Jwak 9 - Chiyawo Bible

¹ Yosope yimbeceteyi nayiganisisye kala mu mtima mwangu, nipo nayiweni kuti ŵandu wosope ŵalunda ni ŵagoloka wosopewo ali myala mwa Mlungu pamo ni yitendo yawo yakwe. Nambo pangali mundu jwakusamanyilila ya msogolo mwakwe atamose yiŵe yacinonyelo kapena ya uŵengani.

² Yosope yayikusiyawonecela ŵandu ŵagoloka ni ŵangagoloka, ŵambone ni ŵakusakala ŵakwe, ŵakusamala ya dini ni ŵangasamala ya dini, jwakusapeleka mbopesi ni jwangapeleka mbopesi. Mundu jwambone akusalandana ni jwakusakala. Jwakusalumbila akusalandana ni jwakusajogopa kulumbila.*

³ Celeci cili cakusakala cekulungwa cacikutendekwa pacilambo capasi pano cakuti likungu limpepe likusilyagwila ŵandu wosope. Cindu cine soni cili cakuti mitima ja ŵandu jili jegumbale ni yakusakala. Mu mtima mwawo mukusagumbala ni masoka pa ndaŵi jali cijumi, nambo mbesi jakwe ja jemanjajo ni kuwa basi.

⁴ Nambo ŵali ni umi akwete cikulupi, pakuti m'mbwa ja umi jili bola kulekangana ni lisimba lyaliwe.

⁵ Ŵandu ŵali cijumi akusamanyilila kuti taciwa, nambo ŵawe ŵangamanyilila cilicose; nipo ŵangali soni mbote jine jilijose soni naga awile ŵangakumbucilika.

⁶ Cinonyelo cawo, uŵengani wawo ni wiwu wawo wosope yamasile kala. Nipo ngasapocela cilicose pa yosope yayikutendekwa pa cilambo capasi pano.

⁷ M'mwe mkajogopa, mlyeje yakulya yenu ni mtima ŵakusengwa, pakuti Mlungu ajiticisye kala yimkusatenda.

⁸ Ndaŵi syosope mwoneceje ŵakusangalala ni ŵakusengwa.

⁹ Msangalaleje ni ŵakongwe ŵamkusimwanonyela pa masiku umi wenu wangali matewu, uŵampele Mlungu pa cilambo capasi pano. Pakuti yeleyi ni yenu pa umi awuno, ni pa masengo genu gakupweteka gimkusakamulaga pa cilambo capasi pano.

¹⁰ Masengo galigose gimkuti mkamuleje, mgakamuleje ni macili genu gosope. Pakuti sampano timjawule ku malembe kukuli kwangali kukamula masengo, kwangali kuganisya, kwangali kumanyilila cilicose, soni kwangali lunda.

¹¹ Nayiweni soni kuti pa cilambo capasi pano kuti ŵakusawutuka mnope pa mpikisano wakuwutuka ŵangakangala kupunda pa mpikisanowo soni ŵakulimba mitima ŵangakangala kupunda pa ngondo. Ŵandu ŵakusakola yakulya ngaŵa ŵalunda, ni ŵakusasicila, soni afundi ŵangakwesyedwa ma ukumu ga pa masengo. Wosope ŵenewo upile ukusagamba kwagwila mu ndaŵi jakwe.

¹² Mundu jwangamanyilila ndaŵi jitiyimtendecele yindu yine yakwe. Mpela musikusatanjilila somba mu likoka, soni mpela muyikusatanjilila yijuni mu lwawu, ŵandu soni ali yalumo, akusatenda mpela kutanjila mu lwawu pa ndaŵi ja yakusakala, pilyagwilile likungu mwakusisimucisya.

Nganisyo syakwamba lunda ni kuloŵela

¹³ Pacilambo capasi pano pana cindu cine cakwe cinaciweni cakwayana ni lunda, nipo kwa une cinduci caliji cekulungwa.

¹⁴ Wapali msinda wamwana mumwaliji ŵandu ŵapanandi. Jwayice mwenye jwamacili kukuputa ngondo ni ŵandu ŵa mu msindamo. Mwenyejo ni asilikali ŵakwe ŵasyungulile kusa kwa lipupa lya msindawo.

¹⁵ Nambo mu msindamo mwaliji mwana mundu jumo jwalunda nambo jwakulaga, nipo ni lunda lwa jwalakwejo ŵawukulupwisye msindawo. Nambo paliji pangali ni jumo jose juŵamkumbucile mundu jwakulagajo.

¹⁶ Nambo une nguti lunda luli lwambone kulekangana ni macili, atamose kuti ŵandu ŵanyosisye lunda lwa mundu jwakulagajo, soni nganagakamulisya masengo maloŵe gakwe.

¹⁷ Maloŵe ga mundu jwalunda gakuŵecetedwa mwakuwusimana mtima gali gambone kulekangana ni maloŵe ga kugumila ga mwenye sikati ja ŵandu ŵakuloŵela.

¹⁸ Lunda luli lwambone kulekangana ni yida yakuputila ngondo, nambo mundu jumo jwakulemwa akusakomboleka konanjisya yindu yejinji yambone.