Lefitiko 1 - Chiyawo Bible

Malamusi ga mbopesi ja yinyama yakutinisya

¹ AMBUJE* ŵaŵecete ni Mose* kutyocela mu citenti cakusimanilana, ŵampele malamusi gakuti,

² ŵasalile Aisalaeli kuti agakuyeje pa ndaŵi jakutaga mbopesi. Naga mundu jwalijose akwisa kupeleka mbopesi ja nyama kwa une, ajigaleje ng'ombe kapena ngondolo kapena mbusi.

³ Naga mundujo akupeleka ng'ombe jakwe kuti jiŵe mbopesi jakutinisya kwa une, apeleceje ng'ombe jamkambako jangalemala. Ajipeleceleje pa mlango wa citenti cakusimanilana, kuti AMBUJE ajipocele.

⁴ Asajice ligasa lyakwe pa mtwe pa ng'ombejo, ni AMBUJEWO tacijipocela kuti jiŵe mbopesi jakutyocesya ulemwa* wakwe,

⁵ kaneko ajiwulaje pameso pa AMBUJE, ni ŵakutaga mbopesi ŵali yisukulu ya Aloni* ajigale miasi jakwe. Apungulile miasijo kusyungulila mbali syosope sya malo gakupelecela mbopesi, gagali pa mlango wa citenti cakusimanilana.

⁶ Jwalakwejo ajikuse nyamajo ni kujikatanya nduli nduli.

⁷ Ŵakutaga mbopesi, akolesye moto pa malo gakupelecela mbopesi, ni kusijala sasu cenene pa motopo.

⁸ Ŵakutaga mbopesiwo aŵice nduli sya nyamajo pa moto, pamo ni mtwe ni mawuta gakwe pacanya pa sasu syasili pa malo gakupelecela mbopesi.

⁹ Mundujo acicape ciwukala ni matumbo gakwe ni mesi, pamo ni ngongolo sya munyuma. Jwakutaga mbopesi ajitinisye nyamajo jamtundu, pa malo gakupelecela mbopesi, kuti jiŵe mbopesi ja yakulya yakutinisya pa moto, ya liwungo lyambone lyakwanonyela AMBUJE.

¹⁰ Naga mundu akupeleka mbopesi jakutinisya ja ngondolo kapena ja mbusi, jiŵeje jamkambako jangalemala.

¹¹ Ajiwulajileje mbali ja kumpoto kwa malo gakupelecela mbopesi, pameso pa AMBUJE. Ŵakutaga mbopesi amise miasi jakwe ali mkusyungulila mbali syosope sya malo gakupelecela mbopesi.

¹² Panyuma pakwe ali ajikatile nyamajo nduli nduli, ajigale soni mtwe ni mawuta gakwe, ni ayiŵice yosopeyo pacanya pa sasu sili pa malo gakupelecela mbopesi.

¹³ Nambo matumbo gakwe agacape pajika, pampepe ni ngongolo syakwe. Jwakutaga mbopesi ayipelece yosopeyo ni kuyitinisya pa malo gakupelecela mbopesi. Jelejo ni mbopesi ja yakulya yakutinisya pa moto, ya liwungo lyambone lyakwanonyela AMBUJE.

¹⁴ Naga mundu akupeleka kwa AMBUJE mbopesi jakutinisya ja cijuni, cijunico ciŵe njuŵa kapena ngunda.

¹⁵ Jwakutaga mbopesi ayice naco cijunico ku malo gakupelecela mbopesi, acikate mtwe pakucipotokola lukosi, ni kuwujoca mtwewo pa malo gakupelecela mbopesi. Miasi jakwe ajisulucisye pasi mumbali mwa malo gakupelecela mbopesi.

¹⁶ Atyosye citolokoso ni kuyijasa pa citutu, cicili pa kuŵandicila malo gakupelecela mbopesi, kumbali ja kungopoko lyuŵa.

¹⁷ Panyuma pakwe ajiganje pasikati, lipapiko line aku, line aku, nambo ngagatyosya mapapikogo. Ajijoce pa moto wa sasu uli pa malo gakupelecela mbopesi. Jelejo ni mbopesi ja yakulya jakutinisya pa moto, ja liwungo lyambone lyakwanonyela AMBUJE.