Lefitiko 10 - Chiyawo Bible

Ulemwa wa Nadabu ni Abihu

¹ Ŵanace ŵaŵili ŵacalume ŵa Aloni,* Nadabu ni Abihu, jwalijose jwajigele cakututumicisya ubani,* ni ŵatasile makala gana moto ni ubani, ni ŵawupelece motowo kwa AMBUJE* nambo motowo nganiwuŵa ŵawuswela, ligongo lyakuti AMBUJE nganiŵalamulila kuti apelece wele motowo.

² Mwacisisimucila, AMBUJE ŵatumisye moto ni watinisye, wosopewo ŵawile pameso pawo AMBUJE.

³ Papopo Mose* ŵamsalile Aloni kuti, “Ayi ni yiŵasasile AMBUJE yila kuti, ‘Wosope ŵakundumicila Une mpela ŵakutaga mbopesi awucimbicisye uswela wangu. Ni tinjiŵa jwakucimbicikwa pameso pa ŵandu ŵosope.’ ” Nambo Aloni ŵatemi jii ngaŵeceta kandu.

⁴ Mose ŵaŵilasile Mishaele ni Elisafani, ŵanace ŵacalume ŵa Usiyele, baba ŵawo ŵanondi ŵa Aloni, ni ŵasalile kuti, “Myice mwatyosye acalongo acimjenuŵa pa malo gamaswela, ni mwakopocesye kusa kwa masakasa.”

⁵ Jemanja jila ŵayice, ni ŵajinyakwile mitembo jila pakujikamula mikanjo ja ŵandu ŵawe jila, ni kujikopocesye kusa kwa masakasa mpela muŵasalilile Mose mula.

⁶ Myoyo Mose ŵamsalile Aloni ni ŵanace ŵakwe ŵacalume Eliyesa ni Itamala kuti, “Mkaleka umbo syenu syangasakula, soni mkapapula yakuwala yenu, kulosya kuti mli m'malilo, ni mkaŵa kuwa, soni ni mkaŵa AMBUJE kuwutumbilila mpingo ŵosope. Nambo acalongo acimjenu wosope ŵa mtundu wa Aisalaeli, akwenela kwalilila acimjenu ŵawile ni moto wawupelece AMBUJE.

⁷ Mkasimkopoka kusa kwa citenti cakusimanilana ni mkaŵa kuwa, ligongo ŵamŵisile pajika, pakumpakasya mawuta gamaswela ga AMBUJE.” Ni jemanjajo ŵatesile mpela muŵasalilile Mose.

Malamusi ga ŵakutaga mbopesi

⁸ AMBUJE ŵamsalile Aloni kuti,

⁹ “Mkasimjinjila m'mwejo ni ŵanace ŵimli nawoŵa, m'citenti cakusimanilana, mli m'mwele finyo kapena cakumwa cilicose ca ukali, kogopela ni mkaŵa kuwa. Lyeleli ni lilamusi lyakwenela kulisunga mpaka kalakala.

¹⁰ Mlekanganyeje pasikati pa yindu yeswela ni yindu wamba, soni pasikati pa yindu yakunyalaya ni yindu yakwenela pa ndaŵi ja mapopelo.

¹¹ Mwajiganye Aisalaeli malamusi gosope ginapelece kwa jemanja kupitila mwa Mose.”

¹² Mose ŵamsalile Aloni ni ŵanace ŵakwe ŵacalume ŵiŵasigele cijumi ŵala, Eliyesa ni Itamala, kuti, “Mjigale yakupeleka ya kusigala ku mbopesi ja utandi jakutinisya, jakupeleka kwa AMBUJE, mpanganye ni utandiwo mkate wangali cakusasaŵilisya, mlyeje mli pambali pa malo gakupelecela mbopesi, pakuŵa yeleyi yili yeswela mnope.

¹³ Mlyeje yeleyi mli pa malo gamaswela, ligongo yeleyi namgaŵile kutyocela ku mbopesi jakutinisya pa moto jakupeleka kwa AMBUJE, kuti yiŵe yenu, m'mwejo ni ŵanace ŵenu ŵacalume. Yeleyi ni yiŵandamwile AMBUJE.

¹⁴ Nambo cidali cakucipeleka kuŵa mtuka wapadela, pakuyuya makono cila, pampepe ni ciga, mlyeje yeleyi mli pa malo galigose geswela, m'mwejo ni ŵanace ŵenu wosope ŵacalume ni ŵacakongwe ŵimli nawo. Yeleyi yipegwile kwenumwe kuti yiŵe yenu ni ŵanace ŵenu, kutyocela pa mbopesi jamkamulano* jele jajipelece Aisalaeli.

¹⁵ Ayice naco ciga ni cidali, cakupelecekwa mwa mtuka wa padela pakuyuya makono cila, pampepe ni mbopesi ja mawuta jakutinisya pa moto, kuti yiŵe mbopesi jakupeleka pameso pa AMBUJE. Yeleyi yiŵeje yenu ni ŵanace ŵenu mpaka kalakala, mpela mwele muŵalamulile AMBUJE.”

¹⁶ Nambo Mose piŵawusisye ya mbusi jakutaga mbopesi, jakwaŵenda AMBUJE kululucila ulemwa,* ŵapikene kuti ajitinisye kala. Piŵapikene yeleyi ŵakalipile Eliyesa ni Itamala.

¹⁷ Ŵatite kuti, “Ligongo cici nganimlila mbopesi jakwaŵenda AMBUJE kululucila ulemwa ula pa malo gamaswela? Jili jajiswela mnope, AMBUJE ajipelece kwa jemanja kuti mtyosye ulemwa wa mpingo wosope.

¹⁸ Ligongo lyakuti nganajinjila najo miasi jakwe, mkati mwa citenti ceswelaco, mbopesiji mkalile mli pa malo pelepo, mpela munamlamulile jemanja.”

¹⁹ Aloni ŵamjanjile Mose kuti, “Ana ngalye mbopesi jakwaŵenda AMBUJE kululucila ulemwa lelo jino, ana AMBUJE akasengwile? Ŵandu apelece mbopesi jawo jakwaŵenda AMBUJE kululucila ulemwa ni mbopesi jawo jakutinisya. Nambo yindu yakogoya ya mtundu awu yingwilile une.”

²⁰ Mose piŵagapikene maloŵe ga Aloni, ŵasengwile nago.