilicose cakupanganyidwa ni lipende, kuti m'manyilile cenene kulekanganya pasikati pa cindu cesakale kapena cangasakala.